„ქართული ოცნება“ შანტაჟითა და მუქარით ცდილობს სკოლებისა და ბაღების მასწავლებლების საარჩევნო მიზნებისათვის გამოყენებას და მათი ხმების მიტაცებას“, _ ამის შესახებ „ლელო საქართველოსთვის“ გურიის მაჟორიტარი დეპუტატობის კანდიდატმა, გიორგი სიორიძემ დღეს, საგანგებოდ გამართულ ბრიფინგზე განაცხადა.
გიორგი სიორიძე ტელეკომპანია „პირველზე“ გასულ სიუჟეტს გამოეხმაურა, საიდანაც ირკვევა, რომ სკოლებისა და ბაღების მასწავლებლების მიმართ მმართველი პარტიის მხრიდან მიმდინარეობს მუქარა და შანტაჟი, რათა მოხდეს მათი საარჩევნო მიზნებისათვის გამოყენება.
„მინდა გამოვეხმაურო დღეს გასულ სიუჟეტს, რომელიც გურიაში სკოლებისა და ბაღის მასწავლებლების დაშანტაჟებასა და მუქარას ეხება არჩევნებზე მათგან ხმების მიღების მოტივით. მმართველი პარტია, „ქართული ოცნება“ ცდილობს, რომ საჯარო სკოლებისა და ბაღების მასწავლებლები გამოიყენონ თავიანთი საარჩევნო მიზნებისათვის.
ეს რომ ასე ხდებოდა, ჩვენ ძალიან კარგად ვიცოდით, რისი ნათელი დადასტურებაცაა დღეს გასული სიუჟეტი. პირადი კარდაკარ საარჩევნო კამპანიის დროს, როდესაც სააგიტაციო მასალებს ვარიგებდი, ხშირად იყო შემთხვევები, როდესაც მასწავლებლები მხვდებოდნენ ამა თუ იმ სახლში და ჩუმად მართმევდნენ საარჩევნო სააგიტაციო მასალას. ზოგჯერ მეზობელი გვეუბნებოდა, იმ სახლში მასწავლებელი ცხოვრობს და ნუ მიაწვდით საარჩევნო მასალებსო.
ეს არის სახელმწიფოს მიტაცების ერთ–ერთი გამოვლინება და შეტევა მასწავლებლის ინსტიტუტზე. მასწავლებელი, რომელიც არის მომავალი თაობის აღმზრდელი, ბავშვებისათვის თავისუფლების, მოქალაქეობრივი პასუხისმგებლობისა და სახელმწიფოებრივი იდეალების გამზიარებელიცა და დამნერგავიც. საარჩევნო ხმების მოპოვების მიზნით მათზე მუქარა და შანტაჟი ნიშნავს იმას, რომ მმართველ პარტიას არაფრად უღირს ამ საპატიო და საპასუხისმგებლო პროფესიის ადამიანებისა და მომავალი თაობის ბედი. ნაცვლად იმისა, რომ მასწავლებლების გადამზადება მოხდეს სხვადასხვა პროგრამების მიხედვით, რაც უფრო მეტად გაზრდის მათ კვალიფიკაციას, ისინი მსგავსი ზეწოლის ობიექტები ხდებიან“, – აღნიშნა გიორგი სიორიძემ.
გიორგი სიორიძემ მასწავლებლებს მხარდაჭერა და სოლიდარობა გამოუცხადა. მისი თქმით, „ლელო საქართველოსთვის“ ხელისუფლებაში მოსვლის შემდგომ, ეს პრაქტიკა სრულად დასრულდება.
„ლელო საქართველოსთვის“ ხელისუფლებაში მოსვლის შემდგომ, ეს პრაქტიკა სრულად დასრულდება. მიუხედავად მსგავსი ზეწოლებისა, მასწავლებლები მაინც აძლევდნენ გასაქანს თავისუფალ არჩევანს. ეს ასე მოხდა 2012 წელს, 2003 წელს და 1990-იან წლებშიც. ასე მოხდება ხვალაც, 31 ოქტომბერს.
მინდა სოლიდარობა გამოვუცხადო ყველა მასწავლებელს, ვინც მსგავსი მუქარისა და შანტაჟის მსხვერპლია. გურიაში, საჯარო სკოლებში 2 000-ზე მეტი მასწავლებელია. მინდა მოგიწოდოთ, რომ ნუ შეუშინდებით ნებისმიერ ზეწოლას ხელისუფლების მაღალჩინოსნების მხრიდან – მიდით არჩევნებზე. თუკი რამე პრობლემა შეგექმნებათ, „ლელო“ და პირადად მე, გიორგი სიორიძე ვიქნები იმის გარანტი, რომ თქვენ ხმას გაიგებს მთელი საქართველო, ყველაზე ხმამაღლა. მიდით არჩევნებზე, გააკეთეთ თქვენი არჩევანი. ჩემი აზრით, სწორი არჩევანის გაკეთება იქნება „ლელო საქართველოსთვის“, 56 ნომრის შემოხაზვა, თუმცა, მთავარია, რომ თქვენი არჩევანი იყოს თავისუფალი“, _ განაცხადა გურიის მაჟორიტარი დეპუტატობის კანდიდატმა, გიორგი სიორიძემ სპეციალურად გამართულ ბრიფინგზე.
(R)
