ოზურგეთში, სხვადასხვა ქუჩის მონაკვეთებზე, ძლიერი წვიმების დროს გაუსაძლისი მდგომარეობაა. საკანალიზაციო ჭებიდან გადმოდის წყალი და ფეკალური მასები.
ამ მხრივ ერთ-ერთი გამორჩეული სახოკიას ქუჩაა. აქ არსებული მძიმე მდგომარეობის შესახებ, “გურია ნიუსი” ადრეც წერდა.
თედო სახოკიას ქუჩაზე, ყოველი წვიმის დროს, არსებული წყალგამტარი ჭებიდან გადმოდის ჭუჭყიანი მასა. მათ შორის, ფეკალიები და ქუჩის დატბორვის შემდეგ, იქვე, მოსახლეობის ეზოში გადადის, საიდანაც უერთდება მდინარეს.
_ აუტანელ მდგომარეობაში ვართ. რაც შეგვიძლია, ვასუფთავებთ აქაურობას. არაერთხელ ალერგია მომცა, ცუდად გავხდი. ორი საკანალიზაციო ჭა არის გზის ამ მონაკვეთზე და გაწვიმების დროს, ორივეგან ისე გადმოდის წყალი, მანქანებსაც უჭირთ გავლა. ადრეც ხომ იყო ავდარი და წვიმები, თუმცა, ასეთი მდგომარეობა არასოდეს ყოფილა. იქნებ, რაიმე იღონონ. არ მგონია, ეს მხოლოდ წვიმის ბრალი იყოს. სადღაც, ალბათ, რაღაც ან გაჭედილია მიწისქვეშა საკანალიზაციო ქსელში, ან ახალია გასაკეთებელი. თუ ეს არხები მართლა ვერ აუდის წყლის და ფეკალური მასის გატარებას, სხვა რა გზაა, უნდა შეცვალონ. გურიაში წვიმა ხშირად არის და აწი თუ სულ ასეთი მდგომარეობა იქნება, მაშინ უნდა ავსახლდეთ აქედან, _ გვითხრა იქვე მცხოვრებმა, ქართულ-უკრაინული სასწავლებლის ხელმძღვანელმა, მაკა ბრეგვაძემ.
იგივე თქვეს იქვე მცხოვრებმა და მომუშავე ადამიანებმაც.
ჩვენ ადგილზე არაერთხელ ვნახეთ და გადავიღეთ არსებული მდგომარეობა. შემდეგ კი მივმართეთ წყალმომარაგების ოზურგეთის კომპანიის ხელმძღვანელს შალვა კონჯარიას:
_ სახოკიას ქუჩაზე არსებული მდგომარეობა არ არის მიწისქვეშა ქსელის გაჭედვის ან მწყობრიდან გამოსვლის ბრალი. ასე რომ იყოს კარგ ამინდშიც გადმოვიდოდა წყალი. ამ მხარეს ყველაზე მეტი დატვირთვა უწევს ქსელს, რადგან ბოლო წერტილია მდინარეში გასვლამდე. მიწისქვეშა არხი, ძლიერი წვიმების თუ თოვლის დროს, ვერ ატარებს სრულად წყალს. მით უფრო თუ თოვლ-ჭყაპია. მიზეზი ის არის, რომ გაიზარდა ქალაქის მცხოვრებთა რაოდენობაც. აქედან გამომდინარე, დატვირთვაც გაიზარდა. არხებსაც მეტი წყლის ნაკადის გატარება უწევთ. შესაცვლელია და ახალია გასაკეთებელი. უფრო უნდა გაფართოვდეს მიწისქვეშა არხები და გამტარუნარიანობაც მეტი იქნება. ეს საკითხი დღის წესრიგში დგას. ჩვენ გამოძახებული გვყავს საპროექტო ჯგუფი თბილისიდან და მალე შეიცვლება. თუმცა, უახლოეს დღეებში ეს შეუძლებელია. ვიცით, პანდემიაა, ხელისშემშლელი სხვა ფაქტორებიც არსებობს _ იყო ძალიან ცუდი ამინდები. გავაკეთებთ აუცილებლად. ცოტა ხანს კი, წვიმების დროს, როგორმე უნდა გავუძლოთ ასეთ მდგომარეობას, _ თქვა “გურია ნიუსთან” შალვა კონჯარიამ.
იმედია, სახოკიას ქუჩის პრობლემა მოგვარდება. თუმცა, წვიმები (მით უფრო, წელიწადის ამ დროს) ხშირად არის მოსალოდნელი და როგორი ასატანია ყოველ გაწვიმებისას, ფეკალიებით ავსებული ქუჩა და ეზოები, არაა ძნელი მისახვედრი.
წვიმის შემდეგ ეზოები ფეკალიებით ივსება
მსგავსი მდგომარეობაა მდინარე ბჟუჟის სიახლოვეს, თაყაიშვილის ქუჩის ერთ-ერთ შესახვევში, ნომერი 43 საცხოვრებელი სახლის ჭიშკართან მდებარე მილხიდის გასწვრივ.
როგორც ამ სახლის მცხოვრებმა, ვაჟა კალანდაძემ გვითხრა, ეზოდან მომავალი ნიაღვარი გადმოდის ჭიშკრის გარეთ. იქვე კი, მილხიდის მეშვეობით გაივლის ასფალტიანი გზის შიდა პერიმეტრს. თუმცა, ახლანდელი წვიმების დროს გაიჭედა და, როგორც თავად გვითხრა, ვერაფერი მოუხერხეს.
_ ეს მილხიდი ძალზე ვიწროა, ამიტომ ძლიერი წვიმის ან თოვლჭყაპის დროს, არ ატარებს წყალს და იმხელა ტბა დგება, ეზოდან ვერ გამოვდივართ, _ გვითხრა სახლის მეპატრონემ.
მისივე თქმით, შესაძლოა, მილში ადვილად გაიჭედოს უბრალო ფოთლების გროვაც კი, რადგან ნიაღვარს ფოთლების დიდი რაოდენობა მიაქვს.
_ შემოდგომის ბოლოდან გაზაფხულამდე ბუნებაში, გარემოში უამრავი ხმელი ფოთოლი ყრია. ნიაღვარს კი ის ყველაზე ადვილად მიაქვს. რა ვქნა, ფოთლებს ხომ ვერ დავუყარაულდები? მილი ისე ვიწროა, იქ ფოთლის მეტი არც შეიძლება რაიმე “გაძვრეს” და ისიც იჭედება. თავის დროზე არის გაკეთებული არასწორად. დიამეტრი ორჯერ მეტი მაინც უნდა იყოს, ვიდრე ეს მილია და პრობლემა არ იქნება. ახლა ვის მივმართო, აღარ ვიცი. სახანძრო-სამაშველო სამსახურს ჰყავს ასეთი მანქანები, დაბერვა რომ შეუძლია. თუმცა, ვიღაცას გაეცინება, ამისთვის რომ სამაშველო სამსახურში დავრეკო. არადა, სწორედ ეს პატარა მილი გვიქმნის ჭიშკართან ყველაზე დიდ პრობლემას, წვიმის დროს. ფაქტობრივად, რეზინის მაღალყელიანი ბოტებითაც ვერ გადმოხვალ, ძლიერი წვიმის დროს, იმხელა ტბა ჩნდება ადგილზე. ჩემი ძალებით მე ამას ვერანაირად ვერ გავაკეთებ. ასფალტს ხომ ვერ ავყრი? დამაჯარიმებენ მაშინვე, _ გვითხრა ვაჟა კალანდაძემ.
“გურია ნიუსს” წყალმომარაგების კომპანიაში იგივე პასუხი გასცეს, რაც სახოკიას ქუჩის შემთხვევაში _ რომ ქალაქში არის ისეთი უბნები, სადაც მილხიდს თუ წყალქვეშა საკანალიზაციო სისტემას, წყალმოვარდნების დროს, უჭირს ფუნქციონირება.
ოზურგეთში, ბევრ ქუჩაზე არის თანამედროვე ტიპის, წყალგამტარი ცხაურები გაკეთებული. თუმცა, როგორც ჩვენი წყარო გვეუბნება, ამ ახალგაკეთებული ცხაურების მოპარვაც დაიწყეს და სავარაუდოდ, ჯართში აბარებენ. ასეთი ფაქტი მოხდა ლომთათიძის ქუჩაზე.
როგორც აქ მცხოვრებლებმა “გურია ნიუსთან” განაცხადეს, ადგილზე პოლიციაც იყო:
_ შემდეგ ზარალის ღირებულების რაოდენობის დასაზუსტებლად, პოლიციიდან მერიას მიმართეს. შეგვპირდნენ, რომ მალე გააკეთებენ, _ გვითხრეს აქ.
“გურია ნიუსს” ოზურგეთის მუნიციპალიტეტის მერიაში უთხრეს, რომ აღნიშნული ფაქტის შესახებ იციან და მალე ძველი მილების ახლით ჩანაცვლდება.
[sexy_author_bio]
