საფეხბურთო კლუბ ლანჩხუთის „გურიას“ ხელმძღვანელობა და სამწვრთნელო შტაბი „ევგრაფ შევარდნაძის“ სახელობის სტადიონის სააქტო დარბაზში ადგილობრივი მედიის წარმომადგენლებს, კლუბის რიგით გულშემატკივრებს, ვეტერან ფეხბურთელებსა და საფეხბურთო სამყაროს წარმომადგენლებს შეხვდა. მათ მასპინძლობდა და მოძალებული პრობლემების ფონზე გაჩენილ კითხვებზე პასუხს სცემდა კლუბის მთლიანი სტაფი.
შეხვედრა შესავალი სიტყვით გახსნა კომპანია „ჯიბიაის“ წარმომადგენელმა, საბა ჯაფარიძემ, რომელიც კლუბში აღმასრულებელი დიტრექტორის პოზიციას იკავებს. მან თავიდანვე აღნიშნა, რომ მიზეზთა გამო ეს შეხვედრა დაგვიანდა და მოხარულია ამის განხორციელება რომ მოხერხდა. მან ასევე გაგვაცნო კლუბის სტაფი, რომელიც უკლებლივ წარმოდგენილი იყო ამ შეხვედრაზე და სიტყვა გადასცა კლუბის სპორტულ დირექტორს, გიგა სურმავას, რომელიც წმინდა სპორტული კუთხით მართავს კიდეც კლუბს ამ ეტაპზე.
სურმავამ აქცენტი გააკეთა იმაზე, თუ რაოდენ საპასუხისმგებლოა „გურიაში“ საქმიანობა და არსებულ სიტუაციაზე საუბრისას აღნიშნა, რომ გარკვეული საკომუნიკაციო ლაფსუსები არსებობს კლუბსა და საზოგადოებას შორის, რაც მისივე თქმით, კლუბის ხელმძღვანელობისგან არ მოდის და როგორც თავად, ასევე სტაფის სხვა წევრი ყოველთვის მზად იყო და არის იმისთვის, რომ დაინტერესებულ მხარეს მიეწოდოს ამომწურავი ინფორმაცია.
რაც შეეხება კლუბის სამომავლო მიზნებს, სურმავამ ცალსახად აღნიშნა, რომ მხოლოდ განვითარება და სამომავლო წარმატებაა მათი მიზანი და ისიც დასძინა, რომ ყველაფერი ნულიდან არის დასაწყებიო.
ამ პასუხმა არაერთგვაროვანი რეაქცია გამოიწვია დამსწრე საზოგადოებაში, რომლებიც აშკარად შეშფოთებულები ჩანდნენ გუნდის ამჟამინდელი შედეგით და რაც უმთავრესია უშუალოდ თამაშის ხარისხით. აქვთ კიდეც ამის საფუძველი, რადგან „გურიამ“ ახალი ხელმძღვანელობით სამი შეხვედრა გამართა და ოდენ ქულა აიღო, რაც საკმარისი აღმოჩნდა სატურნირო ცხრილის ფსკერისკენ დაშვებულიყო. ამ ლიგიდან გავარდნა კი, მოგეხსენებათ მართლაც ცუდი ფაქტი იქნება და ამიტომაც იყო კლუბის ახალ სტაფს ბევრ კითხვაზე მოუწია პასუხის გაცემა.
არსებულ სავალალო სატურნირო სიტუაციაზე, როგორც სურმავას, ასევე მწვრთნელთა დუეტის _ ლევან ხომერიკისა და ივანე მახარაძის პასუხები ძალიან ჰგავდა ერთმანეთს. ისე გამოჩნდა, რომ მათი ბრალეულობა ყველაზე ნაკლები იყო, იმ ფონზე, რომ მათ წინა ხელმძღვანელობის მიერ შერჩეული ფეხბურთელები ჰყავთ განაცხადში და აქედან გამომდინარე არჩევანიც ბევრი არ აქვთ. ამას ემატება ის შემჭიდროვებული დრო, რომელიც ჰქონდათ სეზონის განახლებამდე და გუნდში არსებული ტრავმიანობა, რომელიც ოპტიმალური შემადგენლობის დაყენებას ხელს უშლის.
ფაქტია, რომ ყველა ეს ნიუანსი გასათვალისწინებელია, მაგრამ „გურიას“ მესვეურებს შეახსენეს, რომ ისინი თავის დროზე კარგად აცნობიერებდნენ სად მოდიოდნენ და რა კონტინგენტით უნდა გაეგრძელებინათ ეს სეზონი, ჰოდა, ამდენი საწუწუნოც წესით არ უნდა იყოსო.
კლუბის უახლოეს მიზნებზე საუბრისას ცხადად წარმოჩინდა მესამე ლიგიდან გავარდნის საშიშროებაც და ამაზე პასუხისმგებლობის აღებაც ლოგიკურად მოსთხოვეს ახალ სტაფს.
კლუბის მესვეურების მუნიციპალიტეტის ხელმძღვანელებისთვის თავის დროზე მიცემული პირობით დაინტერესებაც დიდი იყო. უბრალოდ გულშემატკივარს სურს გაიგოს რა პირობით გადაეცა ეს კლუბი ახალ პატრონს და რა დაუსახეს მას მიზნად. ირკვევა, რომ თავიდანვე წამოყენებული მოთხოვნა ზედა ლიგაში წელსვე გადასვლისა, მალევე შეიცვალა იმით, რომ გუნდი ამ სეზონს სტაბილურად ჩაამთავრებდა და გადასვლის ამბიცია თუ არა, არც გავარდნის საშიშროება გაჩნდებოდა. ჰოდა, ამ ფონზე გაისმა კითხვა, რომ გავარდეს ეს გუნდი, ამის მერე რა იქნებაო.
ამის პასუხად მივიღეთ ის, რომ გავარდნაზე მაშინ საუბარიც არ ყოფილა და არც ვისიმე პასუხისმგებლობაზე თქმულა რაიმეო. მართალია როგორც კლუბის მესვეურები ამტკიცებენ, გავარდნა გამორიცხულიაო, მაინც ვერ მივიღეთ მყარი პასუხი იმ შემთხვევისთვის, თუ გუნდი მართლაც გავარდება ამ ლიგიდან, ვინ იქნება პასუხისმგებელი?!
საინტერესო იყო მწვრთნელების მოსაზრებაც, რომლებიც არსებული სიტუაციიდან გამომდინარე თვლიან, რომ მათ ხელთ არსებული კონტინგენტით მაქსიმუმის მიღწევას შეეცდებიან, მაგრამ ამისთვის დროს ითხოვენ, რომ ყველა ფეხბურთელმა გაითავისოს ის სათამაშო სტილი, რომელიც ამ ტანდემს გააჩნია. რაც შეეხება საკმაოდ ცუდ თამაშს, ისინი მიიჩნევენ, რომ პანდემიის გამო გამოცხადებულ შესვენებას ბევრი ფეხბურთელი უპასუხისმგებლოდ შეხვდა და სეზონის განახლებისთვის ბოძებულ მოკლე დროში მათ ვერ მოასწრეს ძალების აღდგენა, რაც გამოიხატა კიდეც გუნდის თამაშში. თუმცა დაგვაიმედეს, რომ წინ მივდივართ და პირველი შეხვედრის შემდეგ გუნდის პროგრესი აშკარააო.
როგორც ხომერიკმა, ასევე მახარაძემ ისიც აღნიშნეს, რომ ასე უცბად შედეგი არ მოდის და გუნდის შეთამაშებას თუ შემდგომ კარგად ათამაშებას, გარკვეული დრო სჭირდება და ყველა პირობაა შექმნილი იმისთვის, რომ ფეხბურთელმა სასურველი კონდიციები აიმაღლოს და თამაშსაც მოუმატოსო.
გუნდის გაძლირებაზეც ითქვა ბევრი რამ, მაგრამ როგორც კლუბის მესვეურების საუბრიდან გავიგეთ, ამ ეტაპზე ეს ძალიან რთულია. ისიც დასძინეს, აფრიკელი ემანუელ იაგრის შემთხვევაში მაგრად გაგვიმართლაო. მისი დამატება კლუბს ძალიან რომ წაადგება, ეს ბოლო შეხვედრამაც წარმოაჩინა, სადაც ამ ახალწვეულმა მიუხედავად მოუმზადებლობისა, საკმაოდ კარგი შთაბეჭდილება დატოვა.
როგორც გიგა სურმავამ შეხვედრაზე მყოფ საზოგადოებას განუცხადა, მიზანი მხოლოდ ერთია _ სახელოვანი „გურიას“ ტრადიციების აღდგენა, ეტაპობრივად კლუბის განვითარება და გრძელვადიან პროცესში ქვეყნის წამყვან საფეხბურთო ელიტაში დაფუძნება. ამ ფონზე ჯერაც გაურკვეველია კლუბის ამჟამინდელი სტატუსი. მუნიციპალიტეტს საამისოდ ბევრი სამუშაო აქვს და რაც შეიძლება მალე „გურია“ შპს-ედ უნდა გადაკეთდეს. არსებობს ასეული ათასობით ლარის დავალიანება, რომლის ეტაპობრივად გასტუმრებას კომპანია „ჯიბიაი“ გვპირდება და ეს თავიდანვე იყო გათვალისწინებული მაშინდელი ურთიერთშეთანხმებით.
საფეხბურთო საზოგადოებაში ბევრი მითქმა-მოთქმა გამოიწვია კლუბის ახალი ლოგოს გამოჩენამ, რომელიც როგორც ამ შეხვედრაზე გაირკვა, მხოლოდ კლუბის ამჟამინდელ მესვეურთა წინადადება იყო მხოლოდ და რეალურად არც არაფერი შეცვლილა. უბრალოდ მედიაში ნაჩქარევად გაჟონა ამ ინფორმაციამ და მეტი არაფერიო, დაგვაიმედეს, მაგრამ ერთი ცხადია, რომ გუნდის ახალ მაისურებზე ეს ლოგო უკვე დატანილია და უბრალოდ გაუგებარია, თუ ეს მხოლოდ წინადადება იყო, რატომ მოხდა მისი ასე ოფიციალურად გამომზეურება. როგორც გიგა სურმავამ დაგვაიმედა, ეს გაუგებრობა იყო მხოლოდ და ახალ ლოგოზე მუშაობა მხოლოდ გულშემატკივრებთან შეთანხმების მერე დაიწყება და სასურველი ვარიანტის შესაქმნელად ფართო მსჯელობაც გაიმართებაო.
რაც შეეხება გრიგოლეთის საწვრთნელ ბაზას, სურმავამ არასწორი უწოდა ერთ-ერთ ადგილობრივ მედიასაშუალებაში გავრცელებულ ინფორმაციას იმის შესახებ, თითქოს 49 წლიანი იჯარით მოხდება ბაზის გასხვისება.
„ჩვენ ბაზის ინტერესი არ გვაქვს, უბრალოდ ის აუცილებელია კლუბის წარმატებისთვის და მის განვითარებაზე თუ კეთილმოწყობაზე რომ იყოს საუბარი, ამაში რაა ცუდი?! მე თუ მკითხავთ ახლავე მოვიყვანდი ბულდოზერს და იქ არსებულ შენობას დავანგრევდი, ახალს ავაშენებდი და შესაბამის ინფრასტრუქტურასაც მოვაწყობდი“ -აღნიშნა სურმავამ.
მისივე საუბრიდან გაირკვა, რომ ბაზაზე საკმაოდ სავალალო სიტუაცია დახვდათ და დიდი ძალისხმევა გახდა საჭირო, ელემენტარული პირობები რომ შექმნილიყო საცხოვრებლად. ეს თემა კი ცოტა არ იყოს ცუდად გვენიშნა, მაშინ, როცა კარგად ვიცით რა თანხები მოხმარდა ბაზის აღდგენას თავის დროზე. მოვლა-პატრონობა რომ სჭირდება ბაზას, ეს ცხადია, მაგრამ რა გახდა ასეთი, ელემენტარული ყურადღება არ მივაქციოთ იმას, რომ ნაძვის წიწვებით გამოტენილი სახურავი ვინმემ დროდადრო გადაწმინდოს და წვიმამ მთლიანად არ ჩამორეცხოს ოთახები.
მოკლედ ასე თუ ისე დაგროვებულ კითხვებზე პასუხები ამ შეხვედრაზე გაისმა. ამით ზოგი კმაყოფილი დარჩა, ზოგიც არა, მაგრამ ცხადია, რომ არსებული სიტუაციით უნდა დავკმაყოფილდეთ, მეტი გზა არაა და ვიყოთ უკეთესი მომავლის იმედით. მალე გამოჩნდება, თუ რა შეიცვლება სასიკეთოდ გუნდში და ისღა დაგვრჩენია მივენდოთ ახალ ხელმძღვანელობას, რომელიც გვპირდება ამ ჭაობიდან ამოსვლას.
