გურიის გუბერნატორის ყოფილი მოადგილის იოსებ ერქომაიშვილის საკუთრებაში 2013 წელს ნაყიდი მიწის ნაკვეთი და 2015 წელს შეძენილი მსუბუქი ავტომობილია. ამის შესახებ ერქომაიშვილის ქონებრივი დეკლარაციიდან ირკვევა, რომელიც საჯარო სამსახურის ბიუროს ვებ-გვერდზე გამოქვეყნდა.
დეკლარაციის თანახმად, მიწის ნაკვეთის და ავტომობილის გარდა, ოჯახი სხვა უძრავ-მოძრავ ქონებას არ ფლობს.
კერძოდ, იოსებ ერქომაიშვილის 100,00% საკუთრებაშია 2013 წელს, 5000-ლარად ნაყიდი, 2500,00 კვ.მ-ის ფართობის მიწის ნაკვეთი ოზურგეთის მუნიციპალიტეტის სოფელ შემოქმედში და 2015 წელს, 5500,00-დოლარად შეძენილი მსუბუქი ავტომანქანა მერსედერსი-ML.
რაც შეეხება ოჯახის ფინანსურ მდგომარეობას, როგორც ამავე დეკლარაციიდან ირკვევა, იოსებ (სოსო) ერქომაიშვილს, საქართველოს ადმინისტრაციულ-ტერიტ ორიულ ერთეულებში (ლანჩხუთის, ოზურგეთის, ჩოხატაურისა და ქ. ოზურგეთის მუნიციპალიტეტები) სახელმწიფო რწმუნებულის–გუბერნატორის მოადგილის პოსტიდან 2016 წლის 1 იანვრიდან 31 დეკემბრის ჩათვლით 29 471,00 ლარის შემოსავალი მიუღია.
მის ძმას, კონსტანტინე ერქომაიშვილს კი, სსიპ-საგანგებო და გადაუდებელი სიტუაციების მართვის სააგენტო მეხანძრე-მაშველის (გათვლის უფროსი) პოზიციისთვის – 8880,00 ლარი.
დეკლარაციის შევსების მომენტში, იოსებ ერქომაიშვილს ვი–თი–ბი ბანკის სახელფასო ანგარიშზე 6,25 ლარი ერიცხებოდა; ხოლო კონსტანტინე ერქომაიშვილს “თი–ბი–სი ბანკის” სახელფასო ანგარიშზე – 200,00 ლარი.
იოსებ ერქომაიშვილის სახელზე 21 600-ლარიანი სამომხმარებლო სესხია, რომელიც მას საქართველოს ბანკიდან 2014 წელს აქვს ღდა ვადა 2017 წლის 2 ოქტომბერს ეწურება. ბანკისთვის კი, გასულ წელს, სესხის დასაფარად 7200,00 ლარი გადაუხდია.
6811,00-ლარიანი სამომხმარებლო სესხი აქვს აღებული კონსტანტინე ერქომაიშვილსაც, რომელიც მას გასულ წელს აუღია და ვადა 2020 წელს ეწურება. ბანკისთვის კი, 189,40 ლარი აქვს გადახდილი.
რაც შეეხება წინა წლების შემოსავლებს, საჯარო სამსახურის ბიუროს ვებ-გვერდზე განთავსებული დეკლარაციებიდან ირკვევა, რომ 2015 წელს, სოსო ერქომაიშვილს შემოსავლის სახით, ჯამში, 24 000 ლარი აქვს მიღებული.
კერძოდ, სს საქართველოს ნავთობისა და გაზის კორპორაცია მთავარი სპეციალისტის თანამდებობიდან _ 6500ლარი; გუბერნატორის მოადგილეობისთვის _ 15 000 ლარი, ხოლო წმინდა სამების საკათედრო ტაძარიდან 2500ლარი, სადაც ის მგალობელი იყო.
2014 წლის დეკლარაციის თანახმად კი, სამების საკათედრო ტაძრიდან ერქომაიშვილს გაცილებით მეტი, 5856 ლარი აქვს მგალობლობისთვის მიღებული. ხოლო, ამავე წელს სს-საქართველოს ნავთობისა და გაზის კორპორაცია მთავარი სპეციალისტის თანამდებობიდან 15 840 ლარის შემოსავალი მიუღია.
