გუშინ, შვეიცარიის ქალაქ ნიონში გამართულ წილისყრაზე ერთა ლიგაზე საქართველოს ნაკრების მეტოქეები გაირკვა _ ჩვენი გუნდი C ლიგის მე-4 ჯგუფში ბულგარეთთან, ჩრდილოეთ მაკედონიასთან და გიბრალტართან მოხვდა.
ტურნირზე ჯგუფური ეტაპის 4 ტური მომავალი წლის ივნისში ჩატარდება, ხოლო 2 _ სექტემბერში. ჯგუფში გამარჯვების შემთხვევაში, საქართველოს ნაკრები ევროპის ჩემპიონატისთვის გამსვლელ ნახევარფინალს 2023 წლის 14 ან 15 ივნისს, მასში წარმატების შემთხვევაში კი ფინალს 18 ივნისს ჩაატარებს.
კენჭისყრის შემდეგ ბულგარეთისა და ჩრდილოეთ მაკედონიის ნაკრებების მთავარმა მწვრთნელებმა პირველი კომენტარები გააკეთეს.
იასენ პეტროვი (ბულგარეთის ნაკრების მწვრთნელი): “ჩემი აზრით, კარგი წილისყრა იყო, თუმცა ეს არ ნიშნავს, რომ რომელიმე მეტოქეს პატივს არ ვცემთ _ მსგავს პოზიციაში არც ვართ. ჩვენი მიზანი ჯგუფში პირველობაა. თითოეულ მეტოქეს პატივს ვცემთ. ოთხ თამაშს მიყოლებით ვითამაშებთ, რაც ჩვენთვის გამოწვევა იქნება, მაგრამ ყველაფრისთვის მზად ვართ. წარმატებებს ვუსურვებ ჩვენს ფეხბურთელებს, დარწმუნებული ვარ, რომ წარმატებული 2022 წელი გვექნება“.
ბლაგოია მილევსკი (ჩრდ. მაკედონიის მწვრთნელი): “რთული ჯგუფია, მაგრამ დღევანდელ ფეხბურთში ადვილი მეტოქე ან წინასწარ მოპოვებული ქულები არ არსებობს. სერიოზული მატჩები გველოდება. საქართველო ის გუნდია, რომლის წინააღმდეგაც ბოლო პერიოდში ვითამაშეთ და ვიცნობთ. ბულგარეთმა ევროპის ჩემპიონ იტალიასთან ფრე ითამაშა, ეს ნიშნავს, რომ მნიშვნელოვანი პროგრესი აქვს. გიბრალტარიც არ არის ის გუნდი, რომლის წინააღმდეგ D ლიგაში ვითამაშეთ, უფრო გაიზარდა. ჩრდილოეთ მაკედონია ყველა მატჩში უმაღლეს დონეზე მომზადებული უნდა იყოს, თანამედროვე ფეხბურთი განსხვავებულ მიდგომას უბრალოდ არ გაპატიებს“.
გუშინ რუსულ სპორტულ მედიაში გავრცელდა ცნობა, რომ ბელგიური “გენტი” გიორგი ჩაკვეტაძესთან გამომშვიდობებას აპირებს და მის ნაცვლად არტურ გალოიანით გაძლიერებას აპირებს.
“Матч ТВ”-ის მტკიცებით, სომხური წარმომავლობის მქონე 22 წლის ნახევარმცველი, რომელიც რუსეთის მოქალაქეა და ამ ქვეყნის პირველი ლიგის “ველესში” ასპარეზობს, ბელგიაში გადაბარგებასთან ახლოსაა. გაირკვა, რომ ამჟამად ბელგიურ და რუსულ კლუბებს შორის გალოიანის შესაძლო ტრანსფერზე მოლაპარაკება მიმდინარეობს.
რუსი ჟურნალისტების ხელთ არსებული ინფორმაციით ჩაკვეტაძეს რამდენიმე კარგი წინადადება აქვს ევროპული ტოპლიგებიდან და დიდი ალბათობით, კლუბს ზამთრის სატრანსფერო ფანჯრის პერიოდში შეიცვლის.
ბოლო პერიოდის განმავლობაში ჩაკვეტაძის ირგვლივ არაერთი ჭორ-სიმართლე ვრცელდება. ფაქტი ერთია _ ეს ნიჭიერი ფეხბურთელი “გენტის” სათადარიგოთა სკამის მუდმივ მობინადრედ გადაიქცა და ამ უთამაშებლობას, ალბათ, მალე წერტილი უნდა დაესვას. კარგი იქნება, თუ ქართველი ჟურნალისტები უახლოეს დღეებში უშუალოდ გიორგის დაუკავშირდებიან და მის თავს არსებულ მდგომარეობაზე გაესაუბრებიან. მის შესახებ ცნობებს ძირითადად ბელგიური და აი უკვე რუსული მედიისაგან ვგებულობთ და მათგან რომელია სიმართლე რთული დასადგენია.
გუშინ ყაზანურმა ვებ-გვერდმა “Pro Kazan” კლუბ “რუბინს” სპეციალური წერილი მიუძღვნა და როგორ იქნებოდა ხვიჩა კვარაცხელიაზეც რომ არ ესაუბრა:
“გასულ ზაფხულს, მხოლოდ სმენადაქვეითებული ვერ გაიგონებდა სიახლეებს იმის შესახებ, რომ “რუბინის” ქართველი ნახევარმცველი ხვიჩა კვარაცხელია ყაზანს დატოვებდა და კარიერას ევროპულ ტოპ–კლუბში განაგრძობდა. საბოლოოდ, ეს უშედეგო საუბრები აღმოჩნდა და ახალგაზრდა ფეხბურთელი “რუბინში” დარჩა. იმედგაცრუებული ხვიჩა კრიზისსა და დეპრესიაში ჩავარდა. ეს მდგომარეობა კი მთელ გუნდს გადაედო.
საკლუბო დონეზე არც ისე წარმატებული თამაშის მიუხედავად, ხვიჩას სატრანსფერო ღირებულება არ იკლებს. ის კვლავ 18 მილიონი ევრო ღირს, რისი ერთ–ერთი მთავარი მიზეზიც შვედეთის ნაკრების წინააღმდეგ ძლიერი თამაში იყო _ ქართველმა ჩრდილოელებს დუბლი შეუსრულა და ფაქტობრივად, ესპანეთის ნაკრებს მუნდიალის პირდაპირი საგზური აჩუქა.
როგორც ვხედავთ, კვარაცხელიას ბრწყინვალე ფეხბურთის თამაში ისევ შეუძლია _ ოღონდ “რუბინში” აღარ. არაა გამორიცხული, რომ ამ ზამთარში ხვიჩას შესაძენად “რუბინს” სერიოზულმა კლუბმა მიმართოს და ქართველიც დაუყოვნებლივ ევროპაში გაემგზავრება“.
კორონავირუსი კი არ ცხრება, ევროპულ ფეხბურთს გაათმაგებული უტევს და ახალ-ახალ პრობლემებს ქმნის.
გუშინ მადრიდის “რეალმა” ვარჯიში გააუქმა, რათა გუნდში კოვიდინფექციაზე დამატებითი ტესტირება ჩაეტარებინა. მანამდე გავრცელდა ინფორმაცია, რომ “რეალის” ნახევარმცველ ლუკა მოდრიჩსა და მცველ მარსელოს კორონავირუსის ტესტზე დადებითი პასუხები ჰქონდათ. გუშინ გაირკვა, რომ გუნდში ინფიცირებულთა რაოდენობა ორზე მეტია, კლუბში ეპიდვითარების გაუარესებას ელიან და აპირებენ, “ლა ლიგის” ხელმძღვანელობას მატჩების გადატანის მოთხოვნით მიმართონ.
გუშინვე ცნობილი გახდა რომ “მანჩესტერ იუნაიტედში” კორონავირუსის ინფექციამ ახალი ძალით იფეთქა. ბრიტანული მედიის მტკიცებით, ტესტირების შედეგად კლუბის თანამშრომლებსა და ფეხბურთელებს შორის დაინფიცირების უკვე 19 შემთხვევა გამოვლინდა.
ამის გამო, “მანჩესტერ იუნაიტედი” ინგლისის პრემიერლიგის ხელმძღვანელობასთან მე-18 ტურის შეხვედრის გადატანის შესაძლებლობას განიხილავს. კრიშტიანო რონალდოს გუნდს დაპირისპირება “ბრაიტონთან” უწევს, სადაც თავის მხრივ კოვიდით დაავადების რამდენიმე ფაქტი ასევე გამოვლინდა.
გუშინ “ბრენტფორდის” მწვრთნელმა თომას ფრენკმა პრემიერლიგის გაჩერება ოფიციალურად მოითხოვა და წინადადებით გამოვიდა, რომ თუნდაც ერთი კვირით შეჩერდეს ფეხბურთი ინგლისში, მათ შორის, შუა კვირაში გასამართი ლიგის თასის შეხვედრები.
გუშინ ინგლისის პრემიერ ლიგის მე-17 ტურის შეხვედრა “ლესტერსა” და “ტოტენჰემს” შორის გადაიდო. მიზეზი ორივე გუნდში COVID-19-ის გავრცელებაა.
[sexy_author_bio]
