გუშინ, ცნობილი გახდა რომ „ვალენსიას“ მთავარი მწვრთნელი ჯენარო გატუზო გაათავისუფლეს. ხელშეკრულება მხარეებმა ურთიერთშეთანხმებით გაწყვიტეს. კლუბმა იტალიელ სპეციალისტს გაწეული სამუშაოსთვის მადლობა გადაუხადა.
„ვალენსიამ“ ესპანეთის „ლა ლიგაში“ ბოლო ათი მატჩიდან ერთი გამარჯვება მოიპოვა და გასავარდნ ზონას მხოლოდ ერთადერთი ქულითაა დაცილებული.
„ვალიადოლიდთან“ მარცხი ჯენარო გატუზოსთვის „ვალენსიას“ მთავარი მწვრთნელის თანამდებობაზე ბოლო აღმოჩნდა. კლუბის ხელმძღვანელობამ და იტალიელმა სპეციალისტმა ერთობლივად გადაწყვიტეს, რომ ხელშეკრულება უნდა გაწყდეს.
„ვალენსია“ სავარჯიშოდ უკვე დროებითმა თავკაცმა ვორო გონსალესმა გაიყვანა.
45 წლის ჯენარო გატუზომ „ვალენსია“ 2022 წლის 9 ივნისს ჩაიბარა. თავის დროზე გატუზოს წარმატებული საფეხბურთო კარიერა ჰქონდა, რომელიც ძირითადად „მილანში“ გაატარა, ის იტალიის ნაკრებშიც ერთ-ერთი ლიდერი იყო, თუმცა სამწვრთნელო კარიერა აშკარად ვერ ააწყო. ერთადერთი ტიტული, რომელიც მან მწვრთნელობისას მოიპოვა „ნაპოლის“ უკავშირდება – იტალიის თასი. გატუზო 2013 წლიდან „სიონს“, „პალერმოს“, „ოფი“-ს, „მილანს“, „ნაპოლისა“ და „ვალენსიას“ წვრთნიდა.
გიორგი მამარდაშვილი ჯენარო გატუზოს „ვალენსიადან“ გათავისუფლებას გამოეხმაურა. ქართველმა მეკარემ იტალიელ მწვრთნელს მადლობა გადაუხადა და წარმატებები უსურვა.
„მადლობა ყველაფრისთვის და წარმატებები მისტერ! ყველაფერ საუკეთესოს გისურვებ“, – დაწერა სოციალურ ქსელში მამარდაშვილმა.
გუშინ, “ლივერპულის” ყოფილმა ნახევარმცველმა დონ ჰაჩინსონმა “ნაპოლის” შესახებ ისაუბრა და ქართველი თავდამსხმელი ხვიჩა კვარაცხელია განსაკუთრებით გამოარჩია.
„კვარაცხელია საუკუნის აღმოჩენაა, უბრალოდ დაუჯერებელი ფეხბურთელია. რაც შეეხება ვიქტორ ოსიმენს, მუდამ მზადაა გოლები გაიტანოს, თანაგუნდელებისთვის ყოველთვის ხელმისაწვდომია“. – განაცხადა დონ ჰაჩინსონმა.
გუშინ, ცნობილი გახდა რომ „პსჟ“-ის ესპანელმა მცველმა, სერხიო რამოსმა, შესაძლოა, კარიერა საუდის არაბეთში გააგრძელოს.
36 წლის ესპანელს პარიზულ კლუბთან კონტრაქტი ამ ზაფხულს ეწურება და მისი მომავალი მიუნხენის „ბაიერნთან“ ჩემპიონთა ლიგის მერვედფინალური მატჩების შემდეგ გადაწყდება.
თუ რამოსი წავა, ის შესაძლოა, საუდურ „ალ-ნასრში,“ გადავიდეს, სადაც მადრიდის „რეალში“ მისი ყოფილი პარტნიორი, კრიშტიანუ რონალდუ თამაშობს.
ცნობილი გახდა, რომ საერთაშორისო ოლიმპიური კომიტეტის განზრახვას, რომელიც რუსი და ბელარუსი სპორტსმენების საერთაშორისო შეჯიბრებებში დაშვებას განიხილავს, რუსეთთან ომში ჩაბმული უკრაინისა და მისი მხარდამჭერების უკმაყოფილება გამოიწვია.
უკრაინელებს მხარდაჭერა გამოუცხადა პოლონეთმა. ქვეყნის სპორტის მინისტრის კამილ ბორტნიჩუკის აზრით, ოლიმპიადაზე რუსების დაშვება წარმოუდგენელია:
„მსგავსი სცენარის წარმოდგენაც კი მიჭირს. პოლონეთი და დიდი ბრიტანეთი საერთაშორისო კოალიციის შექმნას აპირებენ, რომელიც მომავალი წლის ოლიმპიურ თამაშებში რუსეთისა და ბელარუსის დაშვებას შეეწინააღმდეგება“. – განაცხადა კამილ ბორტნიჩუკმა.
იმისათვის, რათა საერთაშორისო ოლიმპიურ კომიტეტს განზრახვაზე ხელი ააღებინონ, უკრაინის მოკავშირე სახელმწიფოები ფართო კოალიციის შექმნას აპირებენ. ასეთ შემთხვევაში, თამაშების ორგანიზება შეუძლებელი გახდება.
უკრაინას მხარდაჭერა უკვე გამოუცხადა ესტონეთის პრემიერმა კაია კალასმაც:
„იმედგაცრუებული ვარ სოკ-ის ჩანაფიქრით, დაუშვას რუსეთისა და ბელარუსის სპორტსმენები პარიზში, 2024 წლის ოლიმპიურ თამაშებში. ეს პოლიტიკურად და მორალურად არასწორია. დროა, გავაძლიეროთ იზოლაცია და არა – დათმობებზე წავიდეთ რუსეთთან. სპორტი რუსეთის პროპაგანდისტული მანქანისთვის ერთ-ერთი ინსტრუმენტია. ამის იგნორირება აგრესიის მხარდაჭერას ნიშნავს“, – დაწერა კაია კალასმა.
ასევე, გუშინ ცნობილი გახდა რომ პოლონეთთან ერთად, 40 სახელმწიფოა მზად, საერთაშორისო ოლიმპიურ კომიტეტს ულტიმატუმი წაუყენოს, რათა პარიზში რუსი და ბელარუსი სპორტსმენები არ დაუშვან.
მას მერე, რაც რუსული სპორტი უკრაინაში ომის გამო თითქმის სრულ იზოლაციაშია, რუსები კონტინენტის გამოცვლაზე დაფიქრდნენ – ევროპიდან აზიაში გადასვლაზე.
უახლოეს მომავალში პირველი პრეცედენტი ჭადრაკში დაფიქსირდება. ევროპული ჭადრაკის კავშირმა განცხადება გამოაქვეყნა, სადაც ნათქვამია, რომ 2023 წლის 24 თებერვლიდან რუსეთის ჭადრაკის ფედერაციის მისი რიგებიდან გასვლას ელის.
რუსეთის ჭადრაკის ფედერაციის პრეზიდენტი ანდრეი ფილატოვი ამტკიცებს, რომ ეს გადასვლა აზიის ჭადრაკის ფედერაციის ასამბლეაზე, 26 თებერვლიდან 3 მარტამდე გაფორმდება.
ავტორი
