“ჯანსაღი ცხოვრება სახალისოა” _ ამ წარწერით განათავსა ფოტო ჩოხატაურისა და ლანჩხუთის გაერთიანებული ოლქის მაჟორიტარმა დეპუტატმა ნინო წილოსანმა სოციალურ ქსელში. ფოტოზე ჩანს, რომ წილოსანი ახალგაზრდებთან ერთად კალათბურთს თამაშობს.
ნინო წილოსანის ამ პოსტს ლანჩხუთელები გამოეხმაურნენ და მაჟორიტარს წინასაარჩევნო დაპირება შეახსენეს, რომლის თანახმადაც, ლანჩხუთში საფეხბურთო სტადიონების რეაბილიტაცია უნდა მომხდარიყო:
“კარგია ჯანსაღი ცხოვრების პროპაგანდა, კარგ სტადიონზე მეგობრებთან ერთად თამაში, მაგრამ ჩვენ რა დავაშავეთ, ასეთი ” გაფარჩაკებული” სტადიონი რომ გვაქვს ლანჩხუთში სამივე?” _ წერს “დამოუკიდებელი კვლევითი ცენტრის” გამგეობის წევრი გივი ცინცაძე წილოსანის გვერდზე და შესაბამის ფოტომასალასაც ურთავს.
აღნიშნული კომენტარი წილოსანმა უპასუხოდ დატოვა. გივი ცინცაძე “გურია ნიუსთან” საუბრისას ამბობს, რომ ეს არც უკვირს, რადგან დიდი ხანია ამ საკითხზე წერს, თუმცა, უშედეგოდ:
“ბევრჯერ მივმართე გამგეობას, სტატუსებიც მედო სოციალურ ქსელში, მაგრამ შედეგი არ მოჰყოლია. არადა, სტადიონების მოწესრიგებას წილოსანიც გვპირდებოდა და ლანჩხუთის მერიც”, _ ამბობს ჩვენთან საუბრისას ცინცაძე.
დეპუტატის და მერის შეპირებები ამ საკითხის მოგვარებაზე “გურია ნიუსის” არქივშიც მრავლად მოიძებნება, თუმცა, პირობა, პირობად რჩება _ ლანჩხუთის მუნიციპალიტეტში არსებული სამი მინი სტადიონი ისევ განადგურებულია და იქ თამაში შეუძლებელია.
ნინო წილოსანი ჩვენთან საუბრისას ამბობს, რომ პრობლემები ეტაპობრივად გვარდება. დეპუტატი იმედს გამოთქვამს, რომ ჩქარ ტემპში მუშაობას შეძლებენ.
_ ქალბატონო ნინო, სოციალურ ქსელში პოსტი განათავსეთ, სადაც წერთ, რომ ჯანმრთელი ცხოვრება სახალისოა. პოსტს ფოტოც ახლავს _ კარგ სტადიონზე კალათბურთს თამაშობთ. იქვე ლანჩხუთელების კომენტარებია, სადაც საარჩევნო დაპირება შეგახსენეს, რომლის თანახმადაც, სტადიონები მოწესრიგდებოდა. მათ პასუხი არ გაეცით და იქნებ, ახლა გვითხრათ, რა ბედი ეწია თქვენს დანაპირებს?
_ სტადიონები, სკოლები, ბაღები და სხვადასხვა ინფრასტრუქტურული პროექტების მშენებლობა ხორციელდება ეტაპობრივად. ყველა ვაცნობიერებთ, რომ, სამწუხაროდ, ერთბაშად ვერ მოხერხდება მათი აღმშენებლობა. იმედი მაქვს, შევძლებთ უფრო ჩქარი ტემპებით ინფრასტრუქტურული პროექტების გახორციელებას, მით უმეტეს, რომ ჩვენი ხელისუფლების პრიორიტეტია ინფრასტრუქტურის მოწესრიგება და ბიუჯეტიდანაც წილობრივად ყველაზე მეტი თანხები სწორედ ასეთ პროექტებზეა გაწერილი, _ აღნიშნა ჩვენთან საუბრისას წილოსანმა.
ლანჩხუთის მუნიციპალიტეტის მერი, ალექსანდრე სარიშვილი “გურია ნიუსთან საუბრისას ამბობს, რომ პრობლემა გაზაფხულზე მოგვარდება:
_ დაპირებას ტყუილად არასდროს გავცემ. რამდენიმე დღის წინ საკრებულოზეც გავაკეთე ამის შესახებ განცხადება. მართლაც რთული სიტუაციაა ამ მხრივ ლანჩხუთში და ამ პრობლემის მოგვარება ჩემი ერთ-ერთი პრიორიტეტია. სამწუხაროდ, ერთი სტადიონიც კი არ არის ნორმალურ მდგომარეობაში. გაზაფხულიდან სამივე სტადიონის გაკეთება გვაქვს დაგეგმილი, _ აღნიშნა ჩვენთან საუბრისას სარიშვილმა.
