“ერთიან ნაციონალურ მოძრაობაში” შიდა დაპირისპირებას ბოლო არ უჩანს და რაც დრო გადის, სულ უფრო იზრდება ის ნაპრალი, რომელიც შიდაპარტიულ არჩევნებში ლევან ხაბეიშვილის გამარჯვებას მოჰყვა. ორ ბანაკად გახლეჩილი პარტიის მომხრეები ერთმანეთს საჯაროდ, ღიად უპირისპირდებიან.
ლანჩხუთის საკრებულოს წევრმა გივი ცინცაძემ, რომელიც ენმ-ში ხაბეიშვილის ფრთას წარმოადგენს, სოციალურ ქსელში პოსტი გამოაქვეყნა, რომლის ადრესატიც პარტიის ექსთავმჯდომარე ნიკა მელია გახლდათ:
“მართლა გაუგებარია უკვე, სად არის მელია _ “ნაციონალურ მოძრაობაში” თუ ქოცებში?!
ერთგან ისიც თქვა, დიდად არ ვწუხვარ პარტია რომ სუსტდებაო. თუ პარტია სუსტდება და არ წუხს, აბა, რაღა უნდა ამ პარტიაში?
ცარიელი სიტყვები, რომ დიდი მხარდაჭერა აქვს, სასაცილოა
P. S. ივანიშვილს დავამარცხებო, იძახდა და მოქმედმა თავმჯდომარემ, შიდა არჩევნებში წააგო, იპონით!” _ დაწერა ლანჩხუთელმა დეპუტატმა ფეისბუქზე.
ცინცაძის ამ პოსტს არაერთი გამოხმაურება მოჰყვა, უმეტესად კი, კრიტიკული. ენმ-ის ლანჩხუთელ სახეს ოპონენტები არჩევნებამდე პარტიის ახლანდელი ლიდერის დაპირებებს, მიშას გამოხსნას, უწყვეტ აქციებსა და სხვა ამბებსაც ახსენებენ.
ჯონი ამისულაშვილი: “კაი, ახლა, გივი, შენც დაიწყე? არსად უთქვამს, პარტია რომ სუსტდება, მკიდიაო. პირიქით, სულ ამბობს, რომ ძალიან წუხს და ცუდია, რაც ხდება. მაინც არ მეგონა, ამ გამპრავებლებს თუ დაემატებოდი. ახლა რა ხდება პარტიაში, ის გვითხარი, ან ის მიშა როგორაა? სირცხვილია, რასაც აპრავებთ და აბრალებთ ენმ-ის იმ მხარდამჭერებს, ვინც ნიკას უჭერდა მხარს”.
გიორგი ბაბუხადია: “ყველაზე მეტი ხმა ვისი თავმჯდომარეობისას მიიღო ენმ-მ და ყველაზე ხალხმრავალი აქცია რომელი თავმჯდომარის პირობებში ჩაატარა 2012 წელს არჩევნების წაგების მერე?
და უწყვეტი აქციები სადაა? მიშა აღარაა ცუდად, აღარ კვდება? ხალხს ასეირებდა ნიკაო და ეგეც რომ აღარაა ახლა? ტეხავს…”
ლანჩხუთელ ოპოზიციონერს თავად ნიკა მელიაც გამოეხმაურა:
“გივი, ჩვენ ვართ, გივი!
გაუგებარი “ნაციონალური მოძრაობის” ოცნებად გადაქცევის მცდელობაა, ისე რომ სახელისა და პარტიის ნომრის გარდა, არ დატოვოთ სხვაობა….
“ოცნებამაც” ტყუილი დაპირებებით მოიგო და თქვენც _ თუ არა ერთი შესრულებული დაპირება მაინც სადაა?! ან დაპირების შეხსენება როდის აქეთ არის მიუღებელი.
მიშას ძალიან მალე გამოყვანის დაპირებით მოსულები, მისი პატიმრობის ვადის გახანგრძლივების გარანტორად იქეცით, 2024-ში კეზერაშვილი/მერაბიშვილის წაგების ფორმულით…
თუმცა, ამ ქვეყნის ინტერესს “ვადაგასული” ადამიანების ინტერესებს არ და ვერ გადავაყოლებთ.
მე არჩევნების შედეგი მხოლოდ მახარებს, სხვა შემთხვევაში, სიმართლე ასე ცხადად არ გამოჩნდებოდა…
პარტიისთვის მომაკვდინებლად ცუდია, რაც მოხდა. ბიძინა ისვენებს, როდესაც მისი კონკურენტები კეზერაშვილი და მერაბიშვილი არიან; თუმცა, დიდმა სტრატეგებმა ვერ გათვალეს, ისე იჩქარეს უზურპაცია, რომ 5 თვეში ყველაფერი ნათელი გახდა, იმაზე ადრე, ვიდრე ისინი ისურვებდნენ…
მე მხოლოდ ქვეყნის ინტერესი მაინტერესებს და არა რომელი დეპუტატი რა ფულს იშოვის მომავალში და რამდენ სახლს აიშენებს ოპოზიიციდან და მერე შენნაირებს ასეთ პოსტების დაწერით დაამოტივირებენ.
ისინი კი, ოპოზიციიდან ისევ სახლებს აიშენებენ და შენ ისევ პოსტების დაწერას გთხოვენ და ასე უსასრულოდ… ასე გავა დრო, ისინი ბიზნესს მიხედავენ, შენ კი მობილურ ტელეფონსაც არ გაჩუქებენ.
- S. პირველად ვხედავ გამარჯვებულ მხარეს, რომელსაც გამარჯვებულის არაფერი უგავს… ესეც დასანანია”, _ დაწერა მელიამ.
ენმ-ის ლანჩხუთელ წევრს თანაუბნელმა თინათინ ღლონტმაც დაუკომენტარა: “თქვენ ვივამედში შევარდნილი წერთ ამას თუ ქოცებიდან იპონით დადებული?” რაზეც ცინცაძისგან ასეთი პასუხი მიიღო: “ხო, თქვენ ვანოს დამარცხებაზე იფიქრეთ და ჩვენ ბიძინას დავამარცხებთ”.
“გეხვეწებით, რომ დაამარცხებთ, ჩვენც გაგვაგებინეთ; ვანო და კეზერა წარსულია; ჩვენ “ნოკია” აღარ გვინდა, “აიფონი” გვირჩევნია; ეს სტატუსი ვინ შეგიკვეთა”, _ წაესია ცინცაძეს მელიას ფლანგი, რომელიც, ამ შემთხვევაში, აშკარად უმრავლესობაში იყო. ერთმა იკითხა კიდეც _ ეს პოსტი მელიას მხარდამჭერისაა თუ ხაბესი, სულ ყოფილის ფანები რომ აკომენტარებენო.
კოლეგას ენმ-ის ლანჩხუთის ორგანიზაციის თავმჯდომარე კახა ასკურავა გამოექომაგა და ნიკა მელიას უპასუხა: “გივი ცინცაძე, მთელი მისი ენმ-ში ყოფნის პერიოდი, ცხოვრობს და სუნთქავს ამ პარტიის ინტერესებიდან გამომდინარე და ეს შენ ზუსტად იცი. იგი პირუთვნელად და ყოველგვარი მერკანტილური ინტერესების გარეშე ემსახურება მხოლოდ იდეას და სხვას არავის და არაფერს. მე ვამაყობ მისით და პატარა წვლილიც მიმიძღვის, რომ მას ჰქონოდა უფრო დიდი ასპარეზი, ვიდრე იგი იმსახურებს. რაღაცეები ერთად შევძელით და ბევრი რამ ვერ შევძელით. იმედია, ამ ქვეყნის დერუსიფიკაციის და ღირსეული მომავლის უზრუნველსაყოფად კიდევ ბევრ რამეს შევძლებთ ერთად. ბევრი გივი ცინცაძე აქაურობას. ძალა ერთობაშია!”
“დაშლილ პარტიას, განადგურებულ ინფრასტრუქტურას ვაწყობთ ყველა რაიონულ ორგანიზაციაში.
თქვენ ვანოს და კეზერას ებრძოლეთ, ნიკა წარმატებას გისურვებ ამ არაფრის მომცემ გზაზე. ფრთხილად, ბოლოში უფსკრულია, არ გადაიჩეხო”, _ თავად ცინცაძემ კი ასე უპასუხა მელიას, რაზეც ყოფილმა თავმჯდომარემ იქეთ წამოაძახა _ ვინც პარტიულ ინფრასტრუქტურას კურირებდა, ყველა თქვენთანააო. მოკლედ, საკმაოდ იპაექრეს მელია-ცინცაძემ.
“აუუ, ხაბეიშვილი თუ მელია, მელია თუ ხაბეიშვილი, დავიღალეეეთ! ქვეყანას ვკარგავთ თუ დავკარგეთ და თქვენ რით ერთობით, რით არ დაძველდა ეს თემა, ამასობაში პარტიაც ქრება! დაგვასვენეთ რა, არც ერთი უქნია ღმერთს და არც მეორე! ჩაჩუმებული მოსახლეობაც რავარი გვყავს!” _ ცინცაძის პოსტზე ისეთების კომენტარებიც ბევრი იყო, რომლებიც ენმ-ში გაჩაღებული შიდადაპირისპირების გამო გაურკვევლობაში რჩებიან.
ავტორი
