„გურია ნიუსის“ სტატიას, რომელიც ჩოხატაურის მუნიციპალიტეტის სოფელ გორაბერეჟიულში მცხოვრები 17 წლის თამარ ჩხაიძეს და მისი ოჯახის უკიდურეს გაჭირვებას ეხებოდა, დიდი გამოხმაურება მოჰყვა.
თამუნას ბედით ბევრი ადამიანი დაინტერესდა _ ორშაბათს, ჩოხატაურის საკრებულოს თავმჯდომარემ ზაალ მამალაძემ და მისმა მოადგილემ დავით გუდავაძემ პროდუქტები და ტკბილეული მიუტანეს.
ბიზნესმენმა დავით ჟღენტმა დიდი სიურპრიზი მოუწყო ამ პატარა და ძალიან მაგარ გოგონას _ ცხოვრებაში პირველად მას აქვს პირადი ჰიგიენისთვის საჭირო ყველა ნივთი, სუნამო, პარფიუმერია, ახალი ტანსაცმელები, ფეხსაცმელები, მისთვის სასურველი ჩანთა.
„გურია ნიუსის“ მეგობარმა, რომელმაც ვინაობის გამხელა არ ისურვა, სურვილები თამარის ძმას, გიორგის აუსრულა და მისთვის სკოლაში წასასვლელად საჭირო ყველა ნივთი შეიძინა.
ჩხაიძეებს დაეხმარნენ “ქართული ოცნების” ოზურგეთის აოლქო ორგანიზაციის თავმჯდომარე მერაბ ჭანუყვაძე, ოზურგეთის საკრებულოს თავმჯდომარე დავით დარჩია, ოზურგეთის საკრებულოს თავმჯდომარის მოადგილე გიორგი ღურჯუმელიძე, ბიზნესმენი გია ცეცხლაძე.
გიორგის დიდი ხნის ოცნება ბიზნესმენმა ბეგლარ სიორიძემ აუსრულა _ იგი ჩხაიძეების ოჯახს შვილთან _ ნიკა სიორიძესთან ერთად სტუმრობდა. სხვადასხვა სურსათ-სანოვაგესთან ერთად, მათ პატარა გიორგის ველოსიპედი მიუყვანეს და თანხაც გადაცეს.
თამარს, თბილისიდან, მისმა მოსახელემ და მოგვარემ _ თამარ ჩხაიძემ ხუთასი ლარი გამოუგზავნა. მისთვის თანხა გამოაგზავნა შოთა გორგაძემაც.
ჩხაიძეების ოჯახი მოინახულა დეპუტატმა ნინო წილოსანმა და დახმარება აღუთქვა.
თამარისთვის თანხა შეაგროვეს და სხვადასხვა სახის ნივთები და პროდუქტები იყიდეს „თიბისი ბანკის“ ბათუმის ფილიალის თანამშრომლებმა, რომლებიც ჩხაიძეებს სამშაბათს გადაეცათ.
ამავე დღეს, უკვე მიტანილი ბევრი პროდუქტის შესანახად, ქველმოქმედმა აკა სინჯიკაშვილმა თამარის ოჯახს მაცივარი, აგრეთვე, საცხობი შეუძინა. დღეიდან, პატარა გოგონა პურის გამოსაცხობად ღუმელთან აღარ იდგება და არც ფიჩხების საძებრად მოუწევს ტყეში სიარული.
აკას და მისი მეგობრების დახმარებით, თამარს უკვე ჰყავს ქათმები და ცხოვრებაში პირველად, მის ფიცრულში ონკანიდან წყალი წამოვა.
რამდენიმე დღეში ჩხაიძეებს ავეჯიც ექნებათ და დაიწყება ყველაზე მთავარი _ მისი სახლის მშენებლობა. ჩოხატაურის მუნიციპალიტეტის მერის, ირაკლი კუჭავას თქმით, რამდენიმე დღეში ჩხაიძეებს გადაეცემათ 3000 ლარი სამშენებლო მასალების შესასყიდად _ მათ უკვე აქვთ სახურავი და ხის მასალა.
რაც შეეხება სახლის აშენებას _ მასალების შეძენიდან მეორე დღეს, აკა სინჯიკაშვილი და მისი მეგობრები ჩოხატაურში ჩამოვლენ და მოხალისეებთან ერთად თამარის ყველაზე მთავარი ოცნების _ ახალი სახლის მშენებლობა დაიწყება!
და კიდევ ერთი მნიშვნელოვანი ამბავი _ „გურია ნიუსს“ დაუკავშირდა ბიზნესმენი დავით ჟღენტი, რომელიც ისევ დაეხმარება ჩხაიძეების ოჯახს და მათ სახლის მშენებლობისთვის 5 ტონა ცემენტს გადასცემს. ჩვენ, ასევე, დაგვიკავშირდა საპარლამენტო უმრავლესობის ლიდერი არჩილ თალაკვაძე, რომლის თქმით, ოზურგეთში დაწყებული კამპანიის ფარგლებში, რაც რაგბის სტადიონისთვის მიწის შეძენას ისახავდა, საჭიროზე მეტი თანხა მოგროვდა და ეს თანხა თამარ ჩხაიძის სახლის მშენებლობას მოხმარდება.
_ მინდა მადლობა ვუთხრა ყველას, ვინც ჩემი გასაჭირი ცოტათი მაინც მიიტანა გულთან და გამილამაზეს ეს წუთები. განსაკუთრებით „გურია ნიუსს“, რომელმაც მაჩუქა ასეთი ბედნიერი დღეები, ჩამისახა მომავლის იმედი და ჩემს ცხოვრებაშიც გამოანათა მზემ. მზემ რომელსაც ეს წლებია ველოდი, თქვენი თანადგომა მთელი ცხოვრება გამყვება, _ დაწერა თამარმა სოციალურ ქსელში.
ჩვენ კი ისევ ვაგრძელებთ კამპანიას თამარის დასახმარებლად _ ფუნდამენტის ჩასხმის და სახლის კედლების ამოყვანის შემდეგ ბევრი რამაა საჭირო.
ჩვენ ერთად შევძლებ 17 წლის თამარის და მისი 8 წლის ძმის, გიორგის ცხოვრების რადიკალურად შეცვლას! გახსოვდეთ, სიკეთე გადამდებია.
ჩხაიძეების ოჯახის დახმარების მსურველები დაგვიკავშირდით: 551373636
