რამდენიმე დღის წინ ბლოგერმა გურამ შეროზიამ საკუთარ youtube არხზე გამოაქვეყნა თავისი დაწერილი სიმღერა “მომენატრები” კლიპთან ერთად, რომელიც მომღერალ ბარბარე სამხარაძესთან დუეტში იმღერა. სიმღერამ საზოგადოების საკმაოდ დადებითი შეფასება დაიმსახურა და 2 დღეში 40000 ნახვაც დააგროვა…
„გურია ნიუსი“ გურამ შეროზიას ესაუბრა.
_ ვის ეძღვნება ეს სიმღერა?
_ ყველას, ვინც აღარ არიან ჩვენს ცხოვრებაში… ან შიგადაშიგ ქრებიან და რაღაც მნიშვნელოვანი კვალს გვიტოვებენ. ოჯახის წევრები, ემიგრანტები, ბავშვობა ან ჩვენი განვლილი ცხოვრება… ჩვენს ცხოვრებას ყოველთვის გასდევს მონატრების მოტკბო გრძნობა, რომელიც არასოდეს არ მასევდიანებს. პირიქით, როცა ვიღაც ან რაღაც მენატრება, ყოველთვის ვიხსენებ, როგორც გემრიელ მოგონებას, ან მაბედნიერებს ისევ შეხვედრის იმედი… ტექსტურადაც ასეა სიმღერაში გადანაწილებული.
_ კოკოს ეძღვნება ეს სიმღერა?
_ შემთხვევით მიეძღვნა. სიმღერა კოკოს გაცნობამდე დავწერე. დაახლოებით, 5-6 თვის წინ, როცა დავფიქრდი რამდენი რაღაც მენატრება და კიდევ მომენატრება, რადგან ფიზიკურად შეუძლებელია, ყველაფერს თანაბრად დაუთმო დრო.
ზუმში ვსაუბრობდით მე და კოკო ვიდეოზარით და თითქოს წავედით იქითკენ, რომ ძალიან გვირთულდება კომუნიკაცია შორიდან და ერთმანეთს ტყუილად “ვაკავებთ”… როცა მითხრა მომენატრებიო, ყურში რაღაცნაირად მენიშნა, თითქოს გულისხმობდა იმას, რომ ვეღარ ვნახავდი ასე ხშირად და მოვენატრები… გამახსენდა, რომ ჩემს სიმღერასაც “მომენატრები” ჰქვია და იმ წამს გადაწყდა, რომ კოკო ყოფილიყო ჩემს სიმღერაში. შეიძლება რაღაცები დასრულდეს, მაგრამ ის, რაც ასე ძალიან მაგრად დაიწყო, არ უნდა მიეცეს უკვალო დავიწყებას. მინდოდა, რაღაც კვალი დაეტოვებინა და კოკოს კვალი არის ჩემს კლიპში, რომელიც რამდენჯერაც არ უნდა ვნახო, ყოველთვის ძალიან ბედნიერად გამახსენდება.
_ ვინ ან რა არის ამ სიმღერის დაწერის შთაგონების წყარო?
_ რამდენიმე მოვლენა ერთად, კონკრეტული ადამიანები არა, მაგრამ ბევრი ადამიანიც მენატრება. აი, მაგალითად, როცა მთავრდება ჩემთვის რამე ურთიერთობა, ვიღაცები თუ გაბოროტდებიან ან მწარდებიან, მე პირიქით, მადლიერი ვარ, ოდესღაც მასთან კარგად ვიყავი. ნეგატივის გრძნობა არავისადმი არ მაქვს და შემიძლია ვთქვა, რომ ყოფილიც კი მომნატრებია რაღაცა მომენტებში.
_ ამ სიმღერას ბარბარა სამხარაძესთან ერთად მღერით, რატომ ბარბარა?
_ მუზასავით არის. ჩემი მუზა იყო ბარბარე. რომ დავწერე ეს სიმღერა, ვუკრავდი და ვმღეროდი, ესეც დუეტში წარმომედგინა. ჩემს ტემბრს ძალიან უხდება ქალის ტემბრი. კონკრეტულ სიმღერაში, კონკრეტული ქალის ტემბრი და ამ სიმღერას რომ ვუკრავდი, პირველი, ვინც გამახსენდა იყო ბარბარა. იგი გამოჩენის დღიდან ძალიან მომწონს და კეთილგანწყობილი ვარ მის მიმართ. ყოველთვის მინდოდა ასე შორიდან რომ ვიცნობდი, მქონოდა რაღაც უფრო ახლო კავშირი და ასე საინტერესოდაც შედგა…
_ საზოგადოების მხრიდან საკმაოდ დადებითი შეფასებები მოჰყვა “მომენატრების”. რატომ სევდიანი სიმღერები _ კითხვას თქვენი გამომწერები გისვამენ…
_ ასეთი ადამიანი ვარ. უფრო მელანქოლიკი, ვიდრე _ სევდიანი. მიდრეკილი ვარ დრამისკენ. არ ჩანს ეს, იმიტომ, რომ ძალიან მიყვარს იუმორიც და გართობაც. როგორ ცუდ ხასიათზეც არ უნდა ვიყო, გარშემომყოფები ამას ვერ იგრძნობენ. მეორე მხრივ, სატელევიზიო შოუებში სულ მოჩხუბარს მხედავდნენ. ინტრიგანი, მძიმე ტიპი ვგონივარ, თუმცა, ახლოს რომ გამიცნობენ, მერე ვგონივარ მხიარული, მარტივად საკომუნიკაციო და მარტივი. რელურად კი ამის მიღმა ძალიან ბევრი სენტიმენტებია. მაგალითად, ჩემი წარსული ცხოვრება, რომელიც გამოვიარე, რაღაცები რომლებსაც ახლაც გავდივარ და სულ თან მაქვს ხოლმე ეს სენსიტიური მხარე, რომელსაც სიმღერებში გამოვხატავ.
_ ამ სიმღერამ და მისმა კლიპმა გაამართლა თქვენი მოლოდინები საზოგადოების შეფასებების კუთხით?
_ ყოველთვის ასე „სტავკასავით“ არის ჩემი მოლოდინი, რომ უნდა მქონდეს 100 000 ნახვა. როგორც კი გადასცდება ამ ნიშნულს, ეს ნიშნავს, რომ თავი არ მომეჭრა და გეგმა მინიმუმი შეასრულა. ამ კლიპს 2 დღეში 40 000 ნახვა აქვს და მალე გადასცდება 100 000-ს. მშვიდად ვარ, რადგან გეგმა მინიმუმი არის უკვე. ცხოვრებაში სულ წინ მივდივარ და არ მინდა, რომ ეს ტემპი “დავაგდო” ვცდილობ, რომ ყველაფერში გავუმჯობესდე.
_ მომავალში უნდა ველოდოთ თქვენგან სხვა სიმღერებს?
_ უკვე ჩაწერილი მაქვს კიდევ ერთი დუეტი, ძალიან საინტერესო მომღერალთან, რომელსაც უკვე ბევრი წელია თვალს ვადევნებ. ეს ბოლოა. ძალიან საინტერესო ხმა აქვს 2-3 თვეში კლიპის სახით ახალ ნამუშევარს იხილავს ქართველი საზოგადოება. ისევ დრამა და ისევ მელანქოლია. ოღონდ ეს ბოლოა _ მესამე და სამართალი.
„გურია ნიუსი“ წარმატებას უსურვებს გურამ შეროზიას პროფესიულ საქმიანობაში.
