ოზურგეთის მანუჩარ კვირკველიას სახელობის ჭიდაობის კლუბი, რომელიც ა(ა)იპ სპორტის განვითარების ცენტრს ექვემდებარება, თავის რიგებში 250-მდე საშუალო და უფროსი ასაკის მოჭიდავეს აერთიანებს. საქვეყნოდ ცნობილია აქ აღზრდილთა სახელები სხვადასხვა საერთაშორისო ასპარეზობებზე. დღეს აქ არა ერთი ოზურგეთელი ახალგაზრდა ვარჯიშობს, რომელიც საქართველოს ნაკრების წევრია და ამავე დროს უცხოეთის ქვეყნის პირველ თუ უმაღლეს ლიგაში მოღვაწეობს.
“გურია ნიუსი” ერთი წლის წინ წერდა ამ თემაზე, თუმცა, მას შემდეგ ოდნავადაც არ გაუმჯობესებულა მდგომარეობა, მძიმეა ელემენტარული ყოფითი პირობები.
“დავიწყოთ იქიდან, რომ დარბაზი არასტანდარტულია და ასეთ სივრცეში რომ საჭიდაო არენა მზადდებოდა, თავიდანვე უნდა ეფიქრათ უმჯობეს ვარიანტზე. დარბაზის ოთხივე მხარეს კედლები მთლიანად დალეწილი და შენგრეულია. გათბობა, უბრალოდ, არ არსებობს. ამაზე, თავის დროზე, არავის უფიქრია.
სახურავიდან კი, წვიმიან ამინდში ისე ჩამოდის წყალი, თავი ღია ცის ქვეშ გეგონება, არაა საკმარისი ლეიბები”, _ ამბობენ სპორტსმენები.
სპორტსკოლის შესასვლელშივე, მოუწესრიგებელი ტუალეტის გამო, ფეკალიების სუნი დგას. ამ ყოველმხრივ მოუწესრიგებელ გარემოში, სპორტსმენების თქმით, ერთადერთი ბედნიერება თბილი წყალია, რომ ვარჯიშის შემდეგ გადაივლონ. თუმცა, ერთადერთია შხაპიც, რომლის ქვეშ მოსახვედრად რიგში უნდა დადგნენ.
სპორტსმენთა კითხვები _ რატომ არის დღემდე ასეთი მდგომარეობა იმ სპორტულ დაწესებულებაში, სადაც ოლიმპიური ჩემპიონი მანუჩარ კვირკველია გაიზარდა; დიდი ხნით ადრე, ფეხი აიდგა კიდევ ერთმა ოლიმპიურმა ჩემპიონმა ვახტანგ ბლაგიძემ; როცა ბერძნულ-რომაულ ჭიდაობაში სულ ხუთი ოლიმპიური ჩემპიონი ჰყავს საქართველოს და ორი ოზურგეთელია, დღემდე უპასუხოდაა.
რა ხდება და როგორ გადიან წვრთნას დღეს აქ სპორტსმენები, ვინ არიან ისინი და რა წარმატებები აქვთ?
სპორტული კლუბი, რომელიც ოლიმპიურ ჩემპიონის მანუჩარ კვირკველიას სახელობისაა, დააფუძნა ღვაწლმოსილმა მწვრთნელმა, იშვიათმა პროფესიონალმა გურამ მაჭარაშვილმა, რომელიც, იმავე რაოდენობის ხელფასს იღებს, რასაც 2008 წელს იღებდა, _ 600 ლარს. მისი და კიდევ არა ერთი თავდადებული მწვრთნელის შრომის შედეგია, რომ 35-წლიანი სტაჟის მქონე მწვრთნელს, თავისი მოღვაწეობის მანძილზე, უამრავი წარმატების ჩამოთვლა შეუძლია. ახლახან, საქართველოს ჩემპიონატზე გუნდური მეორე ადგილი, აჭარის რეგიონის შემდეგ, ამ კლუბის მოჭიდავეებმა დაიკავეს, ხოლო რაიონებს შორის პირველ ადგილზე გავიდნენ.
_ აქ ჩემპიონები მაინც იზრდებიან, რადგან გვამოძრავებს და გვასაზრდოებს უდიდესი შრომისმოყვარეობა, ფანატიზმამდე მისული სპორტული ჟინი და სახელოვანი ტრადიცია. მთლად უყურადღებოდ ვიყავითო, არავინ ამბობს და ვერც იტყვის, მაგრამ ეს ნამდვილად არაა საკმარისი იმისთვის, რომ კიდევ გავზარდოთ ჩემპიონები. ჩვენთან არსებობს უდიდესი პოტენციალი. ამიტომ, იდეალური თუ არა, საშუალო, ნორმალური პირობები მაინც უნდა შევუქმნათ სპორტსმენებს, მწვრთნელებს. ზოგიერთი მათგანის ხელფასი 200 ლარს არ აღემატება, _ გვითხრა გურამ მაჭარაშვილმა.
აქვე ვიგებთ, რომ მწვრთნელ კახა აბაშიძეს, რომელიც უკვე რვა წელია სპორტსმენებს ავარჯიშებს და ევროპის ჩემპიონატის მონაწილეც ჰყავდა, მხოლოდ 250 ლარი აქვს ხელფასი.
“გურია ნიუსი” ესაუბრა ბერძნულ-რომაული ჭიდაობის ხაზით გერმანიის პირველ ლიგაში მოასპარეზე გურულ მოჭიდავეებს.
შოთა ღლონტი, 21 წლის, საქართველოს ნაკრების წევრი: “აქ ავიდგი ფეხი. მადლიერი ვარ, თუმცა, პირობები რომ არ გვაქვს, ხედავთ. საქართველოს მოჭიდავეთა ნაკრების წევრი ვარ, გერმანიაში სექტემბერში წავედი ხელშეკრულების საფუძველზე. ქალაქ ზულგენში სამი თვე ვიყავი, პირველ ლიგაში ვჭიდაობდი. გამოვდიოდით მხოლოდ გუნდურ ჩემპიონატებზე. ანაზღაურებაც კარგი მქონდა. 15 შეხვედრიდან ყველა მოიგო ჩვენმა გუნდმა. მომავალ სექტემბერში ისევ წავალ _ ასეთია ხელშეკრულების პრინციპი”.
ზურაბ მაჭარაშვილი, 28 წლის, საქართველოს ნაკრების წევრი: “ამ სკოლაში დავიწყე ჭიდაობა. მიყვარს აქაურობა. პირობები ნამდვილად არაა სახარბიელო. ხშირად ამბობენ, რომ ეს ყველაფერი სპორტსმენებმა დალეწეს. მუყაო-თაბაშირის კედლები გამძლეობით არ გამოირჩევა. სპორტსმენი, უნდა თუ არა, კედელს მიენარცხება, ან ფეხი მოხვდება. ჭერიდან რომ თქრიალით ჩამოდის წვიმის წყალი, ზემოთაც ვირბინეთ და სახურავი დავლეწეთ?!
რაც შეეხება ჩემს სპორტულ კარიერას, ნაკრების წევრი ვარ 17 წლიდან. გერმანიაში პირველად 2009 წელს წავედი, ქალაქ ტრიბერგში. თავიდან _ მესამე ლიგის, შემდეგ _ მეორის, ახლა კი პირველი ლიგის გუნდში გამოვდივარ. გერმანიის შიდა საკლუბო შეჯიბრებებში სულ საპრიზო ადგილებზე გავდივართ. მალე ისევ წავალ. ახლა აქ ვვარჯიშობ. გერმანიაში შესანიშნავი პირობებია სავარჯიშო დარბაზებში. მესამედი პირობები რომ იყოს აქ, მეტი ჩემპიონი გვეყოლება. ჩვენი სურვილია, მეტი ყურადღება მოგვაქციონ და არც ჩვენ დავიშურებთ ძალ-ღონეს, რომ ქვეყანა ვასახელოთ”.
გერმანიაში, უმაღლეს ლიგაში ასპარეზობს ოზურგეთის საჭიდაო კლუბის წევრი ლევან ქავჟარაძე, რომელიც ამ მომენტისთვის ადგილზე არ იყო.
უამრავ კითხვაზე, რომელიც არასტანდარტული, გაპარტახებული სპორტული დარბაზის ირგვლივ ჩნდება, სადაც რემონტი 2012 წლამდე ჩატარდა, სრულყოფილ პასუხს ვერავინ გვაძლევს _ ა(ა)იპ “სპორტის განვითარების ცენტრის” ყოფილი დირექტორი გოჩა კვანტალიანი უკვე გათავისუფლებულია აღნიშნული თანამდებობიდან. მისი ნაცვლად კი ჯერ არავინ დანიშნულა, რადგან არჩევნების შემდეგ ოზურგეთში გაჭიანურდა სამსახურებში დანიშვნის საკითხი.
ოზურგეთის მუნიციპალიტეტის მერის მოადგილის ოსიკო თოთიბაძის პასუხი ამ თემაზე ზოგადი ხასიათისაა _ მან “გურია ნიუსთან” ასეთი კომენტარი გააკეთა:
“ჯანსაღი ცხოვრების წესის პოპულარიზაცია და ახალგაზრდების დაინტერესება სპორტის სხვადასხვა მიმართულებით ჩვენთვის ერთ-ერთი მთავარი პრიორიტეტია. ამიტომ, ოზურგეთის მუნიციპალიტეტის მერია სპორტის განვითარების პროგრამით გეგმავს ოზურგეთში არსებული სასპორტო სკოლების საჭიროებების შესწავლას და ინფრასტრუქტურის მოწყობას, რადგან სავარჯიშო პირობები და შესაბამისი გარემო სპორტსმენების წარმატების მთავარი წინაპირობაა”.
“გურია ნიუსი” ოზურგეთის მანუჩარ კვირკველიას სახელობის ჭიდაობის კლუბის საკითხს კვლავ მიუბრუნდება.
