ქალაქ ოზურგეთში, ალექსანდრე წუწუნავას ქუჩაზე, ოთხმა ახალგაზრდამ ანი გოდერძიშვილმა, კობა ახალაძემ, გიორგი დოლიძემ და შაკო მენაბდემ გადაწყვიტეს, რომ ღია ცის ქვეშ სასიამოვნო და ესთეტიური ადგილი შეექმნათ. ამ ადგილს “ანის და კობის გარდენიას“ ეძახიან. ანიმ ჩვენთან საუბრის დროს აღნიშნა, რომ, როდესაც სამსახურიდან გადაღლილი მოდის, მსგავსი ადგილი ადამიანს ამშვიდებს და აწყნარებს. გიორგი დოლიძე ამბობს, რომ, ბუნებაში ყოფნას სხვა დატვირთვა აქვს.
“ესთეტიური გარემო არის შინაგანი მდგომარეობის გამოხატვა, აქედან გამომდინარე მომივიდა იდეა პატარა სასიამოვნო და ლამაზი ადგილი შეგვექმნა. სადაც მე და ჩემი მეუღლე (ანი და კობა ცოლ-ქმარია) ვცხოვრობთ, დიდი ეზო არ არის და ეს პატარა ადგილი სხვადასხვა ლამაზი ნივთებით, ყვავილებით, ნახატებით დავტვირთეთ. სახლში ჯდომას, ნამდვილად ჯობია ღია ცის ქვეშ, ლამაზ გარემოში მეგობრებთან ერთად ყოფნა. ჩანაფიქრმა გაამართლა, ძალიან ხშირად ვართ აქ მეგობრებთან ერთად და ძალიან ბევრ საკითხზე ვსაუბრობთ, ვმსჯელობთ. “- გვითხრა ანი გოდერზიშვილმა.
კობა ახალაძე, ანი გოდერძიშვილი, გიორგი დოლიძე ოზურგეთის დრამატული თეატრის მსახიობები არიან, შაკო მენაბდე კი “არწივების“ წევრი, ის მორაგბეა.
.
კობა ახალაძე: “განსხვავებული გარემო გვინდოდა და მგონი გამოგვივიდა. ძირითადად ოთხი მეგობარი ვიღებდით ამ ყველაფრის შექმნაში მონაწილეობას. დიდი მსჯელობა და დავა იყო, როდესაც დავიწყეთ ახალი გარემოს შექმნისთვის მზადება. ეს ოთხი ადამიანი ვიყავით აქტიურად ჩართული მუშაობის დროს. ისე, ბევრმა ადამიანმა მიიღო მონაწილეობა, ზოგი საჭირო ნივთებს გვჩუქნიდა, ზოგი კი ფიზიკურად გვეხმარებოდა.“
რა თემებზე მიდის საუბარი? – ამ კითხვაზე ანიმ გვიპასუხა:
“ყველაზე მეტად თეატრზე, რადგან მე, გიორგი და კობი თეატრის მსახიობები ვართ. ასევე სპორტზე, ფილმებზე და იმ სიახლეებზე, რომლებიც ყოველდღე ხდება საქართველოში.“
არ არის გამორიცხული ანის იდეამ კომერციული სახე მიიღოს.
კობა ახალაძე: “გვიფიქრია ამ საკითხზე, მაგრამ, როდის განვახორციელებთ, ეს ჯერჯერობით უცნობია. ამისთვის უფრო დიდი ფართია საჭიროა და ფინანსები. ვნახოთ, როგორ განვითარდება მოვლენები. “
გიორგი დოლიძე: “კარგია, რომ ჩემს სამეგობროში გაჩნდა იდეა, მსგავსი ადგილი გაკეთებულიყო. ამ გარემოში გვიყვარს სხვადასხვა თემებზე საუბარი, მუსიკის მოსმენა, ფეხბურთის ყურება, ყავის თუ ჩაის დალევა. ბუნებაში ყოფნას სხვა დატვირტვა და ემოცია აქვს”.
“გურია ნიუსი“ დაინტერესდა სუაბრობენ თუ არა განსხვავებულ გარემოში მყოფი ახალგაზრდები პოლიტიკაზე _ კითხვაზე გიორგი დოლიძემ გვიპასუხა.
გიორგი დოლიძე: “შეიძლება ძნელი დასაჯერებელია, მაგრამ – პოლიტიკაზე არ ვსაუბრობთ. გურიაში ყველა თაობის ადამიანი პოლიტიკურ თემებზე უფრო მეტად საუბრობს. ხომ გაგიგიათ გურიაში ბავშვმაც კი იცის პოლიტიკაო. ზუსტად ასეთი ადგილების მნიშვნელობაც ეს არის, რომ განვიტვირთოთ და არ შევეხოთ პოლიტიკურ თემებს.“ _
როგორც ჩვენმა რესპონდენტებმა გვითხრა, ახლა მიდის საუბარი და მუშაობა, ე.წ. მსგავსი გარემო ზამთრის სეზონზეც იყოს.
“გვინდა ძველი, პატარა ნაგებობა განვაახლოთ და ზამთარში დავტვირთოთ. იმედია მსგავსი ადგილები გურიაში გაჩნდება, დამიჯერეთ ეს არის განტვირთვისთვის მნიშვნელოვანი და საჭირო”, _ თქვა ჩვენთან საუბრის დასასრულს ანი გოდერძიშვილმა.
