“საერთაშორისო გამჭვირვალობა _ საქართველომ” შეისწავლა სახელმწიფო რწმუნებულის ცხრა ადმინისტრაციის მიერ, 2021 წელს გაწეული ხარჯები, რამაც ჯამურად 5,567,583 ლარი შეადგინა.
“აღსანიშნავია, რომ სახელმწიფო რწმუნებულის ინსტიტუტი სახელმწიფოს ფუნქციონირებისთვის აუცილებელ არც ერთ კრიტიკულ ფუნქციას არ ასრულებს, არსებული პრაქტიკა კი გვიჩვენებს, რომ “სახელმწიფო რწმუნებულების” გავლენა მუნიციპალიტეტებზე მაღალია, ისინი ხშირად ერევიან პირდაპირი წესით არჩეული მერების და საკრებულოების საქმიანობაში და მნიშვნელოვნად ზღუდავენ მათ დამოუკიდებლობას, დეცენტრალიზაციის დაბალი დონის პირობებში, “სახელმწიფო რწმუნებულის” ინსტიტუტი ცენტრალური ხელისუფლებისთვის მნიშვნელოვანი ბერკეტია მუნიციპალიტეტებზე ფორმალური თუ არაფორმალური კონტროლის გასახორციელებლად”, _ ნათქვამია ანგარიშში.
ანგარიშში ნათქვამია, რომ სახელმწიფო რწმუნებულების ადმინისტრაციებმა 2021 წელს 5,5 მილიონ ლარზე მეტი დახარჯეს _ “საერთაშორისო გამჭვირვალობა – საქართველომ” შეისწავლა სახელმწიფო რწმუნებულის ცხრა ადმინისტრაციის მიერ 2021 წელს გაწეული ხარჯები, რამაც ჯამურად 5,567,583 ლარი შეადგინა.
2021 წელს, კონკრეტულად, გურიის სახელმწიფო რწმუნებულის ადმინისტრაციამ, 26 თანამშრომლისთვის ხელფასის სახით დახარჯა 385 191 ლარი, ხოლო პრემია, ჯილდო და დანამატის სახით გაცემულია 6 100 ლარი.
გურიის რწმუნებულის ადმინისტრაციამ, ასევე, დახარჯა 59 568 ლარის ღირებულების 23 533 ლიტრი საწვავი.
კვლევების მიხედვით, ქვეყნის შიგნით და ქვეყნის გარეთ მივლინებებში ყველაზე მეტი თანხაც გურიის რწმუნებულის ადმინისტრაციაზე მოდის.
თუმცა, ამავე რეგიონში გაცემულია ყველაზე ცოტა ჯილდო, პრემია და დანამატით, სულ 6 100 ლარი.
კვლევაში თავმოყრილია მონაცემები გაცემული შრომის ანაზღაურების, ჯილდოს/პრემიის და სახელფასო დანამატის, ასევე ადმინისტრაციების მიერ ტელეკომუნიკაციაზე, მივლინებებზე, საწვავზე, ავტომობილების შეკეთება/დიაგნოსტიკაზე გაწეული და წარმომადგენლობითი ხარჯების შესახებ.
ძირითადი მიგნებები
2021 წელს სახელმწიფო რწმუნებულის ადმინისტრაციებში გაცემულმა შრომის ანაზღაურებამ 4 397 668 ლარი შეადგინა, რაც საერთო ხარჯების 80 პროცენტია, ამავე დროს 100 517 ლარით მეტია 2020 წლის ანალოგიურ მაჩვენებელზე (4 297 151 ლარი);
ამავე პერიოდში დანამატის, ჯილდოსა და პრემიის სახით, ჯამში, 211 210 ლარი გაიცა, რაც 145 290 ლარით მეტია 2020 წელს გაცემული პრემია/დანამატის (65 290 ლარი) ოდენობაზე;
ადმინისტრაციებს, ჯამში, ჰყავთ 98 ავტომობილი (მათ შორის 13 გაუმართავი/ამორტიზებული), რომელთა შეკეთება/დიაგნოსტიკაზე 273 432 ლარი დაიხარჯა;
სახელმწიფო რწმუნებულის ადმინისტრაციებმა 2021 წელს 602 937 ლარი დახარჯეს 230 692 ლიტრი საწვავის შესასყიდად.
წინა წლების მსგავსად, ყველაზე მეტი საწვავი სამეგრელო-ზემო სვანეთის ადმინისტრაციამ მოიხმარა _ 45 066 ლიტრი, ჯამური ღირებულებით 113 883 ლარი;
თანამდებობის პირებს შორის ყველაზე დიდი ოდენობით საწვავი (10,663 ლიტრი) სამცხე-ჯავახეთის სახელმწიფო რწმუნებულმა, ბესიკ ამირანაშვილმა გახარჯა;
სატელეკომუნიკაციო ხარჯებმა 2021 წელს 48,437 ლარი შეადგინა, მივლინებებზე კი 4,951 ლარი დაიხარჯა;
წარმომადგენლობითი ხარჯებისთვის (კვებისა და რესტორნის მომსახურება, სასმელი პროდუქტების შეძენა და ა.შ.) სახელმწიფო რწმუნებულის ადმინისტრაციებმა 2021 წელს 29,948 ლარი გაიღეს, რომლის ძირითადი ნაწილი – 18,889 ლარი იმერეთის ადმინისტრაციაზე მოდის.
რამდენია თანამშრომელთა რაოდენობა?
აღსანიშნავია, რომ სახელმწიფო რწმუნებულის ადმინისტრაციებში 2021 წელს დასაქმებულთა რაოდენობა შემცირდა, ამჟამად 9 ადმინისტრაციაში 257 ადამიანია დასაქმებული, რაც 18 ერთეულით ნაკლებია 2020 წლის ანალოგიურ მაჩვენებელთან (275 დასაქმებული) შედარებით.
ყველაზე მეტი _ 35 ადამიანია დასაქმებული რაჭა-ლეჩხუმისა და ქვემო სვანეთის სახელმწიფო რწმუნებულის ადმინისტრაციაში, ყველაზე მცირე _ 25 კი იმერეთის ადმინისტრაციაში.
შრომის ანაზღაურება
2021 წელს სახელმწიფო რწმუნებულის ადმინისტრაციებში შრომის ანაზღაურების სახით, ჯამში, 4 397 668 ლარი გაიცა;
ამავე პერიოდში დანამატის, ჯილდოსა და პრემიის სახით ჯამში 211 220 ლარი გაიცა, რაც 145 290 ლარით მეტია 2020 წლის ანალოგიურ მაჩვენებელზე;
2021 წელს დანამატი, ჯილდო და პრემია ცხრავე ადმინისტრაციაში გაიცა, ყველაზე მეტი – 34 820 ლარი ქვემო ქართლის ადმინისტრაციაში, ყველაზე მცირე _ 6 100 ლარი კი გურიის ადმინისტრაციაში.
2021 წელს ჯილდო, პრემია და დანამატი სახელმწიფო რწმუნებულებსა და მათ მოადგილეებს არ აუღიათ;
სატრანსპორტო მომსახურება
სახელმწიფო რწმუნებულის 9 ადმინისტრაციამ სატრანსპორტო მომსახურებაში 876,369 ლარის ხარჯი გასწია, საიდანაც 602,937 ლარი საწვავის შეძენაზე, 273,432 ლარი კი ავტომობილების შეკეთებაზე დაიხარჯა.
ავტომობილები და მათი შეკეთების ხარჯები
სახელმწიფო რწმუნებულის ადმინისტრაციები 2021 წელს სულ 98 ავტომობილით სარგებლობდნენ. მათგან 13 ავტომობილი ამორტიზებული ან გაუმართავია;
ყველაზე მეტი _ 14 ავტომობილი სამეგრელო-ზემო სვანეთის ადმინისტრაციის სარგებლობაშია, თუმცა 8 მათგანი ამორტიზებულია;
საინტერესოა, რომ გურიის სახელმწიფო რწმუნებულის ადმინისტრაციის ბალანსზე ერთი ტრაქტორი (ბულდოზერიც) ირიცხება; თუმცა, არაა გასაჯაროებული, რაში და როდის იყენებენ ამ ტრანსპორტს.
სულ ავტომობილების რეაბილიტაციაზე 2021 წელს 273 432 ლარი დაიხარჯა.
კვლევაში ნათქვამია, რომ საწვავის შეძენასა და ავტომობილების შეკეთებაზე გაწეული ხარჯები იმდენად მაღალია, რომ მნიშვნელოვანია გასაჯაროვდეს, თუ რა კონკრეტული უფლებამოსილებების გახორციელებისა და მიზნებისთვის იქნა ეს თანხა გახარჯული!
აუცილებელია, საწვავისა თუ ავტომობილების არასამსახურებრივი მიზნებისთვის გამოყენების რისკების შესამცირებლად შემუშავდეს წესები, რომლითაც მკაცრად დარეგულირდება, თუ როდის და რა სახის უფლებამოსილების გახორციელებისთვის გამოიყენებენ ავტომობილებსა და შესყიდულ საწვავს.
სატელეკომუნიკაციო და სამივლინებო ხარჯები
სახელმწიფო რწმუნებულის ადმინისტრაციებმა სატელეფონო კომუნიკაციებზე 2021 წელს 48 437 ლარი გახარჯეს. აღსანიშნავია, რომ ქვემო ქართლში სახელმწიფო რწმუნებულის ადმინისტრაციამ სატელეფონო კომუნიკაციის ხარჯებში გააერთიანა ტელევიზიის, შიდასაქალაქო ტელეფონის და ინტერნეტის ხარჯები, შესაბამისად, ქვემო ქართლის მონაცემები ყველა ამ ხარჯს მოიცავს.
ქვეყნის შიგნით და ქვეყნის გარეთ მივლინებებზე სამხარეო ადმინისტრაციებმა 4 491 ლარი გახარჯეს.
წარმომადგენლობითი ხარჯები
სახელმწიფო რწმუნებულის ადმინისტრაციებმა 2021 წელს წარმომადგენლობითი ხარჯებისთვის, მათ შორის რესტორნის მომსახურებაზე, ასევე საოფისედ სასმელი პროდუქტების (წყალი, ჩაი, ყავა) შესაძენად 29 948 ლარი გაიღეს;
ყველაზე მეტი, 18 889 ლარის ხარჯი იმერეთის სახელმწიფო რწმუნებულის ადმინისტრაციაზე მოდის.
ავტორი
