მას შემდეგ, რაც ლანჩხუთის “გურიამ” გასულ სეზონში წარმატების შედეგად მესამე ლიგის საგზური მოიპოვა, არ წყდება საუბრები ამ გუნდის ძველი დიდების დაბრუნების შესახებ. მითუმეტეს, რომ კლუბი მართვის უფლებით მერაბ ჟორდანიას ვაჟმა ჩაიბარა და რა თქმა უნდა, ამ ყველაფრის თავში სწორედ მერაბ ჟორდანიას მოიაზრებენ, როგორც გურული კლუბის ერთ-ერთ მთავარ გულშემატკივარს.
ფაქტია ისიც, რომ “გურიას”ამბიციები ერთიორად გაიზარდა და მესამე ლიგაში მისი მთავარი მიზანი, მეორე ლიგაში გადასვლა იქნება და საამისოდ მუშაობა უკვე აქტიურად მიმდინარეობს. მართალია უშუალოდ საწვრთნელი პროცესი ჯერ არ დაწყებულა, მაგრამ ცნობილია ის ტრანსფერები, რომელიც კლუბმა უკვე განახორციელა.
ფაქტობრივად, გადაწყვეტილი ამბავია, რომ საფეხბურთო კლუბ „გურიას“ გასული საუკუნის 80-იანი წლების გამორჩეული ფეხბურთელი, კლუბის ლეგენდა გოჩა ტყებუჩავა გაწვრთნის. იგი მთავარი მწვრთნელის პოსტზე თემურ ლორიას შეცვლის, რომლის ხელმძღვანელობითაც გასულ სეზონში კლუბმა მესამე ლიგის საგზური მოიპოვა.
ცნობისთვის, გოჩა ტყებუჩავა „გურიას“ იმ შემადგენლობის წევრია, რომელმაც გუნდს 1986 და 1989 წლებში სსრკ-ის უმაღლესი ლიგის საგზური მოუტანა. ტყებუჩავა კლუბთან ერთად ორჯერ გახდა საქართველოს ვიცე-ჩემპიონი და დაეუფლა საქართველოს პირველ ეროვნულ თასს. ასევე უთამაშია თბილისისა და მოსკოვის „დინამოებში“, რამდენიმე უცხოურ გუნდში. „გურიას“ რიგებში 230 შეხვედრა ჩაატარა და 20 გოლი გაიტანა.
მისი სამწვრთნელო კარიერა თბილისის „დინამოში“ 2001 წელს დაიწყო, წვრთნიდა საქართველოს ახალგაზრდულ ნაკრებებს, ერთ შეხვედრაში ეროვნული ნაკრების თავკაცის ფუნქციები შეასრულა. რამდენიმე უცხოურ კლუბში (უზბეკეთსა და თურქეთში) შოთა არველაძის თანაშეწმე გახლდათ, ასევე იყო ზუგდიდის „ბაიას“ მთავარი მწვრთნელი.
რაც შეეხება თავად ლორიას, ირკვევა, რომ იგი და მის მხარდამხარ მომუშავე გიგლა იმნაძე სამწვრთნელო შტაბში რჩებიან. ასევე „გურიაში“ სამწვრთნელო კარიერას უბრუნდება გიალო (გია) ჩხაიძე, რომელიც 20 წელია ამ საქმიანობითაა დაკავებული, მანამდე კი იყო წარმატებული და ტიტულოვანი ფეხბურთელი.
ცნობისთვის, გიალო ჩხაიძე ლანჩხუთის საფეხბურთო სკოლის აღზრდილია და მშობლიური კლუბის შემადგენლობაში დაეუფლა საქართველოს თასს და ორჯერ გახდა ვიცე-ჩემპიონი. ასევე თამაშობდა ქვეყნის წამყვან კლუბებში. ფოთის „კოლხეთის“, „სამტრედიის“, ქუთაისის „ტორპედოს“, თბილისისა და ბათუმის „დინამოებისა“ და „ლოკომიტივის“ შემადგენლობაში არაერთ ტიტულს დაეუფლა. იგი ერთი სეზონი ვლადიკავკაზის „ალანიაშიც“ თამაშობდა, იყო საქართველოს ეროვნულ ნაკრების წევრი. ნათამაში აქვს ევროტურნირებზე, მათ შორის – ჩემპიონთა ლიგაზე.
გიალო ჩხაიძემ სამწვრთნელო კარიერა ოზურგეთის „მერცხალში“ დაიწყო, შემდეგ კი წლების განმავლობაში იყო „გურიას“ სამწვრთნელო შტაბის წევრი, კლუბში სამჯერ დაინიშნა მთავარი მწვრთნელის პოსტზე. ბოლო ხანს კი გვიმბალაურის აკადემიაში მუშაობდა.
ცნობილი ხდება, რომ „გურიას“ მეკარეებს 34 წლის ირაკლი ხვედელიძე გაწვრთნის, რომელმაც აქტიური საფეხბურთო კარიერა უკვე დაასრულა. იგი „გურიას“ გარდა მარტვილის „მერანისა“ და ჩოხატაურის „ბახმაროს“ კარს იცავდა.
მიუხედავად იმისა, რომ ხვედელიძემ აქტიური კარიერა ახლახან დაასრულა, მას მეკარეების მწვრთნელად უკვე ჩემპიონთა ლიგაზეც აქვს ნამუშევარი, როცა გასული წლის შემოდგომაზე, ლანჩხუთის ქალთა გუნდის თავკაცს, გიორგი ჩხაიძეს ეხმარებოდა.
გუნდს ახალი სპორტული დირექტორიც ჰყავს, 28 წლის ანდრო ნემსაძე სახით, რომელმაც აქტიური საფეხბურთო კარიერა 2025 წელს დაასრულა. „სიონის“, „ცხინვალის“, „გაგრას“, „ვიტ ჯორჯიას“, „დილასა“ და „არაგვის“ ყოფილ მცველს ეროვნულ ჩემპიონატების მთავარ ლიგებში 175 მატჩი აქვს ჩატარებული.
რაც შეეხება ფეხბურთელებს, ჩვენი ინფორმაციით, უკვე გადაწყვეტილი ამბავია, რომ ძველი შემადგენლობიდან გუნდში აუცილებლად დარჩებიან მთავარი მეგოლეები _ ვანო შარვაძე, ვანო წილოსანი და გასული სეზონის ბოლო მატჩის გმირი თემურ შარაშენიძე. „გურიას“ მიერ წინა სეზონში გატანილი 66 გოლიდან 41 ამ სამეულის ანგარიშზეა. ასევე გუნდში დარჩება ახალგაზრდა, პერსპექტიული ნახევარმცველი დავით გოგიჩაიშვილი, რომელიც 20 წლისაა. „გურიაში“ ითამაშებს 23 წლის მცველი ნიკა კოკაიაც ,ვისი საგოლე პასებითაც მოახერხა თემურ შარაშენიძემ ბოლო ტურში „არაგველებთან“ ანგარიშის გათანაბრება, რამაც კლუბს მესამე ლიგის საგზური მოუტანა.
„გურიას“ უკვე ჰყავს 6 ახალწვეული, ყველა გამოცდილი და უმეტესობა ტიტულიანია.
11-წლიანი შესვენების შემდეგ, „გურიაში“ დავით მაისაშვილი ბრუნდება. 36 წლის მცველი კლუბის ღირსებას 2012-13 წლებში იცავდა, როცა 11-წლიანი პაუზის შემდეგ, უმაღლეს ლიგაში დაბრუნდა.
იგი ერთ-ერთი ყველაზე ტიტულოვანი ფეხბურთელი იქნება ლანჩხუთის კლუბში -2009-11 წლებში, თბილისის „ვიტ ჯორჯიას“ შემადგენლობაში გახდა საქართველოს ჩემპიონი, თასისა და სუპერთასის მფლობელი, ხოლო 2020-21 წლებში, გორის „დილას“ რიგებში ზედიზედ ორჯერ დაეუფლა ბრინჯაოს მედალს. ასევე უთამაშია რუსთავის „მეტალურგში“, ცხინვალის „სპარტაკში“, მარტვილის „მერანში“, საჩხერის „ჩიხურასა“ და წყალტუბოს „სამგურალში“, ბოლნისის „სიონსა“ და “თბილისი-2025”-ში. 2017 წლიდან ქართულ მთავარ ლიგებში 236 შეხვედრა ჩაატარა და 12 გოლი გაიტანა.
„გურიას“ კაპიტანი მომდევნო სეზონშიც თემურ შარაშენიძე იქნება.
ასევე ძალიან ტიტულოვანია 32 წლის ნოდარ იაშვილი _ გამოცდილი უკანახაზელი თბილისის „იბერია-1999“-ისა და „დინამოს“ შემადგენლობაში სამჯერ გახდა საქართველოს ჩემპიონი. იგი ასევე იცავდა „ლოკომიტივის“ ღირსებას, ხოლო 2024 წლიდან ბოლნისის „სიონის“ ერთ-ერთი ლიდერი გახლდათ. ბოლო 9 სეზონში ეროვნული ჩემპიონატების მთავარ ლიგებში ჩატარებულ 182 შეხვედრაში, ამპლუით მცველმა 14 გოლი გაიტანა.
საქართველოს ორგზის ჩემპიონი და თასის გამარჯვებულია კიდევ ერთი ახალწვეული თორნიკე კაპანაძე – 33 წლის „ელვას“ ქუთაისის „ტორპედოში“, თბილისისა და ბათუმის „დინამოებში“, „ზესტაფონში“, „დილაში“, „სიონსა“ და „სამტრედიაში“ აქვს ნათამაშები. „გურიაში“ სწორედ მეზობელი იმერული ქალაქიდან გადმოვიდა. ბოლო 10 სეზონში მთავარ ლიგებში 234 თამაში აქვს ჩატარებული და 72-ჯერ აიღო მეტოქეთა კარები.
“გურიამ“ ასევე დაიმატა 36 წლის შემტევი დათა სიჭინავა, რომელიც ბოლოს ბოლნისის „სიონის“ ღირსებას იცავდა (ბოლო სეზონში, 35 შეხვედრაში 20 გოლი გაიტანა). ასევე უთამაშია არაერთ ქართულ კლუბში, მათ შორის უმაღლეს ლიგაში _ ქუთაისის „ტორპედოს“, „გაგრას“, ბათუმის „დინამოს“, ფოთის „კოლხეთისა“ და „რუსთავის“ შემადგენლობაში. 2017 წლიდან მან ქართულ ჩემპიონატებში 220 მატჩი ჩაატარა და 114 გოლი გაიტანა, რაც საშუალოდ 0,52 გოლია ერთ შეხვედრაში, ანუ ყველა 2 შეხვედრაში გააქვს!
კიდევ ერთი ახალწვეულია კახა კახაბრიშვილი _ 32 წლის ნახევარმცველი წინა სეზონში „გონიოს“ ღირსებას იცავდა. ასევე ნათამაშები აქვს „ვიტ ჯორჯიაში“, „ლოკომოტივში“, „ცხინვალში“, „ჩიხურასა“ და „სიონში“. 2017 წლიდან მთავარ ლიგებში 120 შეხვედრა ჩაატარა და 19 გოლი გაიტანა.
ბოლო ინფორმაციით, „გურიაში“ ითამაშებს ნიკოლოზ ნოზაძეც _ 31 წლის ნახევარმცველი წინა ჩემპიონატში „სიონს“ ეხმარებოდა. მან ბოლო ორ სეზონში 64-ჯერ დაიცვა ბოლნისელთა ღირსება, ხოლო 2017 წლიდან მთავარ ლიგებში 190 შეხვედრაში 12 გოლი გაიტანა.
„გურია“ ახალ საფეხბურთო სეზონს 5 მარტს, თბილისში „ლოკომოტივთან“ მატჩით დაიწყებს. პირველი საშინაო მატჩი კი, „ევგრაფი შევარდნაძეზე“ 12 მარტს ჩატარდება, ლანჩხუთური კლუბი თბილისის „მერანს“ უმასპინძლებს.
