“საუკუნის პროექტად” წოდებული, ლანჩხუთის მუნიციპალიტეტის სოფლების _ სუფსა-გულიანი-ჩოჩხათის გზის 13-კილომეტრიანი მონაკვეთი, რომლის მშენებლობის დაწყებისას ხმაურიანი პრეზენტაციაც მოეწყო 2015 წლის 31 ივლისს და საბოლოოდ, სამუშაოები 2017 წელს დასრულდა, ახლა სავალალო მდგომარეობაშია.
“ესაა საუკუნის პროექტი და პროექტის შესაბამისად, ჩოჩხათში მშენებარე გზა მაღალი დონის იქნება _ ჯებირებით, ხიდებით, ბორდიურებითა და სარკეებით”, _ იყო დაპირება, თუმცა, რეაბილიტაცია ჩატარებული გზის გარკვეული მონაკვეთები წლებია, რაც დაზიანებულია და დროულ ყურადღებას საჭიროებს.
საგულისხმოა, რომ ზემოთ ნახსენებ გზაზე შესრულებული სამუშაოების უხარისხობაზე მოსახლეობა სარეაბილიტაციო სამუშაოების დაწყებიდან რამდენიმე თვეშივე ალაპარაკდა. მათ მაშინ წერილობითი მიმართვებიც გააგზავნეს სამხარაულის სახელობის ექსპერტიზის ეროვნულ ბიუროსა და მუნიციპალიტეტის გამგეობაში და ითხოვდნენ მდგომარეობის ადგილზე შესწავლას.
“შეუიარაღებელი თვალითაც კარგად ჩანს, რომ ასფალტი დაგებულია ზერელედ და უხარისხოდ. ცალკეულ ადგილებზე ჩანს დიდი ზომის ნაპრალები და სულ რაღაც სამი თვის წინ დაგებულ გზაზე მალე ისეთი ორმოები გაჩნდება, როგორიც ადრე იყო.
წერილობით მივმართეთ სამხარაულის სახელობის სასამართლო ექსპერტიზის ეროვნულ ბიუროს, ასევე, რაიონის გამგებელს. ვითხოვთ, დროულად გამოგზავნონ სპეციალისტები, რომლებიც ადგილზე შეაფასებენ მდგომარეობას, რომ არ გაგრძელდეს უხარისხო სამუშაოები”, _ ამბობდა მაშინ მიმდინარე სამუშაოების უხარისხობაში დარწმუნებული ჩოჩხათის ადმინისტრაციული ერთეულის მოსახლეობა.
ამ ფაქტთან დაკავშირებით 2016 წლის მარტში გამართულ საკრებულოს სხდომაზე, სოფლის მაშინდელმა მაჟორიტარმა, ალექსანდრე სარიშვილმა და ამავე სოფლის მკვიდრმა, დეპუტატმა ნონა მურვანიძემაც გააკეთეს განცხადებები. მათ აღნიშნეს, რომ გზის ის მონაკვეთი, სადაც ასფალტის საფარი რამდენიმე თვის წინ, სარეაბილიტაციო სამუშაოების დაწყების შემდეგ დაიგო, უკვე დაზიანებულია.
“ჩოჩხათი-სუფსის დამაკავშირებელი გზის მოასფალტება თავიდანვე ხარვეზებით დაიწყო პირველი ეტაპი დასრულებული არ იყო, რომ უკვე ალაგ-ალაგ დაზიანებული იყო. პროექტი ერთი წლის ჩაბარებულია, რომელზეც 3 მილიონზე მეტი თანხაა დახარჯული და გზა უკვე სერიოზულადაა დაზიანებული. დაბზარული გვირაბები ჩადეს ხიდებში და შრომისუბნის ცენტრში ხიდი უკვე ჩანგრეულია. ამ ყველაფერზე პასუხისმგებლობა ეკისრება, როგორც შემსრულებელ ფირმას, ასევე, ადგილობრივ ხელისუფლებას. ფაქტობრივად, 3 მილიონზე მეტი ლარი წყალშია გადაყრილი”, _ ამას კი, 2018 წელს “გურია ნიუსთან საუბარში ამბობდა “ევროპული საქართველოს” მაშინდელი ლანჩხუთელი ლიდერი ირაკლი მარშანიშვილი.
თუმცა, მერიის მაშინდელი მაღალჩინოსნები ჩოჩხათელთა მხრიდან გაჟღერებულ ამ შენიშვნებს არ იზიარებდნენ და მოსახლეობას აიმედებდნენ, რომ ყველაფერი გამოსწორდებოდა და მაღალი ხარისხით გაკეთდებოდა.
მაგრამ ფაქტები საპირისპიროზე მეტყველებს და სუფსა-გულიანი-ჩოჩხათის გზის მონაკვეთი ისევ ავარიულია. ამაზე თავად ადგილობრივები საუბრობენ საჯაროდ და სოციალური ქსელის საშუალებითაც. კერძოდ, ამჯერად საუბარია სოფელ შრომისუბნის მონაკვეთზე.
“სულ ცოტაც და გზის ეს მონაკვეთი სავალალო შედეგამდე მივა. ნუთუ, არავის აინტერესებს ეს?! ლანჩხუთის მერიამ უნდა მიიღოს მხედველობაში ეს საკითხი, თუ ვის მივმართოთ? ეს გზა ქალაქებთან არის დამაკავშირებელი და სანამ რაიმე მოხდა, ყურადღება მიაქციოს შესაბამისმა სამსახურებმა”, _ დაწერა ფეისბუქჯგუფში “This is ლანჩხუთი” ცირა ტიკარაძემ და თან ფაქტის ამსახველი ფოტოებიც გამოაქვეყნა, სადაც ნათლად ჩანს, თუ რა არასახარბიელო მდგომარეობაშია სოფლის ცენტრალური გზა.
“არ დადის მაგ გზით ლანჩხუთის მერი. სამარცხვინოა _ ჩოხატაურში, ოზურგეთში სოფელი არ არსებობს, რამე რომ არ კეთებოდეს, ჩვენ გზა სანატრელი გვაქვს და კრებას ისე აკეთებენ, მხოლოდ სოცდაუცველებს შეგნებულად იბარებენ. “ხმის ამოღების უფლება რომ არ აქვთ!” ეს რა არის, ყოველ გაწვიმებაზე გზა იკეტება და მალე ეგეც აღარ იქნება. მთლად რომ ჩასკდება, ალბათ, გვეტყვიან, ხაჯალიიდან იარეთო.
სულ მიგდებული რაიონია. გზები, რომლებიც “გაკეთდა”, უკვე გაფუჭდა. მოკლედ, ძაან ცუდია. ალბათ, მოსახლეობის ბრალიც არის, არავინ იღებს ხმას, ერთმანეთს უყურებენ.
ამოიღეს ხმა და რა მერე, ვინმემ გაიგონა?! რაც გაკეთებული იყო, ისიც გააფუჭეს!
ნუთუ, არ რცხვენია ადგილობრივ მთავრობას, რა დღეში აქვთ სოფლის გზები.
როგორი ძალისხმევით გაკეთდა სუფსა-გულიანის მონაკვეთის ასფალტირება და ვერ შევინარჩუნეთ ცოტა ხნით მაინც, ხრეშის გატანით დაანგრიეს გზა და გვაქვს ის, რაც არის ფოტოზე. შედეგზე პასუხისმგებლობა ისევ ხალხზეა???” _ ეხმაურებიან ცირა ტიკარაძის მიერ გამოქვეყნებულ პოსტს მოქალაქეები.
მერიის პიარიც გამოეხმაურა ფაქტს და დაწერა, რომ სპეციალისტებთან ერთად მუნიციპალიტეტის ხელმძღვანელობა აღნიშნულ საკითხზე მუშაობს:
“გეთანხმებით, აღნიშნულ გზაზე საკმაოდ რთული ვითარებაა _ რამდენიმე ადგილას განვითარდა მეწყრული პროცესი. მუნიციპალიტეტის მერის უშუალო ჩართულობით მომზადდა პროექტი. აუცილებელია, ჩატარდეს გზის გამაგრებითი სამუშაოები. სპეციალისტებთან ერთად მიმდინარეობს ამ საკითხზე მუშაობა, რათა დროულად დაიწყოს შესაბამისი სამუშაოები”, _ განმარტავს მერიის პრესსამსახურის ხელმძღვანელი მაკა სულაბერიძე.
ავტორი
