გიორგი (გაგლო) გაგლოშვილი _ 29 წლის ახალგაზრდა თბილისიდან, მხატვარ-ანიმატორი, ილუსტრატორი, პერსონაჟის დიზაინერი.
გიორგიმ 13 წლის ასაკში დაიწყო ხატვა და ინტერნეტის დახმარებით, დამოუკიდებლად ისწავლა ანიმაციების გაკეთება, შემდეგ დაიწყო კომიქსების სცენარების წერა და ხატვა. მის ფეისბუქგვერდზე გამოქვეყნებულია 16-მდე ანიმაცია, ის, ასევე, მუშაობს შეკვეთებზე და 100-მდე ანიმაცია აქვს გაკეთებული.
„საქართველოში სრულყოფილად ვერსად ვერ ისწავლი ანიმაციას. არის განხრა სამხატვრო აკადემიაში _ მედიახლოვნება, მაგრამ ვერ ვიტყვი, რომ სწავლების დონე მაღალია“, _ აღნიშნავს გაგლო.
მიზანდასახული, ზარმაცი, გულჩვილი _ ასე ახასიათებს გაგლო საკუთარ თავს. მისი თქმით ანიმაციაზე მუშაობა მისი ცხოვრებაა.
ამ ეტაპზე მუშაობს „შოთა, ილია, აკაკი, ვაჟა და გალაკტიონის“ პროექტზე
„მიმაჩნია, რომ ეს ჩემი ყველაზე გამორჩეული პროექტია, რომელიც დაიწყო უბრალოდ პოსტერის დახატვის იდეით. ანუ იქნებოდა ჩვეულებრივი პოსტერი, რომელზეც გამოსახულნი იქნებოდნენ შოთა, ილია, აკაკი, ვაჟა და გალაკტიონი.
ხატვის პროცესში დამებადა იდეა, რომ პროექტი სერიად გამეკეთებინა და ნაწილ-ნაწილ დამედო, მათ ილუსტრაციასთან ერთად დამეწერა მათივე ნაწარმოებები“, _ ამბობს გაგლო.
ამ დროისთვის დარჩენილია ბოლო ნაწილი „გალაკტიონი“ , რომელიც, როგორც ანიმატორი ამბობს, მალე დაიდება ინტერნეტსივრცეში და შემდეგ კი ყველას ერთ პოსტერში შესთავაზებს მაყურებელს.
_ როდის გაჩნდა პირველი ანიმაციის შექმნის იდეა და რომელია ეს ანიმაცია?
_ ამ მიმართულებით პირველი ანიმაცია იყო „სტუმარ-მასპინძელი“, რომლის გაკეთების იდეაც მომივიდა „სტუმარ-მასპინძლის“ კომიქსზე მუშაობის დროს.
_ რა არის თქვენთვის ყველაზე მნიშვნელოვანი ახალი ანიმაციის შექმნისას?
_ ჯამში, ყველაფერი მნიშვნელოვანია, რომ მთლიანობაში კარგი პროდუქტი გამოვიდეს. მაგრამ საბოლოოდ მაინც ყველაზე მნიშვნელოვანია სახის მიმიკები და ლექსის კითხვა.
_ რა არის თქვენი ანიმაციის მიზანი? რა უნდა მიიტანოს მან მაყურებლამდე?
_ ამ კონკრეტული სერიის მიზანია რომ ახლებური სახით შესთავაზოს მაყურებელს ის მემკვიდრეობა, რაც გვაქვს _ ვგულისხმობ ლიტერატურას და პოეზიას.
_ როგორია თქვენი ანიმაციის შექმნის თანმიმდევრობა?
_ დღემდე რა ანიმაციაც გავაკეთე, გავაკეთე უკვე არსებულ ჩანაწერზე. მაგალითად youtube-ზე მოვისმინე ვაჟას ერთ- ერთი ლექსი, უბრალოდ აუდიო, რომელზეც ფოტო იდო. კითხვის ეს მანერა იმდენად მომეწონა, რომ დამებადა ამავე აუდიოზე ანიმაციის გაკეთების იდეა.
_ ანიმაცია “სტუმარ-მასპინძელი” სამი ნაწილისგან შედგება. რა დრო დაგჭირდათ მის შესაქმნელად და რამდენად კმაყოფილი ხართ შედეგით?
_ პირველი ნაწილი სპონტანურად გავაკეთე და ჩემდა გასაკვირად, დიდი გამოხმაურება მოჰყვა _ ხალხი კომენტარებში ითხოვდა მეორე ნაწილს. დაახლოებით 3 თვეში გავაკეთე მეორე ნაწილი, რომლის შექმნისას ბოლო დღეებში ძალიან ვიჩქარე და მთლად ისეთი კარგი არ გამოვიდა, როგორსაც დღეს ვისურვებდი. მეორე ნაწილი არის 6 წუთზე მეტი და მოლოდინი მქონდა, რომ უფრო მეტი გამოხმაურება ექნებოდა, მაგრამ პირველ ანიმაციაზე ორჯერ ნაკლები გამოხმაურება მოჰყვა. დღემდე არ ვიცი, რატომ.
_ სასწავლო პროცესის დროს პედაგოგები ხშირად იყენებენ თქვენს ანიმაციებს. ეს ხომ არ იყო ანიმაციების სერიის წამოწყების მიზეზი?
_ დიახ, რამდენიმე მსგავსი შემთხვევა დაფიქსირდა უკვე, რაც ძალიან მახარებს, თუმცა, ანიმაციების სერიის დაწყების ძირითადი მიზეზი ეს არ გამხდარა. ამ სერიის გაგრძელების მთავარი მიზეზი არის ის, რომ ასეთი უცხო და უჩვეულო ფორმით პოეზია და ლიტერატურა დღემდე არ არსებობდა. ვინაიდან და რადგანაც ეს ნიშა პირველმა ვიპოვე, აუცილებლად გავაგრძელებ და არ მივატოვე შუა გზაში.
_ რომელია თქვენი საყვარელი ანიმაცია?
_ არის რამდენიმე _ backwater ghospel, paranorman, song of the sea, Frankenweenie და სხვა.
_ რამდენად შეაფერხა თქვენი საქმიანობა პანდემიამ?
_ პირიქით _ იმატა საქმემ და სახლიდან ვაკეთებ ანიმაციის შეკვეთებს. თვითონ კორონავირუსზეც 2 ანიმაცია გავაკეთე 2020 წელს. ერთ-ერთი მიდევს კიდეც გვერდზე.
_ რა სამომავლო გეგმები გაქვთ?
_ სამომავლოდ მაქვს რამდენიმე ახალი პროექტი და იდეა. რომლის განხორციელებაც ადრეულ გაზაფხულზე მინდა, სადღაც მარტი-აპრილში. გვერდზე ვაპირებ ანიმაციური რუბრიკის დამატებას _ ტელე-პოეზია. თუ რას ნიშნავს ტელე პოეზია და რატომ „ტელე“, ამას საიდუმლოდ დავტოვებ. ასევე, დაწყებული მაქვს მუშაობა ვაჟა-ფშაველას მომდევნო ანიმაციაზე, რომელიც სტილისტურად იქნება წინა ანიმაციებისგან სრულიად განსხვავებული და ფერადი. გარდა ამისა ვაპირებ ერთ ძველ ქართულ სიმღერაზე ანიმაციური კლიპის გაკეთებას. მინიშნებას ვიტყვი,რომ მომღერალი არის ქალი, რეალური პიროვნება.
