„გურია ნიუსის“ სანდო წყაროს ინფორმაციით, ახლადანიშნულმა გურიის გუბერნატორმა, გიორგი სახოკიამ , კორონავირუსის პანდემიის გამო დაწესებული შეზღუდვების სრულად მოხსნამდე, გადაადგილებისთვის საჭირო საშვი, ოზურგეთში, ორ ხელმძღვანელ პირს გაუუქმა.
ესენია გურიის სამხედრო გაწვევის და მობილიზაციის სამსახურის უფროსი, ილია ლეჟავა და ა(ა)იპ პარკირების მართვის ცენტრის უფროსი, რომან გოგიტაური.
საზოგადოებაში გაკვირვება განსაკუთრებით, ილია ლეჟავასთვის საშვის გაუქმებამ გამოიწვია. იუმორისმოყვარე გურულებს სერიოზულად აღქმაც კი გაუჭირდათ:
„ე, ძამა, მარიფათიანი მუშაობის დაწყება მაგას ჰქვია. ნეტაი, ვის ჭირდებოდა აი „ორი ბარტყი“ საშვი? მელია დაჭერილია. სხვაი თუ აფერი, აწი სამხედრო გაწვევა დაიწება, ლეჟავას საშვი უნდა დუუმატო თუ არა გაუქმება რაში წერია? თვარა, გოგიტაური ჯანდაბას…“ _ ხითხითებენ ისინი.
ჩვენს კითხვაზე, თუ რატომ მოხდა მისი საშვის გაუქმება, ილია ლეჟავა გვეუბნება:
_თქვენ ვინ გითხრათ? კი, გამიუქმეს, მაგრამ არ ვიცი, რატომ. რა მოხდა? აღმიდგენენ, ალბათ… _ გვითხრა მან.
რაც შეეხება რომან გოგიტაურს, მან „გურია ნიუსთან“ ასეთი კომენტარი გააკეთა:
_დამირეკეს მერიიდან და მითხრეს, რომ გაგიუქმესო და რა ვიცი. ასე ჩათვალეს, ალბათ, საჭიროდ. გუბერნია გასცემს ამ საშვს და ასე გადაუწყვეტიათ.
გურიის გუბერნატორს ჩვენ ვერ დავუკავშირდით. გიორგი სახოკია ახლა გურიაში არ იმყოფება.
_თბილისშია, შეხვედრებზე იმყოფება. ცოტა მოგვიანებით შესაძლებელი იქნება, გიპასუხოთ, _ გვითხრა პრესსამსახურის წარმომადგენელმა, სოფო კაშიამ.
ჩვენც ვეცდებით, ცოტა მოგვიანებით დავუკავშირდეთ გიორგი სახოკიას და ვკითხოთ გურულების მიერ „ორ ბარტყად“ მონათლული საშვის გაუქმების მიზეზზე.
