„გავრილოვის ღამე“ – ეს არის „რუსთავი 2“-ის იარლიყი, იმიტომ, რომ გავრილოვი საერთოდ არ ყოფილა იმ ღამეს თბილისში. ის გაფრინდა შუადღეს, 5 საათსა და 30 წუთზე“, – ამის შესახებ „ქართული ოცნებიდან“ თიანეთის, ყაზბეგის და დუშეთის მაჟორიტარმა დეპუტატმა, ზაქარია ქუცნაშვილმა განაცხადა.
ქუცნაშვილი ამბობს, რომ 20–21 ივნისს, პარლამენტთან განვითარებულ მოვლენებს „გავრილოვის ღამე“ ტელეკომპანია „რუსთავი 2“–ის გენერალური დირექტორმა, ნიკა გვარამიამ დაარქვა, რითიც „ერთიანი ნაციონალური მოძრაობის“ ძალადობის გამართლებას ცდილობენ.
„გავრილოვის ღამე“ არა ის… ჭიჭიკოს ღამე. ობიექტურები ვიყოთ ადამიანები. გავრილოვის ღამე კი არ იყო, ძალაუფლების ხელში ჩაგდების მცდელობის ღამე იყო. გავრილოვის ღამედ გინდათ გაამართლოთ „ნაციონალების“ ძალადობა? ეს არის თქვენი მიზანი?“ – განაცხადა ზაქარია ქუცნაშვილმა.
ჟურნალისტის კითხვაზე, გავრილოვის პარლამენტის თავმჯდომარის სავარძელში ჯდომას რას დაარქმევდა, ქუცნაშვილი ამბობს, რომ თავმჯდომარის სკამი წმინდანის არაა.
„გვარამიას სტანდარტებით საუბრობთ. წმინდანის სკამია პარლამენტის თავმჯდომარის სკამი თუ რა არის, ვერ გავიგე? როდის გახდა წმინდანის სკამი – ნინო ბურჯანაძე რომ იჯდა, მაშინ თუ კაკო ასათიანი რომ იჯდა მაშინ?…
უბრალოდ, საზოგადოება ახლა კლიშეების ქვეშაა და ობიექტურობას მოწყვეტილია, რადგან რეალურად მანდ რაც იყო გადაცდომა, გადაცდომა იყო ის, რომ საზოგადოებამ ვერ მიიღო სიმართლე მტრის თაობაზეც კი. საზოგადოებას მიაწოდეს ინფორმაცია, რომ ვითომ ეს გავრილოვი იყო საქართველოს დამბობმბავი, აფხაზეთში ნაომარი, ქართველების სისხლის მსმელი – აი, ასე იყო გაყალბებული ფაქტები“, – განაცხადა ქუცნაშვილმა.
ჟურნალისტის მაჟორიტარ დეპუტატს ჰკითხა, გრძნობს თუ არა საკუთარ პასუხისმგებლობას მომხდარის გამო, რაზეც მან უპასუხა: „ეს იყო უზარმაზარი ქაჯობა, რაც გააკეთეს იმ დღეს. ამან დააზარალა ქვეყანა“.
