„როცა საარჩევნო კამპანიისას კონკურენტი თავს არიდებს დებატებს, სხვა გზა არ რჩება, გარდა იმისა, რომ რაიმე ალტერნატიული ფორმით მიაწოდო მას ის კითხვები, რაც მოსახლეობას მისი და მისი წარმდგენი პარტიის მიმართ დაუგროვდა“, _ ამის შესახებ პოლიტიკური გაერთიანება „ლელო საქართველოსთვის“ გურიის მაჟორიტარმა კანდიდატმა გიორგი სიორიძემ სპეციალურ ბრიფინგზე განაცხადა, რომელიც ოზურგეთში, ღია ცის ქვეშ, „ქართული ოცნების“ მაჟორიტარი კანდიდატის ვასილ ჩიგოგიძის ოფისის მიმდებარედ გამართა.
„ბატონ ვასილს, წინასაარჩევნო კამპანიისას ჰქონდა რამდენიმე შესაძლებლობა, რომ როგორც წესი და რიგია, და როგორც მიღებულია ცივილიზებულ საზოგადოებაში, კონკურენტებთან ერთად მონაწილეობა მიეღო პოლიტიკურ დებატებში. მან ამ შესაძლებლობებს იგნორირება გაუკეთა. იგნორირება გაუკეთა ასევე ჩემს რამდენიმეგზის საჯარო მოწოდებას, პირადად ჩემთან ედებატა ნებისმიერ ფორმატში, რათა გურიის მოსახლეობას ჰქონოდა ინფორმირებული არჩევანის გაკეთების საშუალება.
დასანანია და სამწუხაროა, რომ ასე იქცევა იმ პოლიტიკური ძალის წარმომადგენელი, რომელსაც პრეტენზია აქვს, კიდევ ერთი ვადით განაგრძოს ქვეყნის მართვა.
ბატონმა ვასილმა სხვა გზა არ დატოვა გარდა იმისა, რომ თავი მომეყარა იმ კითხვებისთვის, რომელიც გურიის მოსახლეობას მისი და მისი პარტიის მისამართით აქვს. ამ კითხვებს ვათავსებ კონვერტში და მისი ოფისის თანამშრომლებს ვუტოვებ მისთვის პირადად გადასაცემად“, – განაცხადა ბრიფინგზე გიორგი სიორიძემ.
მან იქვე, ფეისბუქ ლაივის რეჟიმში, საზოგადოებას გააცნო რამდენიმე კითხვა, რომელიც გურიის მოსახლეობის სახელით ვასილ ჩიგოგიძეს გადასცა.
„ბატონი მამუკა ცინცაძე ჩოხატაურიდან გეკითხებათ – ორჯერ იყავით მაჟორიტარი დეპუტატი ჩოხატაურიდან. დაასახელეთ ერთი საკანონმდებლო ინიციატივა, რომლითაც გამოხვედით საქართველოს პარლამენტში, რომელიც მიიყვანეთ ბოლომდე და რომელმაც ჩოხატაურის რაიონის მკვიდრთა მდგომარეობა გააუმჯობესა.
ბატონი ზაზა ჩხარტიშვილი ოზურგეთიდან გეკითხებათ – „ოცნების“ პირველი მოწვევის პარლამენტს რომ თავი დავანებოთ, 2016-2020 წლებში გურიას ჰყავდა ორი მაჟორიტარი დეპუტატი პარლამენტში. ერთი ოზურგეთიდან, არჩილ თალაკვაძე და მეორე, ნინო წილოსანი ლანჩხუთიდან და ჩოხატაურიდან.
მაქვს კითხვა – კონკრეტულად გურიისთვის რა გააკეთა ან ერთმა, ან მეორემ საქართველოს პარლამენტში, ან საერთოდ, გარდა იმისა, რომ საკუთარ გარემოცვას და ნათესაობას დაუმსახურებლად მისცეს ფართო გზა და მხოლოდ ნეპოტიზმის ნიშნით დაასაქმეს ისინი სახელმწიფო სამსახურში სხვადასხვა დონეებზე?
ქალბატონი სოფო წილოსანი ლანჩხუთიდან გეკითხებათ – 2012 წელს, როცა ხელისუფლებაში მოხვედით, მედიკამენტები, რომელიც დედაჩემისთვის, რამდენიმე ქრონიკული დაავადების მქონე ადამიანისთვის იყო საჭირო, თვეში ჯამურად მიჯდებოდა 135 ლარი. დღეს იგივე პაკეტი მიჯდება 250 ლარზე მეტი. ეს როგორ მოახერხეთ? ამას ეძახით სოციალურ უზრუნველყოფას? მახსოვს, თქვენი პარტია ბევრს საუბრობდა იაფ წამლებზე? მიკარნახეთ, სად არის ეს იაფი წამლები, რომელ აფთიაქს მივაკითხო თქვენი სახელით?
ქალბატონი ლილი მარტიკოვი, პენსიონერი ოზურგეთიდან, გთხოვთ, დაეხმაროთ მისი პენსიის ისე გადანაწილებაში, რომ თვიდან თვემდე საკვებზეც, მედიკამენტებზეც, კომუნალურ საჭიროებებზე და გადაადგილებაზეც სამყოფი იყოს. ქალბატონი ლილი, მოგმართავთ წინადადებით, ეს რომ გაგიადვილდეთ, თუნდაც მხოლოდ ერთი თვე პირადად თქვენ იკმაროთ 250 ლარი ერთი თვის განმავლობაში ყველა ელემენტარული საჭიროებისათვის.
ბატონ დავით ჭანუყვაძეს ოზურგეთიდან თქვენთან კითხვა აქვს. მას აინტერესებს, რატომ ვერ მოხერხდა თქვენი ხელისუფლების 8-წლიან პერიოდში ის, რომ თუნდაც ქალაქ ოზურგეთს ჰქონოდა უწყვეტი წყალმომარაგება.
ბატონ დავით სარიშვილს ლანჩხუთიდან აინტერესებს, რამდენი პროექტის, რამდენი მსხვილი ინვესტიციის დასახელებას შეძლებთ, გარდა ივანიშვილის პირადი პროექტებისა, რომელიც ბოლო 8 წლის განმავლობაში გურიაში გახორციელდა და შედეგად ახალი სამუშაო ადგილები და ადგილობრივ ბიუჯეტში ახალი შენატანები მოიტანა.
ბატონო ვასილ, კითხვები უსასრულოდ გრძელდება, მე მხოლოდ რამდენიმე მათგანი შეგირჩიეთ“,- მიმართა გიორგი სიორიძემ ვასილ ჩიგოგიძეს. (R)
