13 ნოემბერს, გურიის გუბერნატორი ზურაბ ნასარაია ადგილობრივ ჟურნალისტებს შეხვდა და მისალმების შემდეგ განმარტა, რომ ის აპირებს ხშირად შეხვდეს მედიას, გააცნოს მათ ინფორმაცია მხარეში დაგეგმილი ყველა საქმიანობის შესახებ.
ამჯერად, ზურაბ ნასარაიამ ისაუბრა გურიის რეგიონში 2019 წლის გეგმებზე. პრეზენტაციის წარდგენისას მან ხაზგასმით აღნიშნა, რომ ადგილებზე გაცილებით მეტი იციან ჟურნალისტებმა არსებული პრობლემების შესახებ, ვიდრე იმ მოხელეებმა, რომლებიც ხშირად ამბობენ, რომ ყველაფერი კარგადაა და საქმეები კეთდება, სინამდვილეში კი ხშირად ასე არ არის. ამიტომ, ის სიამოვნებით მოუსმენს თითოეულ ჟურნალისტს.
პრეზენტაციაზე რწმუნებულმა დეტალურად ისაუბრა გურიის რეგიონში 2019 წელს დაგეგმილი ინფრასტრუქტურული სამუშაოების შესახებ. კონკრეტულად კი, ამ დროში დასრულდება სამი ობიექტის: საჯავახო-ჩოხატაური-ოზურგეთი-ქობულეთის, ოზურგეთი-ნატანების-ურეკის და ჩოხატაურში, ბუკისციხე-ზემო სურების დამაკავშირებელი გზების რეაბილიტაცია.
2019 წელს, ასევე, მსოფლიო ბანკის დაფინანსებით დაგეგმილია ტენდერის გამოცხადება მოვლა-შენახვის მრავალწლიანი პროექტის გახორციელებაზე, რომლის ფარგლებში 70 კმ-მდე გზის რეაბილიტაციაა დაგეგმილი სამივე მუნიციპალიტეტში. ამავე წელს დასრულდება შვიდი ობიექტის ნაპირსამაგრი სამუშაოები მხოლოდ ოზურგეთისა და ლანჩხუთის მუნიციპალიტეტებში. აქ შედის აჭისწყლის გახმაურებული ნაპირსამაგრი სამუშაოების შესრულება ოზურგეთის მუნიციპალიტეტის სოფელ ლიხაურში.
რაც შეეხება საჯარო სკოლებს, გუბერნატორმა აღნიშნა, რომ აქამდე მხოლოდ განათლების სამინისტრო აკეთებდა ამ საქმეს. ახლა მოხდება დეცენტრალიზაცია და გადავა მუნიციპალიტეტებზე. სამივე მუნიციპალიტეტში სკოლების რეაბილიტაციისთვის განკუთვნილია: ლანჩხუთი _ 270 ათასი ლარი, ოზურგეთი 520 ათასი ლარი და ჩოხატაური _ 200 ათასი ლარი.
გუბერნატორმა, სლაიდებით ჩვენებისას აღნიშნა, რომ 2019 წელს განსაკუთრებული აქცენტი სტიქიის პრევენციაზე დაისმება. ნაპირსამაგრი სამუშაოების ფარგლებში, ერთ-ერთი მთავარია სოფელ გრიგოლეთში ზღვის სანაპირო ზოლში პრევენციული ღონისძიებების სამუშაოები. დაგეგმილია ტენდერი ერთ ობიექტზე: საჯავახო-ჩოხატაური-ოზურგეთი-ქობულეთის გზის ცალკეული დაზიანებული მონაკვეთების სარეაბილიტაციოდ. ხოლო მუნიციპალური განვითარების ფონდის მიერ დაფინანსდება ქალაქ ოზურგეთი-ნარუჯა-ლაითურის გზის რეაბილიტაცია, ასევე, დაბა ურეკში ქუჩების და ბულვარის მოწყობა.
სულ ნაპირდაცვისა და პრევენციული რეაბილიტაციის, ასევე სანიაღვრე არხების რეაბილიტაციის და გაწმენდის მიმართულებით გათვალისწინებული სამუშაოებისთვის ათი მილიონი ლარია გათვალისწინებული.
ზურაბ ნასარაიამ ისაუბრა სოფლის მხარდაჭერის პროგრამაზეც, რომელიც აქამდე შეჩერებული იყო და 2019 წლიდან კვლავ აღდგება. პროგრამით ლანჩხუთის მუნიციპალიტეტში განსაზღვრულია 374 ათასი ლარი, ოზურგეთში _ 537 ათასი ლარი, ჩოხატაურში _ 365 ათასი ლარი.
“გურია ნიუსის” კითხვაზე, ისევ ადრინდელი ფორმით მოხდება სოფლის პროგრამით განსაზღვრული თანხის განკარგვა სოფლებში და არის თუ არა ეს რაოდენობა მცირე, ნასარაიამ განმარტა, რომ ცვლილება არ იქნება განკარგვის მხრივ, ამაში მონაწილეობას მიიღებს სოფლის მოსახლეობა. თანხა კი არის შემცირებული, თუმცა გაზრდილია სხვა პროექტების მიმართულებით.
რაც შეეხება საბავშვო ბაღების მშენებლობას, ამ მხრივ ლანჩხუთის და ჩოხატაურის მუნიციპალიტეტებშია დაგეგმილი ახალი სკოლამდელი დაწესებულებების აგება, რისთვისაც 2 500 000 ლარია განსაზღვრული.
ამბულატორიების მშენებლობის მხრივ _ 73 ამბულატორიიდან, 66 საჭიროებს რემონტს. 4 ამბულატორიისთვის ახალი შენობაა საჭირო. სამი ამბულატორია წესრიგშია.
გურიის რეგიონში სამელიორაციო ინფრასტრუქტურის დამშრობი სისტემების რეაბილიტაციისთვის შედგენილია გეგმა, რომელიც 7 890 ჰა ფართობს მოიცავს. ეს ძირითადად გარდამავალ პროექტებს ექვემდებარება 2019-2020 წლების განმავლობაში, ოზურგეთსა და ძირითადად ლანჩხუთში.
სხვადასხვა საექსპლუატაციო ღონისძიებებზე, რომელიც ზედაპირულ და ავარიულ-აღდგენით რემონტს მოიცავს, 150 ათასი ლარი გამოიყოფა. რამდენი იქნება მთლიანი თანხა, რომელიც 2019 წელს გურიაში ამ მასშტაბური ინფრასტრუქტურული სამუშაოებისთვის დაიხარჯება, ჯერ დაზუსტებული არ არის.
ზურაბ ნასარაიამ განმარტა, რომ ყოველი მომავალი სიახლის შესახებ, ოპერატიულად მოიწვევს და გააცნობს ჟურნალისტებს.
