გორის მერის მოადგილე თანამდებობიდან გადააყენეს. გელა კაპანაძის უფლებამოვალეობის შესრულებისგან გათავისუფლების მიზეზად გაუხარჯავი 2 მილიონი სახელდება, თუმცა თავად მერიაში ოფიციალური განმარტება არ გაკეთებულა.
გელა კაპანაძის ადგილი ერასტი ერიჯანაშვილმა დაიკავა. ის ალექსანდრე ხოჯევანიშვილის დაქვემდებარებაში მუშაობდა:
„ბატონი ალექსანდრე ხოჯევანიშვილი არის გამოცდილი მენეჯერი, საკმაოდ კვალიფიციური კადრი. მასთან მე ვმუშაობდი, დაახლოებით, ერთი თვის განმავლობაში, შევიძინე დიდი გამოცდილება და სწორედ აღნიშნულ გამოცდილებას მოვახმარ ჩემს საქმიანობას. ბატონმა კონსტანტინე თავზარაშვილმა შემომთავაზა აღნიშნული თანამდებობა და შესაბამისად, მე დავთანხმდი დიდი სიხარულით,“ – ამბობს მერის მოადგილე, ერასტი ერიჯანაშვილი.
თავად გორის მუნიციპალიტეტის მერი, მოადგილის თანამდებობიდან წასვლის მიზეზად გელა კაპანაძის სურვილს ასახელებს:
„რამდენიმე დღის უკან დაწერა ყოფილმა მოადგილემ, გელა კაპანაძემ, განცხადება სამსახურიდან წასვლის თაობაზე და დღეს მე უკვე ახალი მოადგილე მყავს, ეს არის ერასტი, რომელიც მუშაობდა ძალოვან სტრუქტურაში, ის არის ახალგაზრდა კადრი, გორელი კადრია, ამიტომ, ჩვენ ვეძებთ ახალგაზრდა კადრებს, რომ დავაბრუნოთ თბილისში წასული და სხვა ქალაქებში. მას აქვს ძალიან კარგი მენეჯერული თვისებები და სწორედ ამ თვისებების შედეგად მე შევთავაზე, მან მიიღო ჩემი შეთავაზება და დაიწყო მან მუშაობა ჩემს მოადგილედ. გუბერნატორი არ მინიშნავს და არ ნიშნავს ჩემი სამსახურის თანამშრომლებს იმიტომ, რომ გუბერნატორი ასეთ საქმეებში არ ერევა. ეს არის ჩემი პირდაპირი პრეროგატივა, რომ დავნიშნო მოადგილეები და არ დავნიშნო მობილობის ან კონკურსის წესით, პირდაპირ შემიძლია მე დავნიშნო, ამიტომ ეს არის ჩემი გადაწყვეტილება,“ – განაცხადა კონსტანტინე თავზარაშვილმა.
