უკრაინაში რუსული აგრესია გრძელდება. მდგომარეობა ძალიან დაძაბულია. უკრაინა იბრძვის და დანებებას არ აპირებს. ამ სიტუაციაში დიდი როლი მსოფლიოს დახმარებასა და გვერდში დგომას ენიჭება. უკრაინას მსოფლიო სპორტული თანამეგობრობაც გვერდში ამოუდგა.
საკალათბურთო ევროლიგაში, მიუნჰენის „ბაიერნთან“ მატჩის ჩასატარებლად გამზადებული მოსკოვის „ცსკა“ გერმანულმა მხარემ თავის ქვეყანაში არ შეუშვა. კატალონიურ „ბარსელონას“ რუსეთში ზედიზედ ორი შეხვედრა უნდა ჩაეტარებინა, მაგრამ აგრესორ ქვეყანაში გამგზავრებაზე უარი განაცხადა.
გუშინ „უეფა“-ს აღმასკომის საგანგებო სხდომაზე გადაწყვეტილება მიიღეს ჩემპიონთა ლიგის მიმდინარე გათამაშების ფინალი სანკ პეტერბურგის ნაცვლად პარიზში გაიმართოს. მატჩი 28 მაისს „პარკ დე პრენსის“ სტადიონზე ჩატარდება.
გელზენკირხენის „შალკე“ მაისურიდან „გაზპრომის“ ლოგოს წაიშლის. ამის შესახებ ოფიციალური განცხადება გუშინ გერმანული გუნდის ვებგვერდზე გამოქვეყნდა. ბოლო დროს განვითარებული მოვლენების გამო კლუბის მაისურზე „გაზპრომის“ ნაცვლად „შალკე 04“ დაიწერება.
გერმანიის პირველ და მეორე ბუნდესლიგაში მატჩები უკრაინაზე რუსეთის თავდასხმისა და ქვეყანაში მიმდინარე საომარი მოქმედებების გამო წუთიერი დუმილით დაიწყება.
„DFL რუსეთის უკრაინაზე თავდასხმას მკაცრად აფასებს. სპორტის ღირებულებებთან ომი ნებისმიერი ფორმით შეუთავსებელია. ჩვენ დაზარალებულების გამო მწუხარებას გამოვთქვამთ. DFL აღნიშნულ საკითხთან დაკავშირებით ეროვნულ და საერთაშორისო ასოციაციებთან მუდმივ კონტაქტს ინარჩუნებს. DFL პირველი და მეორე ბუნდესლიგის კლუბებს მატჩების წინ წუთიერი დუმილისკენ მოუწოდებს, რაც სოლიდარობის, თანაგრძნობისა და მშვიდობისკენ მისწრაფების ნიშანი იქნება.“ – წერია გერმანიის საფეხბურთო ლიგის განცხადებაში.
ჩოგბურთში „ATP Challenger“ ტურმა ტვიტერზე გამოაქვეყნა ინფორმაცია, რომ ჩელენჯერის სერიის საჩოგბურთო ტურნირი, რომელიც მოსკოვში მომავალ კვირას უნდა გამართულიყო, აღარ გაიმართება, მოთამაშეთა უსაფრთხოებაზე შემაშფოთებელი ცნობების გამო, რაც დაკავშირებულია რუსეთსა და უკრაინას შორის განვითარებული მოვლენებით.
უკრაინის ფეხბურთის ფედერაციამ „ფიფა“-ს და „უეფა“-ს თხოვნით მიმართა, რუსულ ნაკრებებსა და კლუბებს ამ ორგანიზაციების ეგიდით გასამართ ტურნირებში მონაწილეობა აუკრძალონ.
ფაქტობრივად, ეს ამ ორგანიზაციებიდან რუსეთის გარიცხვას ნიშნავს. რამდენად არიან „ფიფა“ და „უეფა“ ამაზე წამსვლელი, ძნელი სათქმელია. ეს ყველაფერი დამოკიდებულია იმაზე, თუ რამდენად ყოვლისმომცველი და მკაცრი იქნება სანქციები, რომელსაც რუსეთს დაუწესებენ.
ჯერჯერობით „უეფა“-მ სანკტ-პეტერბურგს ჩემპიონთა ლიგის ფინალური მატჩის ჩატარების უფლება წაართვა.
ამის პარალელურად „ფიფა“-ს პრეზიდენტმა ჯანი ინფანტინომ კომენტარი გააკეთა მსოფლიოს ჩემპიონატის საკვალიფიკაციო მატჩების „ფლეი ოფის“ რუსეთიდან სხვა ქვეყანაში გადატანაზე.
„ჩვენ ვალდებულები ვართ, სიტუაცია სერიოზულად გავაანალიზოთ და გარწმუნებთ, ამ საკითხს ოპერატიულად განვიხილავთ. თუმცა იმედი მაქვს, პრობლემა მოგვარდება მატჩამდე დიდი ხნით ადრე“. – განაცხადა ჯანი ინფანტინომ.
„ფლეი ოფის“ პირველი მატჩები 24 მარტს გაიმართება. რუსეთმა მოსკოვში პოლონეთს უნდა უმასპინძლოს. პოლონელებმა უკვე მოითხოვეს თამაშის მოსკოვიდან გადატანა. ასევე შვედეთმა და ჩეხეთმა, რომლებიც 24 მარტს ერთმანეთში თამაშობენ (გამარჯვებული რუსეთ-პოლონეთს შორის მოგებულს შეხვდება), განაცხადეს რომ არ აპირებენ მოსკოვში ჩასვლას.
რუსეთის ფედერაციის მიერ უკრაინის ტერიტორიაზე საბრძოლო მოქმედებების დაწყებას არაერთი სპორტსმენი გამოეხმაურა. უკრაინული ფეხბურთის ლეგენდა ანდრეი შევჩენკომ „ინსტაგრამის“ მეშვეობით შემდეგი განცხადება გაავრცელა:
„რუსეთმა სრულმასშტაბიანი ომი დაიწყო. ჩემი ქვეყნის მოსახლეობა, მათ შორის, ჩემი ოჯახიც, საფრთხეშია. უკრაინას და მის მოსახლეობას მშვიდობა და ტერიტორიული მთლიანობა სურს.
გთხოვთ, დაეხმარეთ ჩვენს სამშობლოს და მოვუწოდოთ რუსეთს, აგრესია შეწყვიტოს!
ჩვენ მხოლოდ მშვიდობა გვსურს, ომი არ გვჭირდება!“
