“გზა ჩვენ არ გვაქვს და კვალი _ მხოლოდ დაპირებებია”

ლანჩხუთში, მაჩხვარეთის ადმინისტრაციულ ერთეულში, სოფელ ჯუნმერეში დილიდან ხალხი იყო შეკრებილი. როგორც გაირკვა, სოფლის მოსახლეობა გზის პრობლემის მოგვარებას ითხოვდა ადგილობრივი ხელისუფლებისგან.

„წლებია, ჩვენს სოფელში არაფერი გაკეთებულა. 10 ათასი ლარი გამოყვეს სოფლის პროგრამიდან სანიაღვრე არხისთვის. რა დიდი მანძილი ისაა, რომ ათი ათასი ლარი დასჭირდა?! ტყუილად ნურავინ იტყვის, ამ სოფელში რამე გაკეთდაო. თუ სხვაგან იმის შესაძლებლობაა, რომ გზა რამდენჯერმე მოიხრეშოს, ერთხელ ჩვენკენაც რომ გამოეხედათ, არ შეიძლებოდა?! აქაც ვცხოვრობთ ხალხი, მტვერსა და ბუღში რომ ვიხრჩობით.

 საარჩევნო პერიოდი როცაა, იცოცხლე, დაპირებები უხვადაა, მაგრამ რეალურად არაფერი კეთდება. ჩვენს სოფელში ასეა _ ვერაფერს ნახავს კაცი აქ გაკეთებულს. გზა ჩვენ არ გვაქვს და კვალი. დაპირებით კი გვპირდებიან, გაგიკეთებთ გზასო, მაგრამ როდის?! მარტო დაპირებები გვესმის არჩევნებიდან არჩევნებამდე. გაგვაგებინონ, როდის იქნება ამ სოფელში გზა“, _ ისმოდა მოსახლეობისგან.

შეხვედრაზე მყოფმა ლანჩხუთის მუნიციპალიტეტის მერმა ალექსანდრე სარიშვილმა შეკრებილებს კონკრეტული ვადა ვერ დაუთქვა, თუ როდისთვის გახდება აქ შესაძლებელი გზის სარეაბილიტაციო სამუშაოების დაწყება, თუმცა, პირობა დადო, რომ პროექტი წელსვე გაკეთდება. მერის თქმით, ამ ეტაპზე დაგეგმილია სანიაღვრე არხების, მაჩხვარეთის ძირითადი სავალი გზის ნაწილზე შავი საფარის და გაბიონების მოწყობა, დანარჩენი კი არცთუ შორეული პერსპექტივაა:
„მე ვერ მოგცემთ ტყუილ დაპირებას, რომ ხვალ ან ზეგ აქ გზა გაკეთდება. წელს მხოლოდ პროექტი შეგვიძლია გავაკეთოთ და გვქონდეს მზად, რომ შემდეგ მოხდეს საჭირო თანხის მოძიება“, _ თქვა სარიშვილმა.

გარდა გზისა, ადგილობრივებმა სანიაღვრე არხებისა და ხიდის პრობლემაზეც ისაუბრეს. თუმცა, როგორც მერის წარმომადგენელთან გოჩა ცინცაძესთან საუბრის შედეგად გაირკვა, ხიდთან დაკავშირებით საკითხი უკვე გადაწყვეტილია და სამუშაოებიც მალე დაიწყება:

„მთავარ საკითხად მოსახლეობა ამ შეხვედრაზე გზის გაკეთებას ითხოვდა. მათ მერმა აუხსნა, რომ პირველ რიგში პროექტი შედგება და შემდგომ დაიწყება გზის რეაბილიტაცია. რაც შეეხება ხიდებს, აქ ორი კაპიტალური ხიდი კეთდება _ ჯუნმერესა და ორაგვეში, რაც მილიონ ორასი ათასი ლარი ჯდება. დიდი თანხაა, მაგრამ დამერწმუნეთ, საშვილიშვილო ხიდი იქნება“, _ გვითხრა ცინცაძემ.