“გვესმოდა, როგორ ითხოვდა ხალხი დახმარებას“

ქართველი ფეხბურთელები გოგონები, საქართველოს ნაკრების წევრები _ თათია გაბუნია და თეონა ბაქრაძე დამანგრეველი მიწისძვრის დროს თურქეთში იმყოფებოდნენ.

ორივე მათგანი, თავის თანაგუნდელებთან ერთად, ერთ-ერთ სასტუმროში იყვნენ. თათია და თეონა თურქეთში 2022 წლის 2 ნოემბერში ჩავიდნენ და ისინი საფეხბურთო კლუბ „amedspor“-ის წევრები არიან. ახლა ორივე მათგანი საქართველოშია _ თათია გურიაშია, თეონა კი _ სამეგრელოში.

“გურია ნიუსი“ თათია გაბუნიას ესაუბრა:

_ თურქეთში 2022 წლის 2 ნოემბერს გავემგზავრეთ მე და თეონა ბაქრაძე. ჩვენ ლანჩხუთის “გურიაში“ ვთამაშობდით და ისე მოხდა, რომ ერთად გავაგრძელეთ ფეხბურთის თამაში.

თავიდან პრობლემა შეგვექმნა, რადგან სატრანსფერო ფანჯარა დახურული იყო. ეს საკითხი მოგვარდა და ახალ სეზონზე ვიწყებდით თამაშს. ყველაფერი მოგვარებული იყო, მაგრამ თურქეთში მიწისძვრა მოხდა და ახლა ყველანი მიმართულია იმისკენ, როგორ დაეხმარონ ადამიანებს, რომლებმაც მიწისძვრის დროს საცხოვრებელი დაკარგეს. არის მსხვერპლი და  ყოველდღე ვუყურებთ, როგორ ამოყავთ მაშველებს პატარა ბავშვები და ადამიანები ნანგრევებიდან.

_ სასტუმროში, სადაც ცხოვრობდით, როგორც ჩვენთვის ცნობილია, მხოლოდ კედლები დაიბზარა. როგორ გაიხსენებდი მიწისძვრის ღამე?

_ თენდებოდა, როდესაც რყევებმა გაგვაღვიძა. თავიდან ვერ მივხვდით, რა ხდებოდა. პირველ სართულზე ჩამოვედით და იქ გავჩერდით, სანამ გათენდებოდა. როდესაც სასტუმროდან მშვიდობიან ადგილას გადავედით, დავინახეთ დანგრეული სახლები, კორპუსები. გვესმოდა, როგორ ითხოვდა ხალხი დახმარებას. ეს მძიმე სანახაობა არასდროს ამოვა ჩვენი მეხსიერებიდან.

_ როგორ დაბრუნდით სამშობლოში?

_ ქართველი ავთანდილ ხუჯაძე საქართველოდან ერაყში დადის „მინივენით“. დედაჩემი დაუკავშირდა მას და მან მოახერხა ჩვენი ჩამოყვანა საქართველოში. მგზავრობის დროს  უამინდობაც დაერთო ამ ყველაფერს და ძლივს ჩამოვედით საქართველოში.

თურქი ფეხბურთელები,  ჩვენი თანაგუნდელები თავიანთ საცხოვრებელ ადგილებში დაბრუნდნენ და ჩვენი წაყვანაც გადაწყვიტეს, მაგრამ მაგ დროს უკვე გარკვეული იყო სამშობლოში ჩვენი დაბრუნების ამბავი. ძალიან დაგვეხმარა ავთანდილ ხუჯაძე _ მან ყველაფერი გააკეთა, რომ დროზე ჩამოვეყვანეთ გურიაში. კლუბის ხელმძღვანელობასთან და ფეხბურთელებთან კონტაქტი არ გაგვიწყვეტია. ყოველდღე ვკითხულობთ ერთმანეთის ამბებს.

ყველას მადლობას ვუხდი, ვინც ამ მძიმე წუთებში დაგვეხმარა და ეხმარება თურქეთის მოსახლეობას. ახლაც ვერ გამოვსულვარ შოკიდან, ისეთი საშინელება ვნახე, _ გვითხრა თათია გაბუნიამ.

მისი თქმით, მას და თეონას გადაწყვეტილი აქვთ, თურქეთში ადამიანებს რაიმე სახით დაეხმარონ:

“ამ ეტაპზე ჩამოყალიბებული არ ვართ, რა სახის დახმარებას გავუწევთ. გვინდა, რომ ჩვენი პატარა წვლილი შევიტანოთ თურქეთში მცხოვრები ადამიანების დახმარებაში“, _ აღნიშნა ჩვენთან საუბრის დროს თათია გაბუნიამ.