კლინიკა „ვივამედში“ გუშინ, 4 მაისს, საღამოს საათებში გარდაიცვალა პატიმარი, რომელიც იქ მძიმე დაზიანებებით გადაიყვანეს გლდანის მერვე პენიტენციური დაწესებულებიდან.
გარდაცვლილი იოსებ გორგაძის ადვოკატი მუხრან ღურწკაია ამბობს, რომ ციხეში მიყენებული დაზიანებები იმდენად მძიმე იყო, რომ ექიმების 3,5-თვიანი მკურნალობა უშედეგო გამოდგა.
„მიზეზი ისაა, რომ გლდანის მერვე დაწესებულებიდან უმძიმესი ნაცემი გადაიყვანეს იანვარში. ექიმები მკურნალობდნენ, მაგრამ ვერაფერს ვერ გახდნენ და გარდაიცვალა. ადამიანს ჰქონდა 30-ზე მეტი მოტეხილობა. ნაცემი იყო, მაგრამ გამოძიებას არაფერი გაუკეთებია – თვითონ ავითარებენ ვერსიას, რომ წაიქცა“, – ამბობს მუხრან ღურწკაია.
კლინიკა „ვივამედის“ კლინიკური დირექტორი ზურაბ ჩხაიძე რადიო თავისუფლებას ეუბნება, რომ ეს არ ყოფილა მოულოდნელი სიკვდილი.
„ეს იყო მძიმე ტრავმული დაზიანებებით შემოსული. მკურნალობდა ჩვენთან 23 იანვრიდან, მაგრამ მიუხედავად ამისა, დადგა ლეტალური გამოსავალი… იმყოფებოდა კომატოზურ მდგომარეობაში, აპარატურულ მხარდაჭერაზე“, – ამბობს ზურაბ ჩხაიძე.
იუსტიციის სამინისტროს დაქვემდებარებულ პენტინეციურ დაწესებულებაში აცხადებენ, რომ ციხეში კაცის „მდგომარეობა გაუარესდა“ და ამის გამო გადაიყვანეს კლინიკაში.
„როგორც საზოგადოებისთვის ცნობილია, 2025 წლის 23 იანვარს ბრალდებული ი.გ.-ს ჯანმრთელობის მდგომარეობა გაუარესდა… აღსანიშნავია, რომ ჩხუბისა და ძალადობის ფაქტი მიმდინარე გამოძიების ფარგლებში არ დასტურდება“, – წერია პენტენციური სამსახურის განცხადებაში.
