გოგა ბითაძემ მიმდინარე სეზონში ჯერჯერობით საუკეთესო შეხვედრა ჩაატარა. მისი „ორლანდო“ „ლოს ანჯელეს ლეიკერსს“ მასპინძლობდა და მეტოქე დამაჯერებლად დაამარცხა – 120:101.
გოგა ბითაძემ მოედანზე 25:56 წუთი გაატარა, რა დროშიც 10 ქულა, 10 მოხსნა, 2 შედეგიანი გადაცემა და 5 დაფარება მიითვალა. გოგამ ფარის მიმართულებით 7-ჯერ ისროლა, რომლიდანაც 3 გამოიყენა, მან 6-დან 3 ორქულიანი და 4-დან 4 საჯარიმო ჩააგდო, 1 სამქულიანი კი ააცილა.
„ორლანდოს“ 4 მოგება და 2 მარცხი აქვს რითაც აღმოსავლეთ კონფერენციაში მე-4 ადგილს იკავებს, „ლეიკერსს“ კი 3-3 მოგება-წაგებით დასავლეთ კონფერენციაში მე-9 პოზიცია უკავია.
იტალიის „სერია A“-ს მორიგ ტურში „ნაპოლი“ „სალერნიტანას“ ესტუმრა და მეტოქის ძლევა ადვილად მოახერხა.
რუდი გარსიას გუნდმა თითო ტაიმში თითო გოლი გაიტანა. ანგარიში მე-13 წუთზე ჯაკომო რასპადორიმ გახსნა, ხოლო 82-ე წუთზე საბოლოო შედეგი ელიფ ელმასმა დააფიქსირა, რომელიც მოედანზე ხვიჩა კვარაცხელიას ნაცვლად შევიდა 67-ე წუთზე.
ქართველი ფეხბურთელი აქტიური იყო, განსაკუთრებით პირველ ტაიმში, როცა ორჯერ ცდილობდა გოლის გატანას, თუმცა არ გამოუვიდა. ეს არ იყო მისი საუკეთესო თამაში.
„ნაპოლის“ მთავარმა მწვრთნელმა რუდი გარსიამ „სალერნიტანასთან“ მოგების შემდეგ შემდეგი კომენტარი გააკეთა.
„როგორც იქნა, მატჩის დასაწყისში გოლი გავიტანეთ და მერეც მეტოქეს პრაქტიკულად არაფერი შევაქმნევინეთ. ჩვენი სურვილი იყო თავიდანვე კარგად დაგვეწყო, რათა თამაში გვემართა. გოლის შემდეგ ცოტა ჩავარდნა გვქონდა, რაც მომავალში უნდა გამოვასწოროთ. დერბი ყოველთვის განსაკუთრებული და რთული გამოწვევაა, მაგრამ დამსახურებულად მოვიგეთ.
როგორც კი, გუნდში მოვედი, რასპადორიში დიდი ნიჭი დავინახე. მის მიმართ დიდი ნდობა მაქვს, რადგან აქვს ტექნიკა, ფიზიკური შესაძლებლობები, ორივე ფეხით დარტყმა შეუძლია, ის არა მარტო გოლებით გამოირჩევა, არამედ გუნდური ფეხბურთელია. მისი ერთადერთი პრობლემა ოსიმენი და 4-3-3 სქემაა.
ვფიქრობ, 4-3-3 გუნდისთვის შესაფერისი სქემაა, მაგრამ ისიც მართალია, რომ შეგვიძლია საჭიროების მიხედვით შევცვალოთ, სიტუაციიდან და მეტოქიდან გამომდინარე. გვჭირდება სხვა იარაღი და რესურსები. ახლა ეს გზა უნდა გავაგრძელოთ და ოთხშაბათს „უნიონთან“ მოვიგოთ, რადგან მერვედფინალში გასასვლელად ქულები გვჭირდება“, – განაცხადა რუდი გარსიამ.
რუდი გარსიასაგან განსხვავებით, გამოცემამ „Area Napoli“ ხვიჩა კვარაცხელიაზე რამდენიმე წინადადება დაწერა.
„ქართველი სათადარიგო სკამზე სასოწარკვეთილი იჯდა, რადგან თავისი თამაშით სულაც არ იყო კმაყოფილი. DAZN-ის კამერებმა შეამჩნიეს მისი უკმაყოფილო მზერა, როცა სკამზე იჯდა და თავი დახრილი ჰქონდა. სცენა, რომელიც რუდი გარსიამაც შეამჩნია. ფრანგი მწვრთნელი მას მიუახლოვდა და მისი გამხნევება სცადა. კარგი ჟესტი ფრანგი მწვრთნელისგან, რომელიც აჩვენებს, რომ კარგი განწყობა აქვს თავის ფეხბურთელებთან.
ქართველი აბსოლუტური ხარისხის ფეხბურთელია და ყოველთვის სურს მატჩზე თავისი კვალის დატოვება. „სალერნიტანასთან“ ის არ ბრწყინავდა და ეს პირველმა გააცნობიერა. ოთხშაბათს კი „უნიონთან“ ეცდება გამოსწორებას“, – დაწერა გამოცემამ.
„სალერნიტანასთან“ შეხვედრის შემდეგ „ნაპოლის“ სლოვაკმა ნახევარმცველმა სტანისლავ ლობოტკამ შემდეგი განცხადება გააკეთა:
„ადვილი თამაში არ იყო, ძალიან ბედნიერები ვართ მიღწეული შედეგით და ახლა შემდეგ მატჩზე უნდა ვიფიქროთ.
რა იქნება წელს ჩვენი მიზანი? – კვლავ სკუდეტოს მოგება! ეს ძალიან რთული იქნება, რადგან “მილანი” და “ინტერი” სატრანსფერო პერიოდში მნიშვნელოვნად გაძლიერდნენ.
მაგრამ ჩვენ გვაქვს ჩვენი ხასიათი, გუნდურობა და ყველაფერს ვიზამთ, რომ სკუდეტო კვლავ ჩვენ დაგვრჩეს“, – განაცხადა სტანისლავ ლობოტკამ.
ავტორი
