29 ივლისს, ოზურგეთის მუნიციპალიტეტის საკრებულოს რიგგარეშე სხდომა გაიმართა. დღის წესრიგში მხოლოდ ერთი, უმნიშვნელოვანესი საკითხი წარმოადგინეს: “ოზურგეთის მუნიციპალიტეტის დაბა გომისმთის ადმინისტრაციულ ერთეულის ტერიტორიის განაშენიანების დეტალური გეგმის შემუშავების თაობაზე, ოზურგეთის მუნიციპალიტეტის მერისთვის თანხმობის მიცემის შესახებ” _ ოზურგეთის მუნიციპალიტეტის საკრებულოს განკარგულების მიღების თაობაზე.
საკითხის ირგვლივ მერიის არქიტექტურის განყოფილების უფროსმა, თამაზ ლომჯარიამ ისაუბრა.
თამაზ ლომჯარიამ თქვა, რომ ჯერ კიდევ 2016 წელს მიღებული იყო გადაწყვეტილება, რომ გომისმთის განაშენიანების გენერალური გეგმა გაკეთებულიყო:_ შემდეგ, კარგად იცით, რომ ადგილობრივი მუნიციპალიტეტის საკრებულოს ძალისხმევით გახდა შესაძლებელი და გომისმთას დაბის სტატუსი მიენიჭა. წარმოიშვა საჭიროება ახალი გენგეგმის შექმნისა. ახლა, ოზურგეთის მუნიციპალიტეტი გაეროს განვითარების პროგრამის მხარდაჭერით იწყებს, დაბა გომის მთის ადმინისტრაციული ერთეულის ტერიტორიის განაშენიანების გენერალური გეგმის შემუშავებას, _ განაცხადა მან.
ოზურგეთის მუნიციპალიტეტის მერის წერილში, რომელიც საკრებულოს სხდომაზე წარმოადგინეს, ნათქვამია:
“დაბა გომისმთა საქართველოს მთავრობის 2014 წლის 3 ივლისის დადგენილების თანახმად, წარმოადგენს საკურორტო ადგილს. ვინაიდან კურორტ გომისმთას არ გააჩნია დამტკიცებული განაშენიანების გეგმა, აუცილებელია, გახორციელდეს მდგრადი განვითარების პრინციპებზე დაფუძნებული, სრულფასოვანი გეგმის და განაშენიანების გეგმის შემუშავება”.
წერილში საუბარია იმაზე, რომ 2020 წლის 21 მაისის განკარგულებით, ოზურგეთის მუნიციპალიტეტში შეიქმნა დაბა გომისმთის დასახლება და ამ გადაწყვეტილების საფუძველზე უნდა დაიწყოს ის ღონისძიებები, რაც განაშენიანების გეგმის დამტკიცებისთვისაა დადგენილი.
თამაზ ლომჯარიამ განაცხადა, რომ 2016 წელს ოზურგეთის მუნიციპალიტეტის გამგეობის მიერ შემუშავებული კურორტ გომისმთის გენერალური პროექტი, დღეს არსებული მდგომარეობის გათვალისწინებით, ხელახალ შედგენა-დამუშავებას საჭიროებს. ამიტომ არის საჭირო საკრებულოს წევრთა მხრიდან ერთსულოვანი მხარდაჭერა.
მან, ასევე, აუწყა საკრებულოს წევრებს, რომ განაშენიანებას დააფინანსებს გაეროს განვითარების პროგრამა.
საკრებულოს სხდომაზე წამოჭრილ კითხვებზე, თუ როგორ მოხდება უკანონო მშენებლობების აღრიცხვა-დაკანონება გომისმთაზე, თამაზ ლომჯარიამ ასეთი პასუხი გასცა:
_ გომისმთის განაშენიანების შემდგომ განვითარებას ადმინისტრირება და საკანონმდებლო ბაზა სჭირდება. კეთილსინდისიერი მშენებლობა როცა იყო, 2007 წლამდე აშენებული სახლების კეთილსინდისიერ მეპატრონეებს კანონი აძლევთ საშუალებას, დაიკანონონ საკუთარი ქონება. დანარჩენი არის უკანონო მშენებლობა. თუ როგორ მოხდება უკანონო მშენებლობის დარეგისტრირება, დაკანონება და დამტკიცება, ამას განიხილავს იუსტიციის სამინისტრო, ეკონომიკის სამინისტროსთან ერთად. ჩვენი მიზანია, რომ როგორმე ეს მოხდეს გეგმაზომიერად და არა _ ქაოსურად. რაც უფრო ქაოსურია განაშენიანება, უფრო ძვირი ჯდება ინფრასტრუქტურა, უფრო მეტი ზიანი ადგება ეკოლოგიას. ამიტომ არის აუცილებელი, პირველ რიგში, ადმინისტრირება და ცალკე საკანონმდებლო ბაზის მოგვარება.
თამაზ ლომჯარიამ, ასევე, ისაუბრა ყველასთვის საინტერესო საკითხზე, თუ რა რაოდენობის დამსვენებლის მიღება შეეძლება კურორტს და იქნება თუ არა შესაძლებელი მიღებული გრანტით კურორტის სრულფასოვანი მოწესრიგება:
_ მხოლოდ გომისმთას ნამდვილად არ აქვს იმის რესურსი, რომ ერთბაშად მიიღოს 15 ათასი დამსვენებელი. ასე რომ მოხდეს, მდინარე ბჟუჟის ხეობა მდგომარეობიდან გამოვა. ზემდგომთა კომპეტენციაა, ძირითადად, როგორ მოგვარდება. ერთი კია, რომ რა თანხა დაიხარჯება, დამოკიდებულია იმაზე, როგორ დაიხარჯება. გონიერი შედეგი დაიდება გონიერი მხარჯველის ხელში. ამიტომ ყველა შანსი გონიერად უნდა გამოვიყენოთ. სივრცითი მოწყობა უნდა მოხდეს სწორად და ზუსტად. თუ არ არის კონსტიტუცია, არ არსებობს ქვეყნის მოწესრიგება. ასევეა ესეც _ თუ არ იქნება სივრცითი მოწყობა ანუ იგივე რეგიონის კონსტიტუცია, ასე ვთქვათ, არც აქ გვექნება შედეგი, _ თქვა მან.
სხდომაზე, საკრებულოს თავმჯდომარის მოადგილემ, გიორგი ღურჯუმელიძემ კიდევ ერთხელ განმარტა, რომ საკრებულოს რიგგარეშე სხდომა ამ კონკრეტული საკითხის გამო მოიწვიეს _ განიხილება გომისმთის განაშენიანების ახალი გენგეგმის მომზადება. მისი თქმით, მუნიციპალიტეტის მიერ გომისმთის მიწათსარგებლობის გენერალური გეგმის უკვე არსებული პროექტი, მიმდინარე პერიოდისთვის შესაბამის კანონმდებლობაში შესული ცვლილებების გამო, საჭიროებს ხელახალ შემუშავებას.
საკითხის განხილვის და აზრთა შეჯერების შემდეგ, ოზურგეთის საკრებულომ, აღნიშნული გეგმის შემუშავების თაობაზე, მერიას თანხმობა მისცა.
