“გინდ აქ ყოფილხარ წვიმის დროს და გინდ მინდორში”

ოზურგეთის მუნიციპალიტეტში, სოფელ მერიაში არსებულ მუნიციპალურ საცხოვრებელ კორპუსში, რომელიც უსახლკაროთა თავშესაფრის სახელით არის ცნობილი, ხშირად საუბრობენ სხვადასხვა პრობლემაზე. უმეტესად კი, საუბარი ეხებოდა და ეხება საცხოვრებელი ფართის სავალალო მდგომარეობას, რასაც ადგილი აქვს ცუდი (წვიმიანი) ამინდების დროს. განსაკუთრებით, პირველი სადარბაზოს ყველა სართულს, რომელიც ღია აივნიანია და ქარიშხლის დროს განსაკუთრებით, ოთახები წყლით ივსება.

ამიტომ საცხოვრებელი კორპუსის მარცხენა მხარეს მდებარე, პირველი სადარბაზოს მცხოვრებნი მუდამ აპროტესტებენ წვიმის დროს საცხოვრებელი ოთახების დატბორვის ფაქტს.

ახლახან ჩვენ ვწერდით, რომ რედაქციას ეწვია აქ მცხოვრები 59 წლის ქალბატონი, მანანა გოგუაძე. მან თავისი განვლილი უმძიმესი ცხოვრების შესახებ გვიამბო. გვითხრა, რომ ეს ყველაფერი, ოღონდ სხვა ფორმით, დღემდე გრძელდება და რომ მის სახლში, როგორც გარეთ, ისე წვიმს, როცა ცუდი ამინდია.

“გურია ნიუსი” ეწვია ამ უსახლკაროთა თავშესაფარს.

ხუთსართულიანი საცხოვრებელი კორპუსი, რომელიც კომუნისტური მმართველობის დროს აქ არსებულ სამხედრო აეროდრომის დასახლებას ეკუთვნოდა, მოგვიანებით დაცარიელდა. მერე კი, მუნიციპალიტეტის ხელმძღვანელობამ აქ უსახლკარო ოჯახები განათავსა. აღსანიშნავია ,რომ კორპუსის ბინები, ექვსივე სადარბაზოს ჩათვლით გარემონტდა. აქ შეასახლეს ოჯახები დროებით სარგებლობის უფლებით, რომლებსაც საკუთარი სახლ-კარი არ გააჩნდათ.

საცხოვრებელი კორპუსის ყველა სადარბაზოს მცხოვრებლები აღნიშნავენ, რომ მეტ-ნაკლებად, წვიმიან ამინდში წყალი ბევრგან ჩამოდის.

_ ირიბად წამოსული წვიმა ბევრგან ატანს კედლებში, “სინკარებს” შორის, მაგრამ ის, რაც პირველ სადარბაზოში ხდება, ადგილზე უნდა ნახოთ. ეს მხარე სრულიად დაუცველია წვიმისგან. აქვს ღია აივნები და “ვედროთი” რომ შეასხა წყალი, ისეთი ვითარებაა, როცა ძლიერი წვიმაა. აი, ბატონო, მობრძანდით ჩემს სახლში და ნახეთ ჭერი და კედლები, საღორე გეგონება, _ გვითხრა აქ მცხოვრებმა ნინა ლევანიანმა.

ლევანიანი პირველი სადარბაზოს მეორე სართულზე ცხოვრობს. ოთახში, ჭერზე ადგილი არაა, დაზიანებული თუ ნესტისგან გაშავებული რომ არ იყოს. აივნებზე კი თითოეულ კედელს და კარს წვიმისა და ნესტში ყოფნის კვალი ყველა მონაკვეთზე ატყვია. ჩამონგრეულია კედლების არაერთი ადგილი.

საკანალიზაციო სისტემა არაა გამართული და ხშირად, როგორც ამბობენ, ფეკალური მასა სარდაფში ჩადის. შენობის სარდაფში, სადაც ასეთი საშინელი ანტისანიტარიაა, ხშირად ჩადიან ბავშვები და თამაშობენ.

კითხვაზე, რა უნდათ ბავშვებს ასეთ ჯანმრთელობისთვის საშიშ ადგილზე, როცა სხვა თუ არაფერი, საცხოვრებელი კორპუსის წინ მშვენიერი მინდორია, პასუხი არ აქვთ.

_ ცოდვას ვერ ვიტყვი. ხელისუფლებიდან არაერთხელ მოვიდნენ აქ. მოიტანეს შლანგები. კანალიზაციის მილები ჩააწყვეს. თუმცა, მაინც სულ დაზიანებულია. არ ვიცი, რატომ ფუჭდება. კი ხედავთ, რა მდგომარეობაა და როგორი სუნია. თუმცა, ახლა ყველაზე მეტად გვაწუხებს ბინაში წყლის შემოსვლა წვიმის დროს. ზამთარი მოდის. აწი ამინდები თანდათან გაუარესდება და რა უნდა ვქნათ? დახმარებას კი გვპირდებიან. განცხადებაც მივიტანეთ. თუმცა ჯერ არავინ მოსულა აქ, _ გვითხრა ნანა ლევანიანმა.

მანანა გოგუაძე, რომელიც რედაქციაში გვეწვია, გვაჩვენებს მისი ბინის კედლებს. აქ, ფაქტობრივად, ჭერის მდგომარეობა, როგორც სამზარეულოსა და აბაზანაში, ისე საძინებელ ოთახშიც, სავალალოა.

_ მე, თუკი ვინმე დამეხმარება და ამ მდგომარეობაში არ ვიქნები, არანაირ სხვა ფართს არ ვითხოვ, მაგრამ გააკეთებენ კი? ვფიქრობ, ეს შეუძლებელია, რადგან ამ მხარეს, კორპუსის მთელ სიმაღლეზე წყალი ისე შემოდის, ვერაფერი აკავებს. სამზარეულო ოთახიდან რომ წამოვა ნიაღვარი, ხან კარს ვაღებ და გარეთ, სადარბაზოში ვუშვებ წყალს. ამ სადარბაზოში ყველგან ასეა. იქითა სადარბაზოებში, კორპუსის შუაწელზე, ასეთი მდგომარეობა ნამდვილად არაა. ამიტომ იქ გადასვლა მინდა ისეთ ბინაში, სადაც არავინ ცხოვრობს. იძახიან ვიღაცეები გადმოდისო, მაგრამ ვინ გადმოდის? დაკეტილია სულ, _ ამბობს ის.

_ ამ დროისთვის არავინ ცხოვრობს, თუმცა, ნამდვილად გადმოდის აქ მრავალშვილიანი ოჯახი და არ შეიძლება ამ ბინაში ვინმე შევუშვათ, _ გვეუბნება მუნიციპალიტეტის მერის წარმომადგენელი სოფელ მერიაში.

მანანა გოგუაძე ამბობს, რომ მეორე სადარბაზოში, ოროთახიან ბინებში, ერთში ცოლი ცხოვრობს, მეორეში _ ქმარი.

_ ჩემთვის არ შეიძლება ორადგილიანში გადასვლა და ის შეიძლება, რომ ერთი ოჯახის ორი წევრი ცალ–ცალკე ცხოვრობდეს ოროთახიან ბინებში? ხომ გასაგებად ვამბობ? აგერ, აქ ხდება ეს, ამ კორპუსში, _ ამბობს ქალბატონი მანანა.

პირველ სადარბაზოში მცხოვრები კვაჭაძეების ოჯახის წარმომადგენლები ამბობენ, რომ მათი ბინა ერთი გამონაკლისია აქ, სადაც წყალი არ შედის.

_ ჩვენთან ნამდვილად არ შემოდის. ცოტათი ჟონავს. ამათთან რაც ხდება, საშინელებაა. მანანა გოგუაძის ბინის ზემოთ, მეოთხე სართულზე, აივანზე ცემენტის იატაკი დააგეს. ყველამ მოინდომა. იქნებ, შველებოდა, თუმცა, კვლავ ნიაღვარი შემოდის წვიმის დროს. ცოდვაა ადამიანია. არ შეიძლება ასე გაძლება. საერთოდ, მე თუ მკითხავს ვინმე, ამ სადარბაზოდან უნდა გაიყვანონ ყველა _ აქ ცხოვრება არ შეიძლება. წვიმის დროს, გინდ აქ ყოფილხარ და გინდა მინდორში. ნუ, ახალ მინდორში დარჩენილი ადამიანი უახლოეს ადგილზე ხეს მაინც ეძებს, რომ შეეფაროს. ასე თუ ვიმსჯელებთ, კი… გადაიწვიმებს ადამიანი, _ გვეუბნება ოჯახის დიასახლისი.

კითხვაზე, ნამდვილად არის თუ არა აქ უკეთესი ბინები თავისუფალი, ადგილობრივებმა გვითხრეს, რომ აქა-იქ არის.

_ აგერ, ვიღაც ტაქსისტი ცხოვრობს, მარტოა. ხანდახან მოდის. ქალაქში უნდა ცხოვრობდეს. ეს თავშესაფარი უსახლკაროებისაა. რა გამოდის? ვინც როგორ მოახერხებს და გამოუვა, ეგაა, _ კვლავ საყვედურს ამბობს მანანა გოგუაძე.

აქ მცხოვრები ხვიჩა შაინიძე გვეუბნება, რომ “როცა ცხრა წლის წინ აღნიშნულ ბინებში შემოვიდნენ საცხოვრებლად, მაშინაც ასე შემოდიოდა წყალი წვიმის დროს. პირველი სადარბაზოს ყველა სართულზე წვიმს ისე, როგორც გარეთ. სხვებთან შედარებით, იქ აუტანელი მდგომარეობაა. ამიტომ იქ მცხოვრებლებს ყველაზე მეტად უნდა დახმარება. ხუთივე სართულზე ერთნაირი მდგომარეობაა. აქეთა სადარბაზოების ბინებშიც ჟონავს წვიმის დროს წყალი, მაგრამ შედარებაც არ შეიძლება. ამიტომ რაღაც ღონისძიება უნდა გატარდეს“.

პირველი სადარბაზოს მცხოვრებლებს ჩვენ გადავეცით ოზურგეთის მუნიციპალიტეტის მერიის ჯანმრთელობის დაცვის და სოციალური სერვისების სამსახურის უფროსის, მაიზერ ცელაძის შეთავაზება ერთობლივი განცხადების დაწერის თაობაზე.

_ კი, კარგია, რომ ყველამ მოაწეროს განცხადებას ხელი, მაგრამ აქაც თავისებური ადამიანები ცხოვრობენ. ერთობას ხშირად ვერ ნახავ, _ ამბობს მანანა გოგუაძე.

“გურია ნიუსი” სოფელ მერიის ადმინისტრაციულ ერთეულში, მუნიციპალიტეტის მერის წარმომადგენელს ნანული ხურციძეს კვლავ ესაუბრა.

ქალბატონმა ნანულიმ გვითხრა, რომ აღნიშნულ სადარბაზოში წვიმის დროს მართლაც მძიმე ვითარებაა:

_ მუნიციპალიტეტის მერიაში განცხადება მიტანილი გვაქვს. მე დავეხმარები, რომ ერთობლივი განცხადება ისევ დაიწეროს და ყველამ მოაწეროს ხელი. ამ ეტაპზე კი თავისუფალი ბინა ამ კორპუსში არ არის და თავს ზემოთ ძალა არაა. თუ გამოთავისუფლდება აქ ან სხვაგან, აუცილებლად გადავიყვანთ, _ თქვა “გურია ნიუსთან” ნანული ხურციძემ.

საბოლოოდ, იმის თქმა შეიძლება, რომ ხუთსართულიან, თავშესაფრად წოდებული საცხოვრებელი კორპუსის პირველი სადარბაზო ბევრად უარეს მდგომარეობაშია, ვიდრე დანარჩენი. ვერავინ ამბობს, რომ ეს დაზიანების ბრალია, სადმე კედლებშია სივრცე და აქედან ხდება წვიმის წყლის შედინება თუ, ზოგადად, ეს მხარე მთლიანად დაზიანებულია დროთა განმავლობაში. ფაქტია, ადგილზე მისვლისას ვნახეთ უმძიმესი ვითარება. პირველი სადარბაზოს ხუთივე სართულზე წვიმის დროს ადამიანები ნახევრად ღია ცის ქვეშ მყოფის სიტუაციაში არიან. ამიტომ აუცილებელია, კონკრეტულად, ამ სადარბაზოს მცხოვრებთა დასახმარებლად ქმედითი ნაბიჯი გადადგას ხელისუფლებამ.