გუშინ, ბელგიურმა სპორტულმა მედიამ გაავრცელა ცნობა რომ საქართველოს ეროვნული გუნდისა და ფრანგული “მეცის” თავდამსხმელი გიორგი მიქაუტაძე ოფიციალურად ბელგიური “სერენის” რიგებში ჩაირიცხა.
თემას ბელგიური გუნდიც გამოეხმაურა _ “უკვე ოფიციალურია, “მეცმა” კვლავ ჩვენთან გამოუშვა ჩვენი გოლეადორი! კეთილი იყოს შენი დაბრუნება ჟორჟ!” _ დაწერა “სერენმა” ოფიციალურ ტვიტერზე.
გასულ სეზონში მიქაუტაძე ამ კლუბის ღირსებას იცავდა და ბელგიის უმაღლეს ლიგაში მის აღზევებაში უმთავრესი როლი შეასრულა.
ესპანური “ვალენსიას” კარის დარაჯი გიორგი მამარდაშვილი კიდევ ერთხელ გამოარჩიეს _ გამოცემამ “Whoscored.com” ქართველი ევროპის საფეხბურთო ლიგებში საუკეთესო ახალგაზრდა მეკარედ დაასახელა.
საქართველოს ნაკრებისა და “ჰათაისფორის” ნახევარმცველი საბა ლობჟანიძე თურქეთის სუპერლიგის მესამე ტურის სიმბოლურში მოხვდა. ლობჟანიძემ მესამე ტურში “ალანიასფორთან” გოლი და საგოლე პასი მიითვალა. აღსანიშნავია, რომ ქართველმა მიმდინარე სეზონში სამივე ტურში შეძლო თავის გამოჩენა და ბომბარდირთა დავასაც 3 გოლით ლიდერობს. საბა ლობჟანიძე “ჰათაისპორს” მიმდინარე ზაფხულს “ანკარაგიუჯუდან” შეუერთდა.
ბერძნული და კვიპროსული მედიის ცნობით, თემურ ქეცბაიას “ანორთოსისმა” ბერძნული “პაოკიდან” ნიკა ნინუა დაიმატა. ნინუა თემურ ქეცბაიას გუნდს ერთწლიანი იჯარით შეუერთდება და მალე ტრანსფერი ოფიციალურად დადასტურდება. შედეგად, კვიპროსულ გუნდში ქართული ლეგიონის რაოდენობა სამამდე გაიზრდება. ნიკა ნინუა “პაოკ”-ს ერთი წლის წინ შეუერთდა და ბერძნულ გუნდში 12 მატჩში 2 გოლი გაიტანა. თუმცა, სათამაშო პრაქტიკას მოკლებული იყო.
საბოლოოდ გადაწყდა რომ კილიან მბაპე კარიერას მადრიდის “რეალში” ჯერ ვერ გააგრძელებს. “RMC Sport”-ის მტკიცებით, ესპანურმა კლუბმა მოლაპარაკებების შეწყვეტა მას შემდეგ გადაწყვიტა, რაც “პსჟ”-სგან შეთავაზებაზე (170 მილიონი და პლუს 10 მილიონის ბონუსი) პასუხი ვერ მიიღო. “Sky Sports”-ის ცნობით, “რეალმა” ახალი გეგმა შეიმუშავა და ფრანგი შემტევის ხელში ჩაგდებას უფასოდ მომდევნო წელს ეცდება, რადგან კილიანს კონტრაქტი 10 თვეში ეწურება და მის განახლებაზე ამ დრომდე უარს ამბობს. მადრიდელებმა შესაძლოა იანვარში სცადონ მბაპესთან წინასწარი კონტრაქტის გაფორმება.
ამასობაში “მანჩესტერ იუნაუტედმა” კრიშტიანუ რონალდუს ტრანსფერი ოფიციალურად დაადასტურა. “VIVA RONALDO. Cristiano is back!” _ ამ სიტყვებით შეხვდა ინგლისური გუნდის ვებგვერდი რონალდოს მანჩესტერში დაბრუნებას. პორტუგალიელი “იუნაიტედთან” 2-წლიან კონტრაქტს აფორმებს. მხარეებს ხელშეკრულების კიდევ ერთი წლით გაგრძელება შეეძლებათ.
“მანჩესტერ იუნაიტედი” არის გუნდი, რომელსაც ჩემს გულში ყოველთვის განსაკუთრებული ადგილი ეკავა და ძალიან შთამბეჭდავი იყო ყველა ის შეტყობინება, რაც ტრანსფერის გამოცხადების შემდეგ მივიღე. მოუთმენლად ველი იმ მომენტს, როცა ხალხით სავსე “ოლდ ტრაფორდზე” ისევ ვითამაშებ. მიხარია, რომ სანაკრებო პაუზის შემდეგ გუნდთან ერთად ვიქნები. ჩვენს გუნდს ძალიან წარმატებულ სეზონს ვუსურვებ”, _ განაცხადა თავად კრიშტიანუ რონალდუმ.
“კრიშტიანუს დასახასიათებლად სიტყვები არ არსებობს. ის არა მხოლოდ ფანტასტიკური ფეხბურთელი, არამედ დიდებული ადამიანიცაა. ეჭვი არ მეპარება, რომ ყველაზე ისევ დიდ შთაბეჭდილებას მოახდენს და მისი გამოცდილება ჩვენი ახალგაზრდა ფეხბურთელებისთვის გადამწყვეტი მნიშვნელობის იქნება. რონალდოს დაბრუნება ადასტურებს ამ კლუბის განუმეორებელ მიმზიდველობას და ძალიან მიხარია, რომ კრიშტიანო ბრუნდება იქ, სადაც ყველაფერი დაიწყო”, _ ეს მანჩესტერული გუნდის მთავარი მწვრთნელი ოლე გუნარ სულშერის სიტყვებია.
ცნობილი გახდა ის უმთავრესი მიზეზი, რის გამოც “მანჩესტერ სიტიმ” რონალდუს აყვანა გადაიფიქრა. ამისი თავი და ბოლო ამ გუნდის თავკაცი პეპ გვარდიოლა ყოფილა. გამოცემამ “Lа Rерuвliса” გაარკვია, რომ რონალდოს ტრანსფერი “სიტიში” ფეხბურთელსა და მთავარ მწვრთნელ პეპ გვარდიოლას შორის სატელეფონო საუბრის შემდეგ ჩაიშალა. როგორც წყარომ გაარკვია, გვარდიოლას მკაფიოდ აუხსნია 36 წლის პორტუგალიელისთვის, რომ არ არის ჩამოყალიბებული, ზუსტად რომელ პოზიციაზე აპირებდა მის გამოყენებას, უფრო მეტიც _ პეპს რონალდოსთვის არც ძირითად შემადგენლობაში თამაშის მყარი გარანტია მიუცია.
ბოლოს კი კალათბურთი. საქართველოს კალათბურთელთა ნაკრები მეორედ ჩაერთვება მსოფლიოს თასის შესარჩევ ეტაპზე. პირველად ჩვენს გუნდს ფინალურ ეტაპზე გასვლის მცდელობა 2019 წელს ჰქონდა, მაგრამ მიზანს ვერ მიაღწია. ამჯერად მსოფლიოს 2023 წლის ჩემპიონატის საგზურის მოპოვებას ეცდება.
გუშინ ამ ასპარეზობის კენჭისყრა გაიმართა. საქართველოს ეროვნული გუნდის მეტოქეები ქვეჯგუფში ესპანეთი, უკრაინა და ჩრდილოეთ მაკედონია იქნებიან.
[sexy_author_bio]
