გუშინ რუსეთში ფეხბურთელთა მორიგი მსოფლიო ჩემპიონატი დაიწყო. ისლამისტი ტერორისტების დიდი მუქარის მიუხედავად მოსკოვის „ლუჟნიკების“ სპორტულ სარბიელზე „მუნდიალი – 2018“- ის საზეიმო გახსნის ცერემონიალი და პირველი ოფიციალური შეხვედრა ყოველგვარი ექსცესების გარეშე წარიმართა.
რუსულ ჩემპიონატს რიგი ქვეყნების პირველმა პირებმა ბოიკოტი გამოუცხადეს და ამ ქვეყანაში ჩასვლისაგან თავი შეიკავეს. ამისი უმთავრესი მიზეზი რუსეთის მიერ დონეცკელი და ლუგანსკელი სეპარატისტების მხარდაჭერა, ასევე რამდენიმე თვის წინ ლონდონში მოწამლული ყოფილი რუსი მზვერავი სერგეი სკრიპალის საქმე გახლდათ. ალბათ გახსოვთ რომ მაშინ დიდმა ბრიტანეთმა მსოფლიოს წამყვან ქვეყნებს ჩემპიონატის ბოიკოტისაკენ მოუწოდა.
რუსული მუნდიალი ობსტრუქციას გადაურჩა, გუშინ ის ოფიციალურად გაიხსნა კიდეც, მაგრამ ამ ცერემონიალს მხოლოდ თითებზე ჩამოსათვლელი ქვეყნების მეთაურები ესწრებოდნენ. რუსეთის პრეზიდენტის პრეს მდივნის დმიტრი პესკოვის ინფორმაციით გუშინდელი გახსნის საზეიმო პროცესს მხოლოდ 17 ქვეყნის პირველი პირი ესწრებოდა, რომლებიც შემდეგ ქვეყნებს წარმოადგენდნენ: აზერბაიჯანი, სომხეთი, ბელორუსი, ბოლივია, ყაზახეთი, ყირგიზეთი, კორეის დემოკრატიული რესპუბლიკა, ლიბანი, მოლდოვა, პანამა, პარაგვაი, რუანდა, საუდის არაბეთი, ტაჯიკეთი და უზბეკეთი. რაოდენ გასაკვირიც არ უნდა იყოს ზემოთჩამოთვლილი ქვეყნების ლიდერების გვერდით არააღიარებული აფხაზეთისა სამხრეთ ოსეთის პირველი პირებიც იმყოფებოდნენ.
ჩემპიონატის გახსნის შეხვედრას რუსეთის პრეზიდენტი ვლადიმერ პუტინიც დაესწრო. რუსეთი-საუდის არაბეთის შეხვედრის შემდეგ, რომელიც მასპინძლების დამაჯერებელი მოგებით დასრულდა – 5;0, პუტინმა ეროვნული გუნდის მთავარ მწვრთნელ სტანისლავ ჩერჩესოვს დაურეკა და წარმატება მიულოცა. ჩერჩესოვი ამ „ისტორიულ ჟამს“ პრესკონფერენციაზე იმყოფებოდა. მას ჟურნალისტებისათვის ბოდიშის მოხდა და დროებით დარბაზის დატოვება მოუწია. მსოფლიო ჩემპიონატების ისტორიაში ეს პირველი შემთხვევა გახლდათ როდესაც მატჩისშემდგომი პრესკონფერენცია რაიმე მიზეზის გამო გარკვეული დროით შეჩერდა. ფიფა-ს მკაცრი რეგულაციები გააჩნია და იგივე პრესკონფერენციის შეჩერება ამ წესების უხეშ დარღვევას წარმოადგენს.
დღეს მსოფლიო პირველობა უფრო გახურდება და სამი შეხვედრა გაიმართება. საინტერესოა რომ პირველობას რამდენიმე არაოფიციალური გამარჯვებული უკვე ჰყავს. ეს საპატიო წოდება რამდენიმე გულშემატკივარმა მოიპოვა, რომლებიც რუსეთში ერთობ ორიგინალური ხერხით ჩაბრძანდნენ.
გერმანელი ჰუბერტ ვირტი 65 წლის ბრძანდება. ის ქალაქ ფორჰჰაიმიდან ბრძანდება და რუსეთში 1936 წელს გამოშვებული ტრაქტორით ჩაბრძანდა. ამ მოგზაურობაში მეგზურობას ერთგული ოთხფეხა მეგობარი – მეტისი ჰექსი უწევდა. ტრაქტორით გადაადგილების მოყვარული დღე-ღამეში 100 კილომეტრს გადიოდა. ჰერ ჰუბერტი უკვე მოსკოვში იმყოფება და 17 ივნისისათვის ემზადება. ამ დღეს მსოფლიოს ამჟამინდელი ჩემპიონი გერმანიის ნაკრები მოსკოვის „ლუჟნიკების“ სტადიონზე მექსიკის ეროვნულ გუნდს დაუპირისპირდება.
ორმა ისლანდიელმა ფეხბურთის მოყვარულმა რუსეთში ჩასვლის სხვა გზა აირჩია. გეიზერების ქვეყნის ახალგაზრდა მოქალაქეებმა კიარტანსონმა და იონსონმა ცოტა ხნის წინ ერთ-ერთ ადგილობრივ რადიოკონკურსში ავტომანქანა „ნივა“ მოიგეს. ისლანდიის ეროვნული გუნდის თაყვანისმცემლებმა რუსეთამდე ჩასვლა ამ მანქანით გადაწყვიტეს. მამაცი მოგზაურები უკვე მოსკოვში იმყოფებიან და ხვალ „სპარტაკის“ სტადიონზე არგენტინა – ისლანდიის შეხვედრას დაესწრებიან. რუსეთის დედაქალაქში ჩამოსვლამდე მათ 15 ათასი კილომეტრი დაფარეს. საინტერესოა რომ მათ გადაადგილებას ფირზე ფიფა-ს სპეციალური ჯგუფი აღბეჭდავდა, რომელიც მსოფლიო პირველობის დასრულების შემდეგ ისლანდიელებზე ერთსაათიან დოკუმენტურ ფილს დაამონტაჟებს.
ნებისმიერი საფეხბურთო მსოფლიო პირველობის წინ არა ერთი წინასწარი პროგნოზი გამოითქმება. გამონაკლისი არც გუშინ დაწყებული ჩემპიონატი აღმოჩნდა.
ცნობილი შვედი მოთამაშე ზლატან იბრაგიმოვიჩი საკუთარი ქვეყნის ეროვნული გუნდის შემადგენლობაში ვერ მოხვდა და რუსეთში მხოლოდ ტურისტის სტატუსით აღმოჩნდა. „ლოს ანჯელეს გელექსის“ თავდამსხმელის პრიგნოზით, მიმდინარე ჩემპიონატს რუსეთის ეროვნული გუნდი მოიგებს. ამისი მიზეზი შვედმა შემტევმა არ ახსნა. ალბათ ეს მაინც მის კაპრიზსა და მასპინძლების გულის მოგებას უნდა დავაბრალოთ.
რუსეთს წარმატება, ოღონდ ნახევარფინალში გასვლა უწინასწარმეტყველა თურქეთის ნაკრების ამჟამინდელმა მთავარმა მწვრთნელმა მირჩა ლუჩესკუმაც. რუმინელი ფეხბურთის სპეციალისტის აზრით მსოფლიო პირველობის გამარჯვებული ბრაზილიის ნაკრები აღმოჩნდება.
უფრო „ობიექტური“ წინასწარი პროგნოზები გააკეთა ქალაქ პერმის უნივერსიტეტის ფიზიკის ფაკულტეტის სტუდენტი ვიქტორ ზაკოპაილოს მიერ შექმნილმა ხელოვნური ინტელექტის მქონე რობოტმა. მან მსოფლიო ჩემპიონატზე წარმატება გერმანიის ნაკრებს მიანიჭა. მეორე მესამე პოზიციებზე კი ბრაზილია და არგენტინა აღმოჩნდებიან. საინტერესოა რომ იბრაგიმოვიჩისა და ლუჩესკუს მიერ „რეკლამირებული“ რუსეთის ნაკრებს „ჭკვიანმა მანქანამ“ მხოლოდ მერვედფინალამდე მისვლა უწინასწარმეტყველა. ამ სტადიაზე რუსები ესპანეთს შეახვედრა და წაგებაც გამოუწერა.
დღეს მსოფლიო პირველობაზე მორიგი სამი შეხვედრა გაიმართება. თბილისის დროით 16.00 საათზე ქალაქ ეკატერინბურგში ლუის სუარესისა და ედინსონ კავანის ურუგვაი უსალაჰო ეგვიპტეს დაუპირისპირდება. 19.00 საათზე სანკტ პეტერბურგში ურთიერთობას მაროკო და ირანი გაარკვევენ, 22.00 საათზე კი ქალაქ სოჭში დღის უმთავრესი დაპირისპირება გველის – ესპანეთი – პორტუგალია.
