ველოსიპედით საქართველოში არც თუ ისე ბევრი ადამიანი სარგებლობს, თუმცა, ყოველდღე ქუჩებში არაერთი ადამიანი გვხვდება ვინც ველოსიპედით განტვირთვის თუ საცობებისგან თავის არიდების მიზნით გადაადგილდება.
თუმცა, დღეისთვის არსებული ვითარება ცხადჰყოფს, რომ იქ სადაც ველობილიკებია მოწყობილი, ზოგი ავტომობილს აპარკინგებს, ზოგიც გარევაჭრობითაა დაკავებული. არსებობს ქალაქებიც, სადაც საერთოდ არაა გათვალისწინებული ველოსიპედისთვის სპეციალური ბილიკი.
შინაგან საქმეთა სამინისტროს 2024 წლის სტატისტიკის თანახმად, გასულ წელს ველოსიპედისტის მონაწილეობით 57 ავტოსაგზაო შემთხვევა მოხდა. მომხდარი ავტოსაგზაო შემთხვევებიდან 3 მსხვერპლით დასრულდა, 54 კი დაშავდა. ამ წლის სტატისტიკა, ჯერჯერობით შინაგან საქმეთა სამინისტროს გამოქვეყნებული არ აქვს.
რა გამოწვევები არსებობს – ამის შესახებ “გურია ნიუსი” თბილისის ველო მერს, “კავკასიის ველო ქსელის” დამფუძნებელს, მარი მიხელიძეს ესაუბრა.
როგორც მიხელიძე გვეუბნება, მნიშვნელოვანია, რომ ველობილიკების შეკრული ქსელი არსებობდეს და გათვალისწინებული იყოს უსაფრთხოებისთვის აუცილებელი პირობები.
“თბილისში და ბათუმში, მთავარი პრობლემა არის ის, რომ არსებობს ველო გადაადგილების გეგმა, რომელიც არ სრულდება. როცა ხდება ქუჩის რეაბილიტაცია, ხან ითვალისწინებენ ველობილიკის მოწყობას და ხან არა. ასეთ გადაწყვეტილებებს რის საფუძველზე იღებენ, არ ვიცი, მაგრამ ველოსიპედის მოსარგებლეების რაოდენობის გაზრდა მოხდება მხოლოდ იმ შემთხვევაში, თუ იქნება ველოსიპედების შეკრული ქსელი. ანუ ველოსიპედით გადაადგილება უნდა იყოს შესაძლებელი ისე, რომ ველობილიკიდან ჩამოსვლა არ გახდეს საჭირო და პირმა, რომელიც ველოსიპედით სარგებლობს იმგზავროს უსაფრთხოდ”,_ გვეუბნება მიხელიძე და აღნიშნავს, რომ ველობილიკები მანქანების სადგომად არის ქცეული.
“არსებობს ველობილიკები, რომლებიც მანქანების სადგომად არის ქცეული, როგორც თბილისში, ასევე ბათუმში და ასევე ძალიან მნიშვნელოვანია, რომ ეს ველობილიკები შეესაბამებოდეს იმ სტანდარტებს, როგორიც არის ეს გეგმაში ნახსენები, იყოს უსაფრთხო, და თუ გვერდით მოძრავი ავტომობილების მოძრაობა დიდი სიჩქარით არის დაშვებული, ბარიერები იყოს. ასევე მნიშვნელოვანია ისიც, რომ ცნობიერება ამაღლდეს. ქუჩა არ ეკუთვნის მხოლოდ მანქანას, ეკუთვნის ადამიანს და ადამიანი შეიძლება გადაადგილდებოდეს როგორც ფეხით, ასევე ეტლით, ბავშვთან ერთად, ველოსიპედით, სკუტერით და ასევე ავტომობილით. ქუჩაში ადამიანის გადაადგილების უფლებები არ უნდა ირღვეოდეს. ყველგან უნდა იყოს საზოგადოებრივი ტრანსპორტით, ფეხით, ველოსიპედით გადაადგილება შესაძლებელი. რაც შეეხება ქუთაისს და შედარებით ისეთ ქალაქებს, სადაც უფრო ნაკლები ავტომობილი და საცობია, მაგალითად, ზუგდიდი, ფოთი და ა.შ. ჩემთვის სრულიად გაუგებარია, რა ბარიერი უნდა ჰქონდეს ტრანსპორტის განვითარებას, ველობილიკების გაკეთებას, იმიტომ რომ აქ არის საკმარისი ადგილიც, შესაბამისი რელიეფიც, ასე რომ მგონია, რომ თუ მათ ეცოდინებათ როგორ უნდა მოაწყონ ეს ყველაფერი, ბარიერი არ იქნება და ეს ბევრად უფრო გაუმარტივებთ ადამიანებს ველოსიპედით გადაადგილება. მაგალითად, ქუთაისში, გზის ორივე მხარეს პარკირებაა და არც კი არის ნაფიქრი ველოსიპედით გადაადგილება და ველობილიკის მოწყობა”,_ ამბობს მარი მიხელიძე ჩვენთან საუბრისას.
რაც შეეხება გურიაში არსებულ მდგომარეობას, მარი მიხელიძის ინფორმაციით, ველობილიკი ოზურგეთის მუნიციპალიტეტში, მხოლოდ ერთ ადგილზეა მოწყობილი, მაგრამ ზოგადად რეგიონს ამ მხრივ განვითარების კუთხით პროგრესი არ გააჩნია.
“რაც შეეხება გურიას, მე როგორც ვიცი, ოზურგეთში, 1 ქუჩაზეა გაკეთებული ველობილიკი, თუმცა 1 კონკრეტულ ქუჩაზე სამაგალითოდ გაკეთება დიდად არ შველის და უნდა განვითარდეს. თუ ეს 1 ქუჩაზე გაკეთება იმას ნიშნავს, რომ აპირებენ გაგრძელებას და სხვაგანაც გაკეთდება, ძალიან კარგი, მაგრამ გურიაში საერთოდ არ არის წინსვლა. ყველაზე გულდასაწყვეტია მაინც ბათუმის ამბავი, სადაც დამტკიცებულია ველოგადაადგილების გეგმა, თუმცა არც სრულდება და იქ, სადაც ველობილიკებია ან მანქანების საპარკინგე ადგილებია ან გარევაჭრობა ”,_ ამბობს თბილისის ველო მერი.
ოზურგეთის მუნიციპალიტეტის მერიაში “გურია ნიუსს” უთხრეს, რომ ველობილიკი კოსტავას ახლად რეაბილიტირებულ ქუჩაზეა მოწყობილი.
“ოზურგეთში ქალაქის ერთ-ერთი მთავარი მაგისტრალის- კოსტავას ქუჩის სრული რეაბილიტაცია დასრულდა. გზის ახალ საფართან ერთად, რომლის სიგრძეც 1.5 კილომეტრია, მოეწყო წყალმომარაგების ახალი სისტემა, კომუნიკაციები, განათება, ტროტუარები, მგზავრთა მოსაცდელები და 3 კმ-ზე ველობილიკი. რაც შეეხება ახალი ველობილიკების მოწყობას, მუნიციპალიტეტის მერია ამ მიმართულებით მუშაობს”,_ განაცხადეს ოზურგეთის მერიის პრესსამსახურში.
5 კილომეტრიანი ველობილიკის არსებობის შესახებ გვეუბნებიან ლანჩხუთის მუნიციპალიტეტის მერიაშიც. მერიის პრესსამსახურის ინფორმაციით, ველობილიკი მაჩხვარეთის ადმინისტრაციულ ერთეულშია მოწყობილი. თუმცა, იქ არსებული ვითარების შესახებ, სადაც ზიპლაინის ხაზის მოწყობა დასრულებული ჯერ კიდევ არ არის, ვრცლად სტატიას აღნიშნულ ლინკზე წაიკითხავთ.
ფოტოები, რომლებიც “გურია ნიუსმა” შემოგთავაზათ, ოზურგეთში და ბათუმშია გადაღებული.
ავტორი
