ახლა, როცა ადგილობრივი თვითმმართველობის არჩევნების ვნებათაღელვა დასრულებულია და ყველაფერი ციფრებში აისახა, გარკვეულია “ვინ რისი პატრონია, ვინ ვისი ტყვეა“… (ეს პოეტის ფრაზაა და ტყვეობა სულაც არ ნიშნავს ხელებზე ბორკილების დადებას). ესეც იმიტომ გამახსენდა, რომ როცა საკუთარი ნება, არჩევანი შეუბორკავია, თავისუფლებაში ანგარება არ ურევია…
წინასაარჩევნო დროის სიმცირის მიუხედავად, მოვახერხე ჩოხატაურის მოსახლეობის დიდ ნაწილს შევხვედროდი, კიდევ ერთხელ მომესმინა მათგან წლობით გადაუჭრელი პრობლემების შესახებ და ახლაც ვადასტურებ, რომ მზად ვიყავი ამ პრობლემების გადასაჭრელად საკუთარი ძალები მომესინჯა _ საამისოდ კი პასუხისმგებლობას და ძალისხმევას არ დავზოგავდი!
ვინც მიცნობს დამიდასტურებს, რომ მე თანამდებობების მაძიებელი არასდროს ვყოფილვარ _ მერობაც ჩემთვის იდეაფიქსი არასოდეს გახდება და არც ამისთვის მიბრძოლია _ ეს ჩემთვის საშუალება და პასუხისმგებლობა იქნებოდა, მებრძოლა უკეთესი ხვალინდელი დღისთვის!
გაჩერებას არ ვაპირებ _ ამჯერად საკრებულოდან მომიწევს ჩემი ჩოხატაურის კეთილდღეობაზე ზრუნვა და კვლავ არჩეული ძველი კადრებისთვის იმის შეხსენება, რომ ქვეყანა ახალ რელსებზე დგება და ეს აქაურობასაც უფრო მეტად უნდა დაეტყოს! თითოეულმა ოჯახმა უნდა იგრძნოს, რომ ხელისუფლება მასზე ზრუნავს!
მინდა გულწრფელი მადლობა გადავუხადო იმ 2 200 ამომრჩეველს, ვინც მხარი დამიჭირა და ირწმუნა ჩემი! გპირდებით, რომ დავიცავ ყველას ინტერესებს და უფლებებს!
მინდა მივმართო იმ ადამიანებსაც, რომლებმაც სამსახურის თუ სხვა „კეთილგანწყობის“ დაკარგვის შიშით გააკეთეს არჩევანი _ ეს სხვა საქართველოა! საქართველო, სადაც ამ შიშის გამო ადამიანებს აღარ სჯიან და თუ ვინმემ მაინც გაბედა და ძველი დრო შეგახსენათ, სრული პასუხისმგებლობით შემიძლია გითხრათ _ მწარედ მოგატყუათ!
გპირდებით, როგორც 2012 წელს მოხდა ადამიანების სრული ლუსტრაცია ისე მოხდება ახლაც _ მალე დარწმუნდებით, რომ არჩევანში ყველა თავისუფალია და არავის შეუძლია თქვენზე ზეგავლენის მოხდენა!
და სწორედ ამ დაპირების შესასრულებლად მე ვრჩები აქ _ ჩემს ჩოხატაურში. ვრჩები იმიტომ, რომ ერთად ვიზრუნოთ უკეთესი ხვალინდელი დღისთვის! ვრჩები იმიტომ, რომ ვიყო თქვენი ხმა საკრებულოში!
ვულოცავ ჩოხატაურის ახალძველ ხელმძღვანელსაც გამარჯვებას და წარმატებებს ვუსურვებ ჩვენი მუნიციპალიტეტის და ქვეყნის საკეთილდღეოდ, რომლისთვისაც ბევრი რამ სწორად არის გასაკეთებელი, რომლისთვისაც სწორად შენებაა საჭირო და რომლის დარაჯად თქვენთან ერთად, ჩემო ჩოხატაურელებო, მე და ჩემი გუნდიც ვიქნებით!
პატივისცემით, გოჩა მეგრელიშვილი
(R)
