სეზონური გრიპის შემთხვევები მომატებულია ლანჩხუთის მუნიციპალიტეტშიც. ლანჩხუთის საზოგადოებრივი ჯანდაცვის ცენტრის ხელმძღვანელი ნატო მენაღარიშვილი “გურია ნიუსთან” საუბრის დროს ამბობს, რომ კორონავირუსით ინფიცირების შემთხვებმა იკლო, მაგრამ სამედიცონო დაწესებულებებში სხვადასხვა ვირუსული ინფექციების გამო მიმართვიანობა გაზრდილია.
“კორონავირუსის მხრივ კლებაა, თუმცა ერთეული შემთხვეები მაინც გვაქვს. ეს წელი ჯერ კიდევ ახალი დაწყებულია და ამ 9 -10 დღის განმავლობაში უკვე ინფიცირების 7 შემთხვევა დაფიქსირდა. თუმცა ამ ეტაპზე უფრო მძლავრობს სხვადასხვა ვირუსული ინფექციები. გრიპის ვირუსის სხვადასხვა შტამები, რომელიც საკმაო აგრესიულობით გამოირჩევა.
ზოგადად გრიპის ვირუსი არ არის ადვილად ხელწამოსაკრავი ინფექცია. ყოველთვის გარკვეული გართულებები ახლავს თან. შემთხვევების რაოდენობა მომატებულია განსაკუთრებით ბავშვთა კონტიგენტში. მომართვიანობა მომატებულია კლინიკებში. ყოველკვირეული სტატისტიკის მიხედვით, 900-იდან 1000-ამდე პაციენტი მომართავს სამედიცინო დაწესებულებებს სხვადასხვა ინფექციების გამო. ანტივირუსული პრეპარატებით მომარაგებული ვართ. გარკვეულ რისკჯგუფებზე უბნის ან ოჯახის ექიმის რეცეპტის საფუძველზე უფასოდ გაიცემა, რადგან ძვირადღირებული და ეფექტური პრეპარატია”,_ ამბობს მენაღარიშვილი.
ჯანდაცვის ცენტრის ხელმძღვანელის თქმით, ვირუსისგან თავდაცვის გზა ისევდაისევ პირბადის ტარება, პირადი ჰიგიენის დაცვა და გრიპის საწინააღმდეგო ვაქცინის გაკეთებაა. გარდა ამისა, ვირუსისთვის დამახასიათებელი სიმპტომების ქონის შემთხვევაში, აუცილებელია რომ ხალხმრავლობას მოერიდოთ და დარჩეთ სახლში.
“რაც შეეხება პროფილაქტიკას. ყველა ჰაერწვეთოვანი ინფექციის პროფილაქტიკის წესი არის იგივე, რაც კორონავირუსის პანდემიის გამო. აუცილებელია ჰიგიენის დაცვა, ხელების ხშირი დაბანა და ნიღაბის ტარება. კორონავირუსის შესუსტების გამო მოსახლეობა ნიღაბს გადაეჩვია, მაგრამ გრიპიც იგივე წესით ვრცელდება. ამიტომ თავდაცვის ერთადერთი საშუალება ნიღბის ტარება და გრიპის საწინააღმდეგო ვაქცინის გაკეთებაა. თუ კორონავირუსის ვაქცინის მიმართ მოსახლეობა უნდობლობას გამოხატავდა, გრიპის ვაქცინა საკმაოდ აპრობირებული და გამოცდილი ვაქცინაა. წლების განმავლობაში მოსახლეობა იკეთებს ამ ვაქცინას. თუმცა მაინც არის მოსახლეობის გარკვეული ჯგუფები მაინც არის დარჩენილი ვინც არ აცრილა. მოსახლოება სრულად რომ იყოს აცრილი გრიპის ამდენი შემთხვევა არ გვექნებოდა.
ინფიცირებული ადამიანი არ უნდა წავიდეს საზოგადოებრივი თავშეყრის ადგილში. ეს სკოლა იქნება, ბაღი, სამსახური თუ სხვა საზოგადოებრივი თავშეყრისთვის განკუთვნილი ხალხმრავალი ადგილი”,_ ამბობს მენაღარიშვილი.
ავტორი
