სტრასბურგის სასამართლომ 20 ივნისს დაზარალებულებისთვის სახელმწიფოს 153 ათას 600 ევროს გადახდა დააკისრა. ევროსასამართლომ მომჩივნების მიმართ ევროპული კონვენციის მე-3 მუხლის დარღვევა დაადგინა, რაც წამების აკრძალვას გულისხმობს.
სარჩელი სტრასბურგში 26 დაზარალებულის სახელით გაიგზავნა. 22-ის ინტერესებს “ახალგაზრდა იურისტთა ასოციაცია” იცავდა.
როგორც საიაში განაცხადეს, 22 მომჩივანს შორის აქციის 10 მშვიდობიანი მონაწილეა, 11 მედიის წარმომადგენელი, მათ შორის, “გურია ნიუსის” ჟურნალისტი მერაბ ცაავა, რომლის ინტერესებსაც ადამიანის უფლებათა ევროპული ცენტრი იცავდა, ხოლო 1 – მოვლენების ეპიცენტრში შემთხვევით აღმოჩენილი.
მომჩივნები ითხოვდნენ ევროპული კონვენციის მესამე მუხლის – წამების აკრძალვის, მე-10 მუხლის – გამოხატვის თავისუფლების, მე-11 მუხლის- შეკრებისა და გაერთიანების თავისუფლებისა და მე-13 მუხლის დარღვევის დადგენას.
საია მტკიცებულებების შესწავლის საფუძველზე სარჩელში აცხადებდა, რომ სახეზე იყო გამოყენებული ძალის უკანონობა და არაპროპორციულობა, დაკავების და შემდგომ პერიოდში არასათანადო მოპყრობა, ჟურნალისტურ საქმიანობაში ხელშეშლა და გამოძიების არაეფექტიანობა.
