შინაგან საქმეთა სამინისტროს ინფორმაციით, პირის _ გიორგი როყვას დაკარგვის შესახებ ოჯახის წევრებს ამ დრომდე არ მიუმართავთ სამართალდამცავი ორგანოებისთვის:
_ თუმცა, მედიაში გავრცელებული ინფორმაციის საფუძველზე, ჩვენ საქმის შესწავლას ვახორციელებთ, _ გვითხრა შსს-ს პრესსამსახურის თანამშრომელმა მზია წერეთელმა.
მკითხველს შევახსენებთ, რომ ოზურგეთის მერობის დამოუკიდებელი კანდიდატის კონსტანტინე შარაშენიძის მხარდამჭერებმა დღეს საპროტესტო აქცია მოაწყვეს, რომლის მთავარი დევიზი იყო: “არა _ ძალადობას!” აქციის მონაწილეებმა ოზურგეთის ცენტრალურ ქუჩებში მსვლელობის დროს აღნიშნეს, რომ ამ მსვლელობით ისინი სოლიდარობას უცხადებდნენ გიორგი როყვას.
მათივე თქმით, გიორგი როყვა, რომელზეც ძალადობა მმართველი პარტიის კანდიდატის შტაბის მხრიდან გახორციელდა, მეორე დღეა გაუჩინარებულია: “ვთხოვთ სამართალდამცავებს, გამოიძიონ გუშინდელი ფაქტი,” _ აღნიშნეს აქციის მონაწილეებმა.
გიორგი როყვას და, ნონა როყვა ამბობს, რომ ის თავის ძმას, თუ საჭიროა, თავად მოძებნის:
_ მე არაფერი ვიცი, არავითარი ინფორმაციის მოცემა არ შემიძლია. რასაც თქვენ ამბობთ, იმას მეუბნებიან მეც. არაფერი არ შემიძლია გიპასუხოთ, ძალიან ცუდად ვარ. არ მიკონტაქტია მასთან, _ გვითხრა ნონა როყვამ.
_ ქალბატონო ნონა, გავრცელდა ინფორმაცია, რომ თქვენი ძმა გუშინ თბილისში, თქვენთან ჩამოვიდა. რამდენად სწორია ეს ინფორმაცია?
_ ვინ იყო გუშინ, ვინ გითხრათ?! მითხარით ერთი _ მიდით იმასთან და გადაამოწმეთ!
_ თქვენთან კონტაქტი არ ჰქონია?
_ ჩემთან ნუ რეკავთ! საერთოდ თავი დამანებეთ, რა, რას წერთ, რას კითხულობთ, საერთოდ ვინ გამოაქვეყნა, იმას ჰკითხეთ, ვინც დაინტერესდა, ვინ შეაშინა. შეშინებული მე ეგ არ მინახავს და რას წერენ, რატომ დაწერეს, ერთი ჰკითხეთ! ჩემთან არ დარეკოთ!
_ ქალბატონო ნონა, თქვენ გიორგი შეშინებული არ გინახავთ?
_ ჩემთან საერთოდ არ დარეკოთ, არ მინახავს, არ ვიცი! მე ნონა ვარ როყვა და გიორგის ამბავი კითხეთ მას.
_ რომ ვერ ვპოულობთ, იმიტომ გიკავშირდებით. გვაინტერესებს, რა პრობლემა აქვს, რით შეგვიძლია დავეხმაროთ…
_ ჩემთან არ დარეკოთ! მე ვერ ვპოულობ და მე არ გამიცხადებია არსად. არ ვეძებ, თუ საჭირო იქნება მე მოვძებნი, თქვენ დაანებეთ თავი! _ აღნიშნა ნონა როყვამ.
7 ნოემბერს გიორგი როყვა “გურია ნიუსს” დაუკავშირდა და გვთხოვა იმის გარკვევაში დავხმარებოდით, როგორ მოხვდა შარაშენიძის წარმომადგენლად საარჩევნო უბანზე:_ მართლა ვერაფერი გავიგე. არც ის ვიცი საიდან აქვთ ჩემი პირადი მონაცემები. შეთავაზებაც კი არ მქონია, არც შარაშენიძის მხარდამჭერი ვარ და ძალიან დიდ გაურკვევლობაში აღმოვჩნდი. იქნებ, თქვენ დამეხმაროთ და გამარკვევინოთ რატომ გააკეთეს ასეთი რამ და საიდან მოხვდა შარაშენიძის შტაბში ჩემი პირადობის მოწმობის ასლი, _ გვთხოვა როყვამ.
იმავე დღეს ეს ინფორმაცია “გურია ნიუსმა” კონსტანტინე შარაშენიძის შტაბში გადაამოწმა. შარაშენიძის შტაბის წარმომადგენელმა გოჩა გორდელაძემ გვითხრა, რომ როყვა წარმომადგენლად მისივე სურვილით წარადგინეს: “თუ არ უნდა, არაა პრობლემა _ გამოიტანენ (საუბარია საოლქო საარჩევნო კომისიაში შეტანილ განცხადებაზე. რედ.). რაც შეეხება დანარჩენს, თუ რაიმეს გარკვევა უნდა, მიბრძანდეს იქ, სადაც დაწერა განცხადება და გაარკვევენ“, _ გვითხრა გორდელაძემ.
ამ ინფორმაციის გამოქვეყნებიდან მეორე დღეს კი, შარაშენიძის შტაბის წარმომადგენელმა ირაკლი სირაძემ ბრიფინგი გამართა, სადაც როყვასთან სატელეფონო მიმოწერა წარმოადგინა.
მიმოწერაში ჩანს, რომ როყვა სირაძეს დახმარებას სთხოვს:
_ ბეგი და მისი ამალაა ჩემთან მოსული. გთხოვ, დამეხმარე, ითამაშე და თქვი, რომ არ ვარ შენი წარმომადგენელი, _ წერს როყვა სირაძეს.
ამ ინფორმაციას უარყოფენ “ქართული ოცნების” ოზურგეთის საარჩევნო შტაბში და აღნიშნავენ, რომ ამ საქმესთან კავშირი არ აქვთ. მმართველი გუნდი სამართალდამცავებს დეტალების გარკვევას სთხოვს.
იქიდან გამომდინარე, რომ გიორგი როყვა პირველ ტურში “ევროპული საქართველოს” კანდიდატი იყო, ჩვენ ამავე პარტიის ოზურგეთის რაიონული ორგანიზაციის თავმჯდომარეს მიხეილ გოგოტიშვილს დავუკავშირდით:
_ როდესაც თქვენს ვებგვერდზე გამოქვეყნებული სტატია ვნახე, დავურეკე გიორგის და ვკითხე, იყო თუ არა შარაშენიძის წარმომადგენელი. მითხრა, რომ არ იყო, არც განცხადება მიუცია და ისეთ სიტუაციაში ვარ, ვერ გელაპარაკებიო, _ გვითხრა გოგოტიშვილმა, თუმცა, როცა ვთხოვეთ, დაეკონკრეტებინა, რომ როყვამ მას იგივე უთხრა, რაც “გურია ნიუსს”, ასე გვიპასუხა:
_ მე დეტალურად არ დამელაპარაკა. ისეთ სიტუაციაში ვარ, ვერ გელაპარაკებიო. არ დავკონკრეტებულვარ მეტად და ვუთხარი, რომ თუ რამე პრობლემა იქნებოდა, მე გვერდით დავუდგებოდი, მაგრამ აღარ დამკავშირებია, _ აღნიშნა გოგოტიშვილმა.
