„გურია და გურულები“_ ასე ჰქვია ირაკლი მახარაძის ახალ წიგნს, რომლის პრეზენტაციაც გუშინ საღამოს, თბილისში მდებარე წიგნების მაღაზია „შაქრო ბაბუაში“ შედგა.
წიგნი გამომცემლობა „არტანუჯის“ სერია „თან საკითხავის“ ფარგლებში გამოიცა და 150 ამბავს აერთიანებს.
როგორც ავტორი „გურია ნიუსთან“ საუბრისას ამბობს, გურიის შესახებ წიგნში შესულ ამბებს რამდენიმე წლის განმავლობაში აგროვებდა, წიგნად გამოცემის იდეა კი მეგობარმა, კახა თოლორდავამ მიაწოდა და ამ იდეის რეალიზებისთვის გამომცემლობა „არტანუჯის“ დამფუძნებელთან, ბუბა კუდავასთან მისვლა ურჩია.
„წიგნში შესული ამბები ეხება გურიას, მის ისტორიას, ეთნოგრაფიას. აქ გაერთიანებულია ის ამბები, რომლებსაც ვაგროვებდი წლების განმავლობაში. წიგნში მოთხრობილია საიდან გაჩნდა გურიის დასახელება, შუა საუკუნეების და მე-19, მე-20 სააუკუნის ის ამბებია აღწერილი, რაც დაატყდა საქართველოს და განსაკუთრებით, გურიას. ყველაფერი დაიწყო იმით, რომ გამოფენაზე ვიყავი და ჩემმა მეგობარმა კახა თოლორდავამ მითხრა, ბუბასთან მიდი და გურიის შესახებ წიგნის გამოცემის იდეა შესთავაზეო. მეც მივედი და ბუბამ აიტაცა ჩემი წინადადება. ასე გამოვუშვით წიგნი, რომელშიც 150 ამბავია შესული, თუმცა, უფრო მეტიც შეიძლებოდა ყოფილიყო“, _ ამბობს წიგნის ავტორი.
როგორც გამომცემლობა „არტანუჯის“ დამფუძნებელი ბუბა კუდავა ჩვენთან საუბრისას აღნიშნავს, საზოგადოების იმ ნაწილს, რომელიც გურიაში არ არის ნამყოფი, საქართველოს ეს შესანიშნავი კუთხე, ირაკლი მახარაძის წიგნის წაკითხვითაც შეუყვარდება.
მისივე თქმით, წიგნში შესული ამბები, დააინტერესებს, როგორც მკვლევარებს, ასევე, მოსწავლეებს.
„მეორე წელია რაც გამომცემლობა არტანუჯმა დაიწყო სერია „თან საკითხავის“ ფარგლებში წიგნების გამოცემა. არის საინტერესო ამბები თავმოყრილი მკითხველთა ფართო საზოგადოებისთვის. ეს ამბები არ არის ერთმანეთთან დაკავშირებული და შესაძლებელია, ნაწილ-ნაწილ წაკითხვა. გარდა ამისა, არის მოსახერხებელი მგზავრობისას, დასვენებისას და ისეთ პერიოდებში, როდესაც გაბმულად კითხვა ჭირს სხვადასხვა მიზეზის გამო. ამ სერიის ფარგლებში გამოცემულია 28 წიგნი და გამოცემა გაგრძელდება. პრინციპი არის, რომ აქ თავმოყრილი ამბები მოცულობით არ იყოს დიდი და იყოს საინტერესო საკითხავი. გამოცემული წიგნები ხშირად განსხვავდება თემატურად ერთმანეთისგან. ირაკლი მახარაძის წიგნი „გურია და გურულები“ 28-ე და ამავდროულად, პირველი გამოცემაა, რომელიც კონკრეტულად ერთ კუთხეს ეხება. დაგეგმილი გაქვს მსგავსი გამოცემა სხვა კუთხეებზე. ის, ვისაც შეხება არ აქვს გურიასთან, მარტო ამ წიგნით შეიყვარებს საქართველოს ამ შესანიშნავ კუთხეს. ის დააინტერესებს, როგორც მკვლევარებს, ასევე, მოსწავლეებს და სტუდენტებს“, _ ამბობს კუდავა.
ავტორის, ირაკლი მახარაძის თქმით, ამ ეტაპზე, წიგნის შეძენა მკითხველს წიგნების მაღაზია „შაქრო ბაბუაში“ შეუძლია.
