გომისმთაზე უსახელო “მწვერვალს” დეპუტატებმა სახელი ვერ მიანიჭეს, რადგან ეს “მწვერვალი” ვერ გაიხსენეს

24 სექტემბერს, ოზურგეთის მუნიციპალიტეტის საკრებულოს მორიგი სხდომა შედგა _ ეს, ასევე, იყო ბოლო მოწვევის (2021-2025 წლები) საკრებულოს ბოლო სხდომა.

დღის წესრიგით გათვალისწინებული თერთმეტი საკითხი სხდომის მონაწილეებს საკრებულოს თავმჯდომარემ დავით დარჩიამ გააცნო.

საქართველოს რეგიონებში გასახორციელებელი პროექტების ფონდიდან, ოზურგეთის მუნიციპალიტეტში გასახორციელებელი ინფრასტრუქტურული პროექტების მოწონების თაობაზე, საკრებულოს წევრმა ბექა თოიძემ ისაუბრა.

_ საქართველოს მთავრობის 2013 წლის 7 თებერვლის #23 დადგენილების თანახმად, ოზურგეთის მუნიციპალიტეტის საკრებულომ გადაწყვიტა, რომ აღნიშნული დადგენილებით განსაზღვრული ინფრასტრუქტურული პროექტების შერჩევის პროცედურების და კრიტერიუმების გათვალისწინებით, მოწონებული იქნეს საქართველოს რეგიონებში გასახორციელებელი პროექტების ფონდიდან ოზურგეთის მუნიციპალიტეტში გასახორციელებელი ინფრასტრუქტურული პროექტები, _ თქვა მან.

ბექა თოიძემ ამის შემდეგ დააკონკრეტა, რომ მოხდება ლიხაურის თემში, სოფელ ნიაბაურის და აჭის დამაკავშირებელი გზის რეაბილიტაცია.

_ გზის სიგრძე 1 898 მეტრია და ობიექტის ღირებულება შეადგენს მილიონ ლარზე მეტია, _ განაცხადა მან.

საკითხს საკრებულოს წევრებმა კენჭი დადებითად უყარეს და პერსონალურადაც გამოთქვეს მოწონება.

დღის წესრიგით გათვალისწინებული რვა საკითხი ქუჩების სახელდებას ეხებოდა. თითოეულის განხილვის შემდეგ, შენიშვნა საკრებულოს თავმჯდომარის პირველ მოადგილეს ლავრენტი ბიგვავას ჰქონდა. მან თქვა, რომ სახელდებას შინაარსობრივად ბმა უნდა ჰქონდეს ადგილმდებარეობასთან. მაგალითად კი მოიყვანა ურეკში შემოქმედის ქუჩა.

_ ოზურგეთი მთლიანად შემოქმედის ეპარქიაა და კონკრეტულად სახელის და ადგილის ერთმანეთთან ბმა უნდა ჩანდეს, _ თქვა ბიგვავამ.

საბოლოოდ, საკრებულოს სხდომაზე კენჭი უყარეს და მიიღეს დადგენილებები ურეკში სხვადასხვა ქუჩების სახელდების შესახებ.

სულ რვა ქუჩას მიენიჭა შემდეგი სახელები: დაბა ურეკის ადმინისტრაციულ ერთეულში მდებარე უსახელო ქუჩებს მიენიჭა: “იაკობ შემოქმედელის”, “აფხაზეთის”, შინდისის გმირების”, “ბერი გაბრიელ სალოსის”, შემოქმედის”, ” აკაკი კვანტალიანის”, ასევე, #34 ქუჩას _ “გენერალ გიორგი მაზნიაშვილის” და ექვთიმე თაყაიშვილის ქუჩის მეორე შესახვევს “ქუთაისის” სახელები.

_ 2025 წლის 15 მაისს, დაბა ურეკში მოეწყო შემაჯამებელი შეხვედრა ადგილობრივ მოსახლეობასთან და გაიმართა უსახელო ქუჩისთვის “აფხაზეთის” ან “სოხუმის” სახელის მინიჭების შესახებ, საკრებულოს წევრის, გოჩა მდინარაძის ინიციატივის საჯარო განხილვა, სადაც მოსახლეობამ მხარი დაუჭირა უსახელო ქუჩისთვის “აფხაზეთის” სახელის მინიჭებას. აღნიშნული საკითხის შესწავლის, მოსახლეობასთან კონსულტაციების გამართვის და შემაჯამებელი საჯარო განხილვის შედეგებიდან გამომდინარე, საკრებულოს სივრცით–ტერიტორიული დაგეგმარების და ინფრასტრუქტურის კომისიამ მიიღო გადაწყვეტილება, დოკუმენტაცია გადაეცა საკრებულოს თავმჯდომარისთვის, _ განაცხადეს საკრებულოს სხდომაზე.

მსგავსი განმარტება გაკეთდა თითოეული ქუჩისთვის სახელის მინიჭებასთან დაკავშირებით.

რაც შეეხება ოზურგეთის მუნიციპალიტეტში, გომისმთის ადმინისტრაციულ ტერიტორიაზე მდებარე უსახელო, როგორც დღის წესრიგში იყო ნათქვამი, “მწვერვალისთვის” საქართველოს ეროვნული გმირის, ზაზა დამენიას სახელის მინიჭების შესახებ, დადგენილება არ მიიღეს, რადგან საკრებულოს წევრებმა იკითხეს, კონკრეტულად, რომელი იყო ეს მწვერვალი გომისმთაზე.

_ სადაა ეს მთა? რომელია? ვინ ნახა? მე არ ვიცი, შენ იცი? _ გაისმა აქეთ-იქიდან.

რაკი დამაკმაყოფილებელი პასუხი ვერ მიიღეს, საკითხი აღარ განიხილეს.

ლავრენტი ბიგვავამ, ასევე, ისაუბრა ოზურგეთის მუნიციპალიტეტის საკრებულოს 2025 წლის მეოთხე კვარტლის სამუშაო გეგმის დამტკიცების შესახებ.

მან დაკონკრეტებით ისაუბრა 2025 წლის მეოთხე კვარტლის სამუშაო გეგმაზე. თითოეულ სხდომაზე განსახილველ საკითხებზე, სხდომის ჩატარების დროსა და ადგილებზე, საკითხის მომზადებაზე პასუხისმგებელ პირებზეც მიუთითა. კერძოდ, დარჩენილი სამი თვის მანძილზე ოზურგეთის მუნიციპალიტეტის საკრებულო ხუთ სხდომას ჩაატარებს, სადაც ძირითადად განსახილველი საკითხები იქნება 2025 წლის მესამე კვარტლის ბიუჯეტის შესრულებისა და სარეზერვო ფონდის გამოყენების ანგარიშების განხილვა, იჯარით გაცემული არასასოფლო-სამეურნეო დანიშნულების მიწის მიზნობრივად გამოყენების ფაქტობრივი მდგომარეობის შესახებ, ასევე, ანგარიშის მოსმენა და სხვა.

_ ესტაფეტას გადავცემ ახალ საკრებულოს, რომელშიც იქნებით თქვენც და ასევე, იქნებიან ახალი წევრები. რა თქმა უნდა, ის გააგრძელებს წარმატებულ საქმიანობას. ეს არის წესი და ეს არის ლოგიკა, _ თქვა გამოსვლის დასასრულს ლავრენტი ბიგვავამ, რომელიც ახალი მოწვევის საკრებულოს წევრთა სიაში არ ფიგურირებს.

თუმცა, კულუარულად ამბობენ, რომ ის, როგორც გამოცდილი კადრი, საქმის მცოდნე, არ დარჩება “ოფსაითში” და არჩევნების შემდეგ კვლავ გამოჩნდება რომელიმე პოზიციაზე ოზურგეთის საკრებულოში.