რამდენიმე დღის წინ, ლანჩხუთის მერიამ საკუთარ ოფიციალურ გვერდზე ის ინფრასტრუქტურული პროექტების ჩამონათვალი გაასაჯაროვა, რომლის გახორციელებაც მიმდინარე წელს არის დაგეგმილი მუნიციპალიტეტში.
როგორც მერიის მიერ გაკეთებულ განცხადებაში ვკითხულობთ, მათი მხრიდან ამ ჩამონათვალის გავრცელების წინაპირობა ინფრასტრუქტურული სამუშაოების შესახებ მედიასაშუალებებში გავრცელებულმა ინფორმაციებმა შექმნა.
“ბოლო დროს სხვადასხვა მედიასაშუალებაში ვრცელდება ინფორმაცია, თითქოს ლანჩხუთის მუნიციპალიტეტში ინფრასტრუქტურული პროექტები შეჩერებულია”, _ ვკითხულობთ მერიის მიერ გავრცელებულ ოფიციალურ განცხადებაში, სადაც იმ პროექტების ჩამონათვალიცაა, რომელთა გახორციელება მიმდინარე წელს დაიწყო და მათი ნაწილი 2020 წელს დასრულდება. ამ ინფრასტრუქტურული სამუშაოების ჯამური ღირებულება 11 600 000 ლარს შეადგენს.
მერია ინფორმაციაში არ აკონკრეტებს რომელმა მედიასაშუალებამ რომელ მიმდინარე თუ დაგეგმილ ინფრასტრუქტურულ პროექტთან დაკავშირებით გაავრცელა მცდარი ინფორმაცია. თუმცა, მედიასაშუალებებში გაჟღერებული ინფორმაციები იქეთ რომ იყოს, მერიის ოფიციალურ გვერდზე თვალის გადავლებითაც ნათელი ხდება, რომ ლანჩხუთში გასაკეთებელი ჯერ კიდევ ბევრია. ამ დასკვნის საშუალებას მოქალაქეების მიერ გაკეთებული ის კომენტარები იძლევა, რომელიც მერიის ფეისბუქგვერდზე მრავლადაა გამოქვეყნებული.
“სხვა ქუჩები არ ვიცი, მაგრამ იოანე ნათლისმცემლის ქუჩა რომ ამოშალეს ლანჩხუთის ტერიტორიიდან, ეგ ჭეშმარიტებაა!”
“ნინოშვილის პირველი შესახვევიდან მერამდენედ უნდა შემოვიტანოთ განცხადება?! გზას თუ არ აგებთ, სანიაღვრე არხები მაინც გააკეთეთ!”
“რომელი გზა აღადგინეთ აკეთში სტიქიით დაზიანებული, იქნებ, არ ვიცით. არ დაიღალეთ ამდენი ტყუილებით ან საერთოდ გზას თქვენ რას ეძახით?! კიდევ, ბატონო მერო, ეს ავტობანის მანქანები რომ დახრიგინობენ თქვენ მიერ “აღდგენილ” გზაზე, რატომ არ ირწყვება გზები შუხუთიდან ჭანჭათამდე?! შეიძლება ამ გაუსაძლის სიცხეში გზის მოურწყველობა? ეს არის სოფლის მოსახლეობის აგდება, მეტი არაფერი, მიაქციეთ ყურადღება”.
“ღრმაღელეში ონკანში წყალი მოწესრიგდაო _ ისე მოგიწესრიგდათ ოჯახში ყველაფერი თქვენ!”
“ძალიან ლამაზდება ქალაქი. იქნებ, სოციალური მომსახურების სააგენტომდე მისასვლელ გზასაც მიხედოთ”, _ ვკითხულობთ მერიის ოფიციალურ ფეისბუქგვერდზე მოქალაქეების მიერ გაკეთებულ კომენტარებში.
როგორც ამ კომენტარებიდან ჩანს, ყველაზე მეტად გამწყრალები ამ მხრივ ქალაქის მოსახლეობის ის ნაწილია, რომელიც რკინიგზის სადგურისა და სტადიონის მიმდებარედ ცხოვრობს.
“ბატონო მერო, მორჩილაძის ქუჩაზეც შემოგვიჭყიტე და დაინახე ორმოები და ტალახი”.
“მორჩილაძის ქუჩას უყურებს მატარებლიდან მრავალი ტურისტი და სირცხვილი არაა, ბატონო მერო, იმოდენა ორმო-ტალახების დანახვა?! რას იფიქრებენ ტურისტები _ ეს რა საშინელება ყოფილა საქართველო, აქ რამ ჩამოგვიყვანაო. მოგვხედეთ”.
“რა დააშავა რკინიგზის სადგურის მიმდებარე ტერიტორიამ? ნინოშვილის ქუჩაზე ამდენმა ნანგრევებად ქცეულმა შენობამ ქვეწარმავლების ბუდედ რომ იქცა _ რა დააშავა არაცენტრალურმა გზისპირა ლანჩხუთმა?!”
“წყალდიდობა არ აცდება ჩემს ქუჩას. პირველ რიგში, სადგურის მიმდებარე არხები უნდა გაკეთებულიყო. ყველა ქუჩის ნიაღვარი ჩვენთან იყრის თავს”, _ წერენ ის ლანჩხუთელები, რომლებიც რკინიგზის სადგურის მიმდებარე ტერიტორიაზე ცხოვრობენ.
აქაური მოსახლეობა უკმაყოფილებას არც “გურია ნიუსთან” საუბარში მალავს და ამბობს, რომ რკინიგზის სადგურისკენ მიმავალ გზაზე საკმაოდ მძიმე მდგომარეობაა შექმნილი. მათი თქმით, სადგურის სიახლოვეს ცხაურა ისე გამოვიდა მწყობრიდან, რომ ავტომანქანით გადაადგილება, ფაქტობრივად, შეუძლებელი ხდება. მეტიც, აქ ფეხით გავლაც კი საფრთხის შემცველია.
“მივმართეთ ყველას, ვისთვისაც უნდა მიგვემართა, მაგრამ შედეგი რაც არის, ფაქტი აგერაა _ ეს ცხაურა ჯერ ცოტაზე იყო დაზიანებული, მერე ნელ-ნელა იმატა. ეს სადმე სოფლის განაპირა გზა კი არ არის, ქალაქის ქუჩაა. აქვე რკინიგზის სადგურია, სადაც უამრავი ადამიანი მიდი-მოდის ყოველდღიურად”, _ ამბობენ მიმდებარე ტერიტორიის მაცხოვრებლები.
როგორც მათი საუბრიდან ირკვევა, ნინოშვილისა და ზენაიშვილის ქუჩების მიმდებარედ გზის საფარისა და ცხაურის დაზიანება ავტობანზე მომუშავე მძიმეწონიანი მანქანების ხშირმა გადაადგილებამ გამოიწვია:
“ეს გზა ჩვენ, ადგილობრივებს არ გაგვიფუჭებია. ეს ყველაფერი გამოიწვია იმან, რომ ტრაილერები გადაადგილდებოდნენ ამ გზით. რამდენიმე მანქანა ყოველ ღამე აქ ეყენა, რადგან მათ მძღოლებს სახლი ჰქონდათ აქვე ნაქირავები. ბევრჯერ მოვითხოვეთ, რომ ტრაილერების სიარული აეკრძალათ, მაგრამ ნული იყო შედეგი. ახლა წვიმის მოსვლის გვეშინია, რადგან ჩავარდნილი ცხაურები წყალს ვერ გაატარებენ და ეს კიდევ დამატებითი საფრთხეებს შექმნის _ ეზოები დაგვეტბორება”, _ ამბობს მოსახლეობა, მათ პასუხად კი მერიასა და ქალაქის ადმინისტრაციული ერთეულის წარმომადგენლობაში განმარტავენ, რომ რკინიგზის სადგურის მიმდებარედ დაზიანებულ მილხიდთან დაკავშირებით საქმის კურსში არიან, მერიის შესაბამისი სამსახურების მიერ მზადდება პროექტი და უახლოეს დღეებში სარემონტო სამუშაოები დაიწყება.
