დემოკრატიის კვლევის ინსტიტუტის განცხადებით, ახალგორში კვლავ მწვავედ დგას ჯანმრთელობის დაცვის პრობლემები.
“მიმდინარე წლის მარტში ახალგორის რაიონულ საავადმყოფოში პაციენტთა მომართვიანობა მნიშვნელოვნად გაიზარდა. პაციენტთა ნაკადის ზრდამ ახალაგორის სამედიცინო დაწესებულების მომსახურება შეაფერხა. არსებული ვითარება კიდევ ერთხელ ხაზს უსვამს სამედიცინო მომსახურების სერიოზულ ნაკლოვანებებს, რაც პაციენტებისა და სამედიცინო პერსონალის შორის დაპირისპირებების მიზეზიც კი გახდა.
ახალგორის სამედიცინო დაწესებულების მთავარი გამოწვევებია: სპეციალიზებული ექიმების (პედიატრი, ქირურგი) არარსებობა, აუცილებელი მედიკამენტების შეზღუდული ხელმისაწვდომობა, სამსახურში მთავარი მედდის ხანგრძლივი დროით ადგილზე არყოფნა, რაც მედიკამენტების გაცემას აფერხებს. ამასთანავე გამოწვევაა პაციენტების ტრანსპორტირება ქ. ცხინვალის სამედიცინო დაწესებულებაში, რაც სატრანსპორტო საშუალებების გაუმართაობითა და გზების ჩაკეტვით არის გამოწვეული.
გავრცელებული ინფორმაციით, ახალგორის საავადმყოფოში მისული პაციენტის ოჯახის წევრები ხშირად ავადმყოფის თბილისში გადაყვანას ითხოვენ, თუმცა გადაადგილების შეზღუდვისა და სამედიცინო პერსონალის გადაწყვეტილებების გამო, მათ ცხინვალში გადამისამართების რეკომენდაცია ეძლევათ. აქვე აღსანიშნავია, რომ გადაუდებელი დახმარების საჭიროების მქონე პაციენტებს, სასწრაფო დახმარების მანქანის გაუმართაობის გამო, ცხინვალში გადაყვანისთვისაც დიდი დრო სჭირდებათ, რაც ავადმყოფებისთვის მწვავე გართულების საფრთხეებს ზრდის.
განსაკუთრებით შემაშფოთებელი იყო 4 წლის ბავშვის შემთხვევა. ბავშვი საავადმყოფოში ეპილეფსიური შეტევის მსგავს სიმპტომატიკით მიიყვანეს. სისხლში შაქრის დონის ვარდნა მედიკოსებმა ბავშვის ორგანიზმში ვირუსით გამოწვეულ შემთხვევად მიიჩნიეს. ადგილზე პედიატრის არყოფნის გამო, მხოლოდ თბილისელ ექიმებთან სატელეფონო კონსულტაციით გაეწია მას სამედიცინო დახმარება. ახალგორის საავადმყოფოში ქირურგის არ არსებობის ცხინვალში გადაიყვანეს პაციენტი, რომელმაც სამუშაოს შესრულებისას სამი თითი დაკარგა.
განსაკუთრებით ართულებს სიტუაციას მთავარი მედდის საავადმყოფოში ხანგრძლივი პერიოდით არყოფნა, რადგან სწორედ მას აქვს ერთპიროვნული წვდომა მედიკამენტების საცავზე. ეს გარემოება დაძაბულობას იწვევს მედპერსონალში, რადგან ისინი იძულებული არიან, მედიკამენტები ალტერნატიული გზებით მოიძიონ.
დემოკრატიის კვლევის ცენტრი მოუწოდებს საქართველოს ხელისუფლებას ახალგორში შექმნილ მდგომარეობაზე დროული და ეფექტიანი რეაგირებისკენ. ახალგორელებს უნდა ჰქონდეთ ხელმისაწვდომი და ხარისხიანი ჯანმრთელობის დაცვის მომსახურება. შესაბამისად, თბილისმა დამატებითი პროგრამების განხორციელების შესაძლებლობა უნდა განიხილოს”,_ აცხადებს დემოკრატიის კვლევის ინსტიტუტი.
