საქართველოს ეროვნული გუნდისა და ფრანგული „მეცის“ თავდამსხმელი გიორგი მიქაუტაძე შესანიშნავ სეზონს ატარებს. მისი კლუბი საფრანგეთის უმაღლეს დივიზიონში გადასასვლელად წარმატებით იბრძვის და თუ საწადელს მიაღწია, ამაში მიქაუტაძის წვლილი უდიდესი იქნება.
ხვიჩა კვარაცხელიას წარმატებული ასპარეზობის შემდეგ იტალიაში ქართული ფეხბურთის მიმართ ყურადღება გაიზარდა. ფეხბურთის სპეციალისტების მტკიცებით, მომავალ სეზონში მიქაუტაძეს აუცილებლად რომელიმე იტალიურ გუნდში ვიხილავთ.
გუშინ „მეცის“ თავდამსხმელს გამოცემამ „Calciomercato“ სპეციალური წერილი მიუძღვნა:
„არსებობს საქართველო, რომლის საფეხბურთო მოძრაობა საგრძნობლად იზრდება და რომლის ვარსკვლავი ცალსახად „ნაპოლის“ ვარსკვლავია. საფრანგეთში კი არის „მეცის“ 22 წლის თავდამსხმელი გიორგი მიქაუტაძე, რომელმაც „ლიგა 2“-ში 31 თამაშში 19 გოლის გატანა მოახერხა და გუნდს „ლიგა 1“-ში აღზევებისკენ მიუძღვება. მან შესანიშნავი თამაში ჩაატარა მისი თანამემამულის, დავითაშვილის „ბორდოსთან“, რომელიც თავის მხრივ, კვარაცხელიასთან ერთად თბილისის „დინამოში“, ყაზანის „რუბინსა“ და ბათუმის „დინამოში“ თამაშობდა.
მათგან განსხვავებით მიქაუტაძე არ დაბადებულა და არ გაზრდილა თავისი მშობლების ქვეყანაში, არამედ დაიბადა ლიონში, კარიმ ბენზემას, ალექსანდერ ლაკაზეტისა და ამინე გუირის ქალაქში, სადაც პირველი ნაბიჯები აკადემიაში გადადგა.
„ძალიან დაბალი ხარ“ – უთხრეს მას და „მეცის“ საფეხბურთო სკოლაში გადავიდა, სადაც საფრანგეთის ჩემპიონატში დებიუტიც ჰქონდა. შემდეგ იყო ბელგიაში ორწლიანი პერიოდი „სერენის“ მაისურით. სწორედ იქ, მეორე დივიზიონიდან დაწყებული იუპილერ ლიგამდე, იკურთხა მიქაუტაძე, რომელმაც ორ სეზონში 36 გოლი გაიტანა და კიდევ ერთხელ მიიღო შანსი იმ კლუბში, სადაც მისი კარიერა დაიწყო, ისევე როგორც მირალემ პიანიჩის და სადიო მანეს.
მიქაუტაძის ამჟამინდელმა ასპარეზობამ მის მიმართ რამდენიმე უცხოური კლუბის, მათ შორის იტალიურის, ინტერესი გამოიწვია. კიდევ ერთი კვარა სერია A-ში? რატომაც არა?!“ – დაწერა გამოცემამ.
საბოლოოდ გაირკვა, რომ „ნაპოლისა“ და „სალერნიტანას“ მატჩი 24 საათით გვიან გაიმართება, ვიდრე აქამდე დაგეგმილი იყო. სპორტული ღონისძიებების უსაფრთხოების კომიტეტმა გადაწყვიტა, რომ მატჩი 29 აპრილის მაგივრად, 30 აპრილს გაიმართოს, თბილისის დროით 17:00 საათზე.
„ნაპოლი“ შეიძლება ამ ტურში ჩემპიონი გახდეს, თავის მატჩს თუ მოიგებს, ხოლო „ლაციო“ სტუმრად „ინტერს“ ვერ დაამარცხებს. კალენდრის მიხედვით, ჯერ „ნაპოლის“ უნდა ეთამაშა, მერე კი „ლაციოს“, მაგრამ ახლა პირიქით იქნება: ჯერ რომაული გუნდი ითამაშებს მილანში, ამ მატჩის დასრულებიდან ნახევარ საათში კი „ნაპოლის“ შეხვედრა დაიწყება.
„ნაპოლის“ პრეზიდენტმა აურელიო დე ლაურენტისმა ნეაპოლში მოსალოდნელ საჩემპიონო ზეიმზე უკვე ისაუბრა:
„მახსოვს, რომ საზეიმო ადრეც გვქონდა, იტალიის თასის და სუპერთასის მოგება, სერია A-ში აღზევება. ეს არის ქალაქი, რომელსაც უყვარს ზეიმი, მაგრამ ეს სრულიად უსაფრთხოდ უნდა გავაკეთოთ. ღია ავტობუსი? ჯერ არაფერი გადაგვიწყვეტია, ველოდებით Lega-ს და შინაგან საქმეთა სამინისტროს გადაწყვეტილებას. ველოდებით სერია A-ს განრიგს, რადგან ეს მათ კომპეტენციაშია, ჩვენზე არ არის დამოკიდებული. ჯერ კიდევ არ ვიცით დეტალები და რა შეიძლება გაკეთდეს. ნეაპოლის მერმა მითხრა, რომ კვირა და ორშაბათი იქნება ყველაზე დატვირთული ორი დღე. ქალაქში საცობებია და გვინდა ქაოსი თავიდან ავიცილოთ. ვგეგმავ, რომ ზეიმი უნდა დაიწყოს და დასრულდეს „სტადიო მარადონაზე“, – განაცხადა დე ლაურენტისმა.
„ნაპოლის“ ფეხბურთელმა ელიფ ელმასმა განაცხადა, რომ იტალიის ჩემპიონობას ვერასდროს იფიქრებდა.
„ბედნიერები ვართ, რომ „იუვენტუსი“ სტუმრად დავამარცხეთ. ვიცით, რა რთულია იქ გამარჯვება და რა მნიშვნელოვანი იყო ეს სამი ქულა ჩვენთვის. ბედნიერი ვარ, რომ წვლილი შევიტანე გუნდის გამარჯვებაში. ნეაპოლში ასეთ დახვედრას არ ველოდებოდი, ძალიან აღელვებული ვიყავი და წარმომიდგენია, რა მოხდება, როცა ჩემპიონები გავხდებით.
„სალერნიტანასთან“ რთული თამაში იქნება, ისინი ყველაფერს გააკეთებენ, რომ ვერ მოვიგოთ. არ მაინტერესებს, როდის ჩატარდება ეს მატჩი, „ინტერი“ – „ლაციომდე“ თუ შემდეგ, ჩვენ მხოლოდ მოსაგებად გავალთ მოედანზე, არც იმას აქვს მნიშვნელობა ლამაზად ვითამაშებთ თუ არა, მთავარია მოვიგოთ.
რასპადორისთან ხშირად ვხუმრობ. ფსონი დავდეთ, მან საგოლე პასის შემთხვევაში 500 ევრო უნდა მომცეს, ტურინში საგოლე პასი გავუკეთე და ახლა ველოდები 500 ევროს. სკუდეტო? ვერასდროს წარმოვიდგენდი, რომ ასეთ მნიშვნელოვან ტიტულს მოიგებდი და გვინდა ბოლომდე დავტკბეთ ამ შედეგით“, – განაცხადა ელიფ ელმასმა.
ვიქტორ ოსიმენის აგენტმა რობერტო კალენდამ კი განაცხადა, რომ ბოლო დროს გავრცელებული სატრანსფერო ხმები სიმართლეს არ შეესაბამება.
„ყველაფერი, რაც ვიქტორის ტრანსფერზე ითქვა, სიცრუეა. სატრანსფერო ბაზარზე საუბარი ჯერ ნაადრევია. ბევრი ცდილობს სიტუაციის დესტაბილიზაციას, მაგრამ ამ ეტაპზე არაფერია, არანაირი შეთანხმება არ არსებობს“, – განაცხადა რობერტო კალენდამ.
ვიქტორ ოსიმენს აქტიურად „ბაიერნსა“ და „პსჟ“-ს უკავშირებენ. ასევე დაინტერესებული არიან „ჩელსი“ და „მანჩესტერ იუნაიტედი“.
ავტორი
