საქართველოში ფეხბურთი თანდათან ძალებს იკრებს. ჯერ ეროვნულმა ლიგამ გასული თვის ბოლოდან განაახლა სეზონი, 13 ივლისიდან კი ლიგა 2-ის განახლება იგეგმება. ასევე დაგეგმილია ლიგა 3-ის დაწყებაც, რომელიც, ტურნირი მეორე ტურით 27 ივლისიდან გაგრძლედება.
რაც შეეხება ლიგა 4-ს, რეგიონულ ლიგას და დავით ყიფიანის სახელობის საქართველოს თასის გათამაშებას, მათი დაწყება აგვისტოს შუა რიცხვებიდან არის გადაწყვეტილი.
რამდენიმე დღეა ოთხთვიანი იძულებითი პაუზის შემდეგ ლანჩხუთის ,,გურია’’ გრიგოლეთის ბაზას დაუბრუნდა და ვარჯიშები განაახლა. თუ რა ცვლილებებია გუნდში და რა მიზანი აქვს ახალ ხელმძღვანელობას, გვესაუბრება სპორტული დირექტორი გიგა სურმავა:
-,,რამდენიმე დღეა ლანჩხუთის ,,გურია’’ შეიკრიბა თავის სპორტულ ბაზაზე გრიგოლეთში და ვარჯიშებიც განაახლა. ამ ეტაპზე ერთჯერად ვარჯიშებს ვატარებთ და ვინაიდან დრო ცოტა გვაქვს ჩემპიონატის დაწყებამდე, მალე გადავალთ ორჯერად ვარჯიშებზე.
გუნდს ორი მთავარი მწვრთნელი ჰყავს: ლევან ხომერიკი და ვანო მახარაძე. მათ დაეხმარება ,,გურიას’’ ლეგენდა გიგლა იმნაძე, რომელიც წლებია სამწვრთნელო სტაფშია, მეკარეების მწვრთნელად გია გოგუა იქნება, ხოლო ფიზმომზადებას კახა ვაჩეიშვილი მიხედავს.
რაც შეეხება ფეხბურთელებს, ვისაც კონტრაქტი ჰქონდა კლუბთან, ყველა დარჩა და ასევე დავიმატეთ რამდენიმე ახალწვეულიც.
პირობები ნორმალურია. ჩატარდა კოსმეტიკური რემონტი, სადაც შეიძლება ფეხბურთელს შეექმნას ნორმალური საცხოვრებელი მდგომარეობა. ჩვენ შევხდით მუნიციპალიტეტის ხელმძღვანელობას, გავიარეთ კონსულტაციები და დაგვპირდნენ შესაბამისად გვერდში დგომას.
გამომდინარე დღევანდელი სიტუაციიდან, ბაზა მკაცრად კონტროლდება. უცხო პირის შესვლა არ ხდება, გათვალისწინებულია უსაფრთხოების ზომები და ვიცავთ ყველა რეკომენდაციას.
აუცილებლად ვიბრძოლებთ მაღალი მიზნებისთვის, მაგრამ ჩვენ რისთვისაც მოვედით, ეს არის ეტაპობრივად განსახორციელებელი. დიდი გუნდის მშენებლობა არ ხდება ერთ-ორ წელიწადში, მაგრამ ეს იმას არ ნიშნავს, რომ ჩვენ წელს არ ვიბრძოლებთ გადამსვლელი ადგილებისთვის. შრომით, ბრძოლით, პატიოსანი გზით ვეცდებით მივაღწიოთ იმ მიზანს, რაც ,,გურიას’’ შეშვენის და ეკადრება.
დაგეგმილია ამხანაგური თამაშები, რომლებსაც აქ, გრიგოლეთის ბაზაზე გავმართავთ, სამწუხაროდ შექმნილი მდგომარეობის გამო, გასვლით საკონტროლო შეხვედრებს სტუმრად ვერ გავმართავთ“.
