ვაზთან ურთიერთობასა და ღვინის დაყენებას საქართველოში უდიდესი ისტორია აქვს. საქართველოში აღმოჩენილია მსოფლიოში უძველესი ღვინის ჭურჭელი და ღვინის სამშობლოდაც საქართველო ითვლება. აღსანიშნავია ქვევრის ღვინის დაყენების ქართული ტრადიციული მეთოდი, რომელსაც 2013 წელს იუნესკოს (UNESCO) არამატერიალური კულტურული მემკვიდრეობის ძეგლის სტატუსი მიენიჭა.
ბიომეღვინეობის მიმართ ევროპულ ბაზრებზე დიდი მოთხოვნაა.
ღვინოს შეიძლება ”ბიო ღვინო ” ეწოდოს, თუ ის ორგანული მეურნეობითაა მოყვანილი, ანუ ყურძნის მოსაყვანად არ არის ქიმიური სასუქები და სხვა შხამქიმიკატები გამოყენებული. ამასთან, ღვინის დაყენების პროცესიც კონტროლდება. ღვინო სრულად ნატურალური უნდა იყოს. ცნობილია, რომ შხამქიმიკატები მოსავლიანობის ზრდას უწყობს ხელს, რის გამოც ბევრი მევენახე უარს ამბობს ორგანული მეთოდის გამოყენებაზე. თუმცა, როგორც სპეციალისტები განმარტავენ, შხამქიმიკატების გამოყენების შემდეგ ნიადაგი იფიტება და ნაყოფში მავნე ნივთიერებებიც გროვდება.
როგორც ცნობილია, ბიო ღვინოს საქართველოში, ჯერჯერობით, 60 მეწარმე ამზადებს. მათ შორის ერთ-ერთი პირველი არის „ღვინის კომპანია შუმი“, რომლის ტურისტულ ბაზაზეც „გურია ნიუსი“ მედიის წარმომადგენლებისთვის გამართული შეხვედრის ფარგლებში იმყოფებოდა.
როგორც ჟურნალისტებთან გამართულ შეხვედრაზე კომპანიის მთავარმა კონსულტანტმა მევენახეობის დარგში, გიორგი ალადაშვილმა განაცხადა, კომპანია შუმს აქვს ძველი, გადაშენების პირას მყოფი ვაზის ჯიშების ნაკვეთი.
„ყველა ქართული ჯიში არის ჩამოტანილი და აღდგენილი კომპანიის მხრიდან. გადავწყვიტეთ რომ მოგვეარა ბიოდინამიური მეთოდით. გაამართლა და კარგად ადაპტირდება. მაგალითად, ჭიმუტა, გრძელმტევანა- გადაშენების პირას იყო და აბსოლუტურად ამოღებული იყო ხმარებიდან კომუნიზმის პერიოდში. იწამლება მინიმალური სპილენძის დოზებით და დანარჩენი არის დამატებული ბალახის ნაყენები, რომელიც გამოიყენება მათ სამკურნალოდ“, _ განაცხადა ალადაშვილმა.
9 ჰექტარზე გაშენებული ტურისტული კომპლექსი ისტორიულ ადგილას მდებარეობს და ალექსანდე ჭავჭავაძის ეროვნულ პარკს ესაზღვრება. ჟურნალისტებმა ვიზიტის დროს დაათვალიერეს: საკოლექციო ვენახი, სადაც ვაზის 900-ზე მეტი ჯიშია დაცული, მათ შორის, გადაშენების პირას მყოფი რამდენიმე ათეული ქართული ვაზის ჯიში, ეთნოგრაფიულ სახლი, ვაზის და ღვინის მუზეუმი, რომლის უძველესი ექსპონატები 6000 წლით თარიღდება, ღვინის მარანი და ენოთეკა.
ტურისტულ კომპლექსში წარმოდგენილია ისეთი ცნობილი სკულპტორების ნამუშევრები როგორებიც არიან: მერაბ მერაბიშვილი, ზურაბ წერეთელი, გია ჯაფარიძე, გელა დურუჯელი, გია ხიზანიშვილი და სხვა.
მედიის წარმომადგენლებმა სხვადასხვა სადეგუსტაციო პაკეტებსა და კულინარიულ მასტერკლასებში – ქართული პურისა და ხაჭაპურის ცხობაში, ხინკლის მოხვევასა და ჩურჩხელის ამოვლებაშიც მიიღეს მონაწილეობა.
როგორც შეხვედრაზე ღვინის კომპანია შუმის გენერალურმა დირექტორმა, აკაკი ცოფურაშვილმა განაცხადა, ღვინის კომპანია „შუმი“ 1997 წელს დაარსდა, 2001 წელს დასრულდა ღვინის ქარხნის მშენებლობა და კომპანიამ პირველი მოსავალიც 2001 წელს მიიღო.
მანვე განმარტა, რომ კომპანიის სახელწოდება „შუმი“ ძველქართულად საუკეთესო ღვინოს ნიშნავს.
„პირველი ვენახი გავაშენეთ ნაფარეულში. აქ არის გადაღებული ერთ-ერთი სცენა ფილმიდან „სიყვარული ყველას უნდა“. დღეისთვის გვაქვს ნაფარეულის მიკროზონა, მუკუზანის მიკროზონა, ქინძმარაულის მიკროზონა, ახალშენის მიკროზონაში, ასევე რაჭაშიც გვაქვს პატარა ვენახი“,_ ამბობს ცოფურაშვილი.
კომპანია 2004 წლიდან აწარმოებს ბიოღვინოს, რომელიც სერთიფიცირებულია საერთაშორისო სტანდარტების შესაბამისად.
ცოფურაშვილის თქმით, „ღვინის კომპანია შუმი“ მსოფლიოს 29 ქვეყანაში ახორციელებს პროდუქციის ექსპორტს, დაჯილდოებულია 270-ზე მეტი უმაღლესი ხარისხის მედლით. კომპანიას აქვს ღვინის ფართო ასორტიმენტი, ყურძნისეული წარმოშობის მაგარი ალკოჰოლური და მათ შორის ექსკლუზიური სასმელები.
შუმი საქართველოში პირველი ღვინის კომპანიაა, რომელიც წარდგენილია ბიოდინამიკური ვენახის დემეტერის საერთაშორისო სტანდარტების მიხედვით სერტიფიცირებაზე.
ცოფურაშვილმა აღნიშნა, რომ პანდემიამ ადგილობრივ ბაზარს პრობლემები შეუქმნა, გარდა ამისა პრობლემები შეიქმნა ექსპორტის კუთხითაც.
„უფრო მეტი პრობლემები გვქონდა თავიდან ექსპორტის კუთხით ჩინეთში, პატარ-პატარა პრობლემები იყო ევროპაშიც. თუმცა, უკვე აღდგა მოძრაობა და რამდენიმე კონტეინერი უკვე გაგზავნილია. საკმაოდ დიდი მოთხოვნაა ამერიკის შეერთებულ შტატებშიც“,_ თქვა კომპანიის დირექტორმა.
