გუშინ სლოვაკურ სპორტულ მასმედიაში გავრცელდა ინფორმაცია რომ საქართველოს ნაკრებისა და ბელგიური „გენტის“ მოთამაშე გიორგი ჩაკვეტაძე კარიერას ბრატისლავის „სლოვანში“ გააგრძელებს.
ქართველი ფეხბურთელი „გენტის“ საკუთრებაა. სამწუხაროდ მეორე სეზონია კლუბის ძირითად შემადგენლობაში ვერ ხვდება. თავდაპირველად, რამდენიმე თვის განმავლობაში იჯარით გერმანულ „ჰამბურგში“ იასპარეზა, მომავალ სეზონში კი ასევე იჯარით „სლოვანში“ ითამაშებს.
„სლოვანს“ საქართველოს ნაკრების ყოფილი თავკაცი ვლადიმერ ვაისი ხელმძღვანელობს, გუნდში კი ჩაკვეტაძის თანამემამულეები კაშია და კანკავა ასპარეზობენ.
ცნობილი იყო რომ ქართველი ფეხბურთის სპეციალისტი თემურ ქეცბაია კვიპროსის ნაკრების თავკაცად დაინიშნა.
გუშინ ქართველი ახალ თანამდებობაზე ოფიციალურად წარადგინეს და მხარეებს შორის კონტრაქტი გაფორმდა, რომელიც ძალაში მსოფლიოს 2026 წლის ჩემპიონატის შესარჩევი ეტაპის ბოლომდე იქნება. ქართველი სპეციალისტის ასისტენტი ნაკრებში სოსო ჭედია იქნება.
54 წლის ქეცბაიამ კონტრაქტის გაფორმების შემდეგ კომენტარიც გააკეთა.
„მინდა, მადლობა გადავუხადო ყველა იმ ადამიანს, ვინც ეს შესაძლებლობა მომცა. პრეზიდენტს, მაგრამ ასევე იმ ხალხს, რომლებიც ფედერაციაში მუშაობენ. კვიპროსის ნაკრების მწვრთნელობა დიდი გამოწვევა და დიდი პასუხისმგებლობაა. იმედი მაქვს, რომ ყველა იმ მოლოდინს გავამართლებ, რომელიც ჩემს მიმართ არსებობს. მომდევნო ორ მატჩში ჩვენი მიზანი დადებითი შედეგის მიღწევაა, რათა თავიდან ავიცილოთ ჯგუფში ბოლო ადგილის დაკავება. იმედი მაქვს, რომ ხალხი ნაკრებს პატივს სცემს, მათ ეროვნული გუნდისგან ძალიან დიდი მოლოდინი აქვთ, მაგრამ ფეხბურთელებიც სტადიონზე ხალხის მოლოდინში არიან. არ შეიძლება კვიპროსული გუნდების თამაშზე 10-15 ათასი გულშემატკივარი მიდიოდეს სტადიონზე და ეროვნულმა ნაკრებმა 8-ათასიანი სტადიონის ტრიბუნები ვერ გაავსოს. ვიმედოვნებთ, რომ ეს შეიცვლება. ყველაფერს გავაკეთებთ, რომ გამარჯვებები მოვიპოვოთ და მთელი ერი გავახაროთ“.
კვიპროსის ნაკრებმა ივნისში ერთა ლიგის C დივიზიონში წარუმატებლად ითამაშა და 4 ტურში მხოლოდ 2 ქულა მოიპოვა (ორი ფრე ჩრდილოეთ ირლანდიასთან, წაგებები კოსოვოსა და საბერძნეთთან). ქეცბაიას დებიუტი კვიპროსის ნაკრებში სექტემბერში შედგება საბერძნეთის ნაკრებთან, შემდეგ კი კვიპროსელები კოსოვოს დაუპირისპირდებიან.
თემურ ქეცბაიას დანიშვნას გუშინ სოციალურ ქსელში შოთა არველაძე გამოეხმაურა და ახალ პოსტზე წარმატებები უსურვა:
„ქეცბა გილოცავ! ძალიან გამახარე და აბა შენ იცი, წარმატებები კვიპროსის ნაკრებთან ერთად! გვჯერა შენი და გგულშემატკივრობ“.
გუშინ იტალიურ სპორტულ მასმედიაში გავრცელდა ცნობა რომ რომელუ ლუკაკუ ქალაქ მილანში ჩაფრინდა და სულ მალე ოფიციალურად „ინტერის“ ფეხბურთელი გახდება.
კლუბის ოფიციალურმა ვებ-გვერდმა დაადასტურა, რომ ბელგიელი თავდამსხმელი „ინტერში“ დაბრუნდა და 1 წლის განმავლობაში კვლავ მათთვის შეუტევს.
ბრიტანული პრესის მტკიცებით, ლუკაკუს განათხოვრების სანაცვლოდ „ჩელსი“ 8 მილიონ ევროს მიიღებს და „ინტერი“ ბელგიელი ფეხბურთელის ხელფასის ნაწილსაც დაფარავს. ამასთან, თუ რომელუმ მაღალ დონეზე იასპარეზა, ლონდონელები ბონუსებს მიიღებენ.
ბელგიელი თავდამსხმელი გასული წლის ზაფხულის სატრანსფერო ფანჯრის დროს „ჩელსიმ“ „ინტერიდან“ 115 მილიონი ევროს სანაცვლოდ იყიდა, თუმცა ახალ გუნდს ვერ შეეგუა და უკან დაბრუნება ითხოვა. გასული სეზონის განმავლობაში, ლუკაკუმ „ჩელსის“ მაისური ყველა ტურნირზე ერთად 44-ჯერ მოირგო, 15 გოლი გაიტანა და 2 საგოლე გადაცემა შეასრულა.
რობერტ ლევანდოვსკის მომავალი კი ჯერჯერობით უცნობია. გუშინ „ბაიერნის“ ყოფილმა აღმასრულებელმა დირექტორმა ული ჰიონესმა შემდეგი მოსაზრება დააფიქსირა:
„ლევანდოვსკის „ბაიერნის“ კარის გაჯახუნება და „ბარსელონაში“ გადასვლა სურს, თუმცა მან უნდა გაითვალისწინოს, რომ კლუბთან კიდევ 1-წლიანი კონტრაქტი აკავშირებს და ტრანსფერისთვის თანხმობა სჭირდება. „ბაიერნი“ კი თავისი საუკეთესო ფეხბურთელის გაშვებას არ დაუშვებს.
ამ საკითხთან დაკავშირებით ოლივერ კანს შედარებით რბილი პოზიცია აქვს და მოლაპარაკებისთვის მზად არის, თუმცა გასათვალისწინებელია რამდენიმე ფაქტორი. რამდენად სრულფასოვნად მოხდება პოლონელის ჩანაცვლება და რეალურად არის თუ არა სატრანსფერო ბაზარზე ისეთი ფეხბურთელი, რომელიც ლევანდოვსკის წასვლით დატოვებულ სიცარიელეს შეავსებს. „ბაიერნის“ შიდა სამზარეულოში რა ხდება ახლა არ ვიცი, მაგრამ, როგორც ჩემთვის გახდა ცნობილი კლუბი მის გაშვებას არ აპირებს. „ბარსელონას“ კი ახალი შეთავაზების გადარჩენა შეუძლია. ამას აზრი არ აქვს.. ვიმეორებ, გუნდში თვლიან, რომ რობერტმა კონტრაქტი ბოლომდე უნდა შეასრულოს“.
კატალონიის „ბარსელონა“ 33 წლის თავდამსხმელის სანაცვლოდ 50 მილიონ ევროს ითხოვს და თავად ფეხბურთელი გუნდის შეცვლისთვის მზად არის, მაგრამ „ბაიერნში“ სხვანაირად ფიქრობენ.
ავტორი
