“გავა წლები, აფხაზეთი და სამაჩაბლოც წარსულს ჩაბარდება”

2008 წლის საქართველო – რუსეთის შორის მომხდარი ომის შემდეგ 9 წელი გავიდა,  ამ დროის განმავლობაში საქართველოს ტერიტორიების ოცი პროცენტი ოკუპირებულია.

დროთა სვლამ  ახალი რეალობა მოიტანა. კერძოდ, რუსეთმა აფხაზეთი და სამხრეთ ოსეთი დამოუკიდებელ სახელმწიფოდ აღიარა და მის მიერ აღიარებულ დე ფაქტო აფხაზეთსა და სამხრეთ ოსეთში არაფორმალური მმართველები განამწესა. რა იქნება შემდეგში? ამ კითხვაზე პასუხი არავის აქვს.

„გურია ნიუსთან“ საუბრისას უფლებადამცველთა გაერთიანების თავმჯდომარე ნიკოლოზ მჟავანაძე  აცხადებს, რომ დროის სვლა საქართველოზე დადებითად არ მოქმედებს და  აფხაზეთი და სამაჩაბლოც ისე დაავიწყდება საზოგადოებას, როგორც ეს ტაო-კლარჯეთის შემთხვევაში მოხდა.

,,როგორ გაგრძელდება რუსეთთან ურთიერთობები, საქართველოს ხელისუფლებაზეა დამოკიდებული. რუსეთმა კონტაქტების დასამყარებლად არაერთი მესიჯი გამოუგზავნა საქართველოს და,  სამწუხაროდ, პროგრესული ნაბიჯები არ გადაიდგა. კაცს ისეთი შთაბეჭდილება დარჩება, თითქოს რუსეთს აქვს დაკარგული ტერიტორიები და გვეხვეწება,  მოდი, დავილაპარაკოთო. მტერს უნდა დაელაპარაკო, აბა, მოყვარესთან დასალაპარაკებელი და გასარჩევი რა არის. ტერიტორიების დაბრუნება დიალოგისა და მოლაპარაკებების გარეშე ვერ მოხერხდება. რუსეთის საგარეო საქმეთა მინისტრმა გრიგორი კარასინმა განაცხადა, რომ  საქართველოს სიღრმისეული დიალოგისკენ მოუწოდებდა, მაგრამ უშედეგოდ. რუსეთი საქართველოს თავის მტრად აღარ განიხილავს, ამიტომ ურთიერთობის დასალაგებლად შანსები არსებობს. ცალსახად შეიძლება ითქვას, რომ დრო ჩვენს სასარგებლოდ ნამდვილად არ მოქმედებს, რადგან დემოგრაფიული მდგომარეობა აფხაზეთსა და სამაჩაბლოში დღითიდღე იცვლება. ნელ-ნელა მსოფლიო შეეგუება ამ პროცესს და ერთ მშვენიერ დღეს  დავინახავთ, რომ  საქართველოს მოკავშირეები აღიარებენ აფხაზეთსა და სამაჩაბლოს რუსეთის შემადგენლობაში. ერთ დროს ტაო-კლარჯეთიც საქართველოს ტერიტორიის ნაწილი იყო, მაგრამ ახლა თავად ქართველი პოლიტიკოსები ამბობენ, რომ  რაღა დროს ტაო-კლარჯეთიაო. გავა წლები და აფხაზეთიც და სამაჩაბლოც წარსულს ჩაბარდება. აღარავინ ილაპარაკებს იმაზე, რომ ოდესღაც ეს ტერიტორიები საქართველოს შემადგენლობაში შედიოდა“, _ განაცხადა ნიკოლოზ მჟავანაძემ.