17 აგვისტოს, ოზურგეთს მუნიციპალიტეტის დაბა გომისმთაში, მიწის რეგისტრაციის რეფორმის ფარგლებში დაიწყო ტექნიკური სამუშაოების შესრულება, რის ორგანიზებასაც ახდენენ საჯარო რეესტრის ეროვნული სააგენტოს საველე ჯგუფების წარმომადგენლები.
მათი მიერ ხდება თითოეული მესაკუთრის გამოძახება, რათა ადგილზე კუთვნილი მიწა აუზომონ მათ, ვისაც საკუთრების დაკანონება სურთ.
„გურია ნიუსი“ მთაში იმყოფებოდა და ადგილზე გაეცნო აღნიშნულ პროცესს.
გომისმთის მახასიათებელია ხშირი და სქელი ნისლიანობა, რაც ამ დღესაც ბურავდა ირგვლივ ყველაფერს.
ადგილობრივი მცხოვრებლები და დამსვენებლები, ასევე აქ სამუშაოთა მწარმოებლები ერთნაირად წუხდნენ უამინდობის გამო.
ჩვენ, პირველ რიგში, ვნახეთ საჯარო რეესტრის სამსახურის წარმომადგენლები, რომლებიც არა მარტო მიწის აზომვის შედეგებს არეგისტრირებდნენ, არამედ ის ჯგუფებიც, რომლებიც აკეთებდნენ იმ მოქალაქეთა აღრიცხვას, რომლებმაც ოზურგეთში ვერ მოასწრეს განაცხადის შევსება.
აქ ისეთი პირებიც იყვნენ მოსულნი, რომლებიც საჯარო რეესტრის წარმომადგენელთა საველე ჯგუფის წევრებს ეუბნებოდნენ, გომისმთაზე მიწა არასდროს გვქონია, არც სახლი და ახლა გვინდა გვქონდეს. ამიტომ განაცხადი შეგვავსებინეთო.
_ ასე განაცხადი არ ივსება. ან საკუთრების დამადასტურებელი უნდა გაგაჩნდეს რაიმე, ან სადმე მონიშნული გქონდეს ადგილი, დარჭობილი უნდა იყოს ბოძები. ისე როგორ შეგავსებინოთ? _ წუხდნენ ისინი და უარით ისტუმრებდნენ მიწის საკუთრებაში მოზომვის მაძიებლებს.
თავის მხრივ ბრაზობდნენ უარით გასტუმრებულნი, წავალთ და ჩვენც ჩავარჭობთ ახლა პალოებს, არ შეიძლებაო?
პირველი ენაწყლიანი მოსაუბრე, ვინც ამ დღეს შეგვხვდა და გომისმთაზე დაწყებული სამუშაოების შესახებ თავის აზრი გამოთქვა და ასევე თავის თავზე გვიამბო, ოზურგეთის მუნიციპალიტეტის სოფელ მაკვანეთის მკვიდრი, ამირან გორდელაძე იყო:
_კაცოო, რა არ მესმის, იცით? ვიღაცა ისე ხომ უნდა აწესრიგებდეს ამ მიწების განაწილებას, რომ გზას და კვალს ტოვებდეს? მივესალმები, რომ მთავრობამ გადადგა ნაბიჯი კანონისკენ, მაგრამ თუ ყველა ასე დარეგისტრირდა, ფეხის დასადგამი ადგილი არ უნდა დარჩეს? თუ გომისმთაზე კანონი ფეხის ადგმას იწყებს, ვივარგოთ და ვასწავლოთ სიარული… მასთან ერთად ვისწავლოთ ჩვენ, ქართველობამ. ადამიანს თავში უნდა ედოს აზრი, რომ ერთი ნაპერწკალი ყველაგან ინთება, ხომ უნდა იაზროვნო? კაცო, ხალხი რომ ესახლებოდა, სახლთან წყლის და გზის ადგილს ანგარიშობდა ჯერ, თვალით ზომავდა და გულს ატანდა. ცეცხლი რომ გაჩნდეს, ის ვთქვი, რომ ერთი ნაპერწკალის ანთება უნდა გახსოვდეს-თქო, ჩასაქრობად ვერ უნდა მიუდგე, ერთად უნდა ამოვიბუგოთ? გაიხედავ, ვინ არ მოდის აქ, ტაბახმელადან რომ ჩამოვა კაცი და იტყვის, აქ ბაბუაჩემს სახლი ედგა, დამენგრა და ახალი ადგილი მინდაო, ამ ბოდიალს დეიჯერებს ან გურული ან ეს მთავრობა? თორემ, ღმერთმა ამრავლოს ქართველი მთასა და ბარში. ახლახან ყური წავკარი, აზერბაიჯანელები მოდიანო… ვიღაც უცხოელებიც აპირებენ, თურმე, მოსვლას. „რკოლების“ დარჭობით არა, კანონიერად იარონ… მე, იქეთ, დაბლობში ვცხოვრობდი. ბაღნობა აქ მაქ გატარებული. მერე მამაჩემმა გორზე გადმოინაცვლა. შვილიშვილებისთვის ვზრუნავ ახლა მე, რომ ჰაერზე იყვნენ. მე და ჩემნაირებმა ვიცით, ვინ ცხოვრობდა და ვინ არა აქ. რაც შეგვიძლია, რჩევას არ დავიზარებთ. ყველაზე კაი მარჩიელი კი იმის მთქმელია: „საბანი საცხამდე გაგწვდება, იქამდე დეიხურეო“. გომისმთაზე დღეს ქვეყნის მოყვარულმა კაცმა ამ პრინციპით უნდა იმოქმედოს, თორემ ბევრ სახლს ჩეიტანს თოვლი სკვარამში… ბუნებას რომ კანონი აქ, იმფერს ვერცერთი მთავრობა ვერ დაწერს, გადოუარს ზედ… _ ჩაფიქრებით გვითხრა მან.
-შენ გურული ლელთ ღუნია უნდა იყო, მგონი _ გავეხუმრეთ ბატონ ამირანს, რაზეც თავადაც იუმორი მოიშველია, რაც გინდათ, ის დამარქვით, მაგრამ მამაჩემმა კაი ხნის წინ ეს სახელი მარგუნაო…
მერე იქვე მყოფებიც ჩაერთნენ მუსაიფში:
_როგორც აქ ვიგებთ და პრესიდან ვეცნობით, 4000-ზე მეტი განაცხადი უკვე მიღებული ყოფილა. მალე ექვსი ათასს გადააჭარბებსო, ამბობენ. სად ასახლებენ ამდენ ოჯახს? კურორტს კურორტი ხომ უნდა ერქვას? რეკრეაციული ზონა ხომ უნდა იყოს? მიხედავენ, ალბათ. კარგია, რომ მთავრობას აქეთ ყურადღება აქვს მომართული, მაგრამ მეტია საჭირო, _ ამბობდნენ ისინი.
გომისმთაზე პირველივე დღეს გამოძახებულ მოქალაქეთა შორის, შეცდომით აღმოჩნდნენ ამოსული ზაურ და თამაზ დუმბაძეები.
_გამოგვიძახეს, ამოვედით. ვნახეთ, რომ სექტორი აღმოჩნდა შეცდომით მითითებული. რა უნდა ვქნათ. დავბრუნდეთ უნდა სახლში და როცა შეგვეხმიანეიბან ამოვალთ, რომ ჩვენი კუთვნილი მიწა დავარეგისტრიროთ. ხარჯია ყველაფერი, წადი-ამოდი… მაგრამ რა ვქნათ? – გვითხრეს მათ.
დღის განმავლობაში, როგორც აქ გვითხრეს, საველ ჯგუფები და მიწის ამზომავები, მხოლოდ პირველ ზონაში მუშაობდნენ.
_ 500 ადამიანი იყო გამოძახებული. თუმცა ნისლმა იმდენად შეუშალა ხელი მიწის ამზომავებს, რომ ოცამდე ადგილის დაზუსტება მოახერხეს შუადღემდე.
ნისლიან სამუშაო დღეზე ხუმრობდა და ირგვლივ თანმხლებ მეგობრებს ახალისებდა ოზურგეთელი დათო დავითულიანი:
_ძლივს გურულები ვნახე გომისმთაზე ამოსული, მაგრამ რამ წამომიყვანა მანდამაინც ამ დილას, ამ ნისლსა და გაუვალობაში, თვალში ძლივს ვიყურები. თქვენ კი გხედავთ კარგად, გეიხარეთ – გვითხრა მან.
გომისმთაზე მიმდინარე პროცესს, ბევრი აქ მყოფი, ხალხის პროვოცირებად აფასებდა მთავრობის მხრიდან.
_სად უნდა დატიონ ამდენი ხალხი? ანდა რა მიდგომაა ეს? სასაფლაოს ჰგავს მთელი გომისმთა. შეხედვა შეგეშინდება. ვთქვათ და, ბევრს აღარ დაურეგისტრირონ ან მიაბრძანონ აქედან, მერე რა მოხდება? გორებს გახედეთ, ამ ბნელშიც მუშაობენ. წამებში იდგმება სახლები. აჭარის რეგიონიდან შემოდიან უფრო. რეკრეაციული ზონააო და წადით, ნახეთ, ადგილი არ დარჩა. მავთულხლართებით შემოღობვაა დაწყებული….- გვეუბნებოდნენ ისინი და ვინაობის დასახელებზე უარს ამბობდნენ.
_რა ვინაობა გინდათ? დირესავითაა თვალში გარჭობილი ეს სიმართლე და შეხედეთ…წინასაარჩევნო ამბავიცაა ეს… ისევ მთავრობა არ აღმოჩნდეს ცუდ დღეში, _ იყო მათი პასუხი.
ჩვენ მარკეტ „გომისმთას“ ვეწვიეთ, სადაც, ბარში გაჟღერებული ინფორმაციის დაზუსტება ვცადეთ – რომ კურორტზე პროდუქტის წარმოუდგენელი სიძვირეა.
_რა, ნენა? ჭორებს ნუ აუჯერებთ. მთლად მასე არაა საქმე. ერთი კილოგრამის რაოდენობით, შაქარი 2 ლარი ღირს, კარტოფილი 1,30 ლარი, ხახვი -1,40, ბადრიჯანი -ერთი ლარი, კიტრიც ასევე ერთი ლარია. პომიდორი სამი ლარი ღირს. ნაყინი _ 70 თეთრი, _ ხალისიანად, სწრაფად გვეუბნებოდა მარკეტის გამყიდველი, ნათელა ბურჭულაძე, თან განმარტავდა, ამ მთაში რომ ამოიტან ამ ყველაფერს, პაწა მეტი კი უნდა აიღოს მომტანმა. მე თუ მკითხავთ აქ ძვირი არაფერი არააო. ასევე ცოტათი განსხვავებული იყო ხორცისა და რძის ნაწარმის ფასი.
ოზურგეთის მუნიციპალიტეტის მერის წარმომადგენელმა გომისმთაზე, ბესო ლომინაძემ გვიამბო, თუ როგორ ხდება ყოველ საღამოს ახალ-ახალი ბოძების ჩუმად დარჭობა, რომელსაც დილით უკვე თავად თხრიან.
_გასაკვირი ამბავია. განსაკუთრებით გომისმის ცენტრს ვმფარველობთ. რაც ბოძები იყო დარჭობილი, ყველა მოვთხარეთ. ასევე, ეკლესიის შემოგარენიც მთლიანად გავასუფთავეთ. ზოგი ეკლესიის გვერდით არჭობენ ბოძებს და მავთულხლართების შემოვლებაც დაიწყეს. მშენებარე ეკლესიის ტერიტორია არის საპატრიარქოს საკუთრება. მთავარი რაც არის _ ოზურგეთის მერის გადაწყვეტილებით, ამ ეტაპზე შეჩერებულია მშენებლობების, სულ ცოტა, 40%. აჭარის და გურიის მოსახლეობა უკვე შეგნებით ეკიდება იმ ფაქტს, რომ აქ სერიოზული კურორტი უნდა აშენდეს და რეკრეაციულ ზონებში არ მოხდეს მშენებლობის დაწყება. განსაკუთრებით გვეხმარებიან თავისუფალი უნივერსიტეტის სტუდენტები, რომლებიც აქ ათი დღით იმყოფებიან. შემდეგ სხვა ჯგუფი ჩაანაცვლებს. იმედი, მომეცა, რომ ქვეყანას ასეთი ახალგაზრდები ააშენებენ. გვეხმარებიან უნებართვოდ დარჭობლი ბოძების მოთხრაში. გამუდმებით ასუფთავებენ ტერიტორიას. მუნიციპალიტეტის მერიამ გადმოგვცა 40 ცალი სანაგვე ურნა. ეს ძალიან კარგია. ყველა ღონეს ვიხმართ, გომისმთაზე პროცესები სწორად და კანონიერად წარიმართოს, მიუხედავად ბევრი სირთულისა, _ გვითხრა ლომინაძემ.
გომისმთაზე იმყოფებოდნენ ოზურგეთის მუნიციპალიტეტის მერიის ზედამხედველობის სამსახურის წარმომადგენლები.
_დღეს აქ ვიმყოფებით იმოტომ, რომ კურორტზე საავტომობილო გზის სამუშაოს დაწყებასთან დაკავშირებით, დავაკვირდეთ, რომელიმე დასახლებულ პუნქტში, სადაც გზა უნდა გავიდეს, ამ კონტურში ხომ არ ექცევა სახლები. დღეს მუშაობაში ნისლმა ძალიან შეგვიშალა ხელი. უამრავი შრომატევადი დღეა წინ, ჯერ სად ვართ. ახლა ვიწყებთ _ გვითხრა სამსახურის წარმომადგენელმა გურამ შარაშენიძემ.
