საქართველოში აშშ-ის ყოფილი ელჩი, იან კელი და სახელმწიფო დეპარტამენტის ყოფილი მაღალჩინოსანი, დევიდ კრემერი ერთობლივ განცხადებას ავრცელებენ.
“აშშ მალე ელჩის გარეშე დარჩება საქართველოში, რადგან რობინ დანიგანი იქ თანამდებობას ტოვებს, მიუხედავად იმისა, რომ წლების განმავლობაში საქართველო ამერიკის მთავარი პარტნიორი იყო რთულ სამეზობლოში და მისი მოსახლეობა რეგიონში ერთ-ერთი ყველაზე პროამერიკული იყო. ქართველ ხალხს კვლავ აქვს ასეთი შეხედულებები, მაგრამ მთავრობა აშკარად მოსკოვისკენ იხრება და სულ უფრო მეტად იქცევა რუსეთის რეჟიმის მსგავსად ქართული ოპოზიციისა და სამოქალაქო საზოგადოების წინააღმდეგ მიმართული რეპრესიების კუთხით.
ასეთი დინამიკა ტრამპის ადმინისტრაციისთვის აუცილებელს ხდის დანიგანის შემცვლელის სწრაფად დანიშვნას – ისეთის, რომელიც მკაცრად გააპროტესტებს საქართველოს მთავრობის ავტორიტარულ და პრორუსულ ქცევას. აშშ-ის სენატმა, თავის მხრივ, უნდა დაამტკიცოს კვალიფიციური კანდიდატი, რომელიც აკმაყოფილებს ამ ტესტს. მან ასევე უნდა მიიღოს კანონმდებლობა, რომელიც წარმომადგენელთა პალატამ უკვე დაამტკიცა 5 მაისს, რომელიც ქართველ ჩინოვნიკებს პასუხისმგებლობას დააკისრებს ანტიამერიკული ქმედებებისთვის და აჩვენებს აშშ-ის შეშფოთებას მათი ქვეყნის ავტორიტარული მმართველობისკენ სვლის გამო.
შეერთებულმა შტატებმა, ევროპელ მოკავშირეებთან ერთად, უნდა გააორმაგოს ძალისხმევა, რათა საქართველო დემოკრატიულ, პროდასავლურ გზაზე დააბრუნოს. არსებობს შესაძლებლობების ფანჯარა, რადგან რუსეთი კარგავს გავლენას რეგიონში. სომხეთსა და აზერბაიჯანს მოსკოვთან ურთიერთობები გაუარესდა. უკრაინა კი, რა თქმა უნდა, რუსეთის სასტიკ შემოჭრას ებრძვის”,_ წერია განცხადებაში.
