ინფორმაციას იმის თაობაზე, რომ ავტობანის ჯაპანა-ლანჩხუთის 14 კმ-იანი მონაკვეთი, ავარიული მდგომარეობის გამო იხურება, სოციალურ ქსელში ენმ-ის ლანჩხუთელი ლიდერი კახა ასკურავა ავრცელებს.
„ჯაპანა-ლანჩხუთის საავტომობილო ავტობანის მონაკვეთი, რომელიც ბევრი წვალებისა და დიდი ფულის მოტეხვის ხარჯზე, ერთი წლის უკან, როგორც იქნა, გაიხსნა, გაურკვეველი დროით ისევ იკეტება.
მიზეზი ავტობანზე არსებული ხიდების ჩაწევაა, რომელიც სახიფათო ზღვარზეა უკვე. ავტობანი, რომლის სამივე ლოტიც უნდა დასრულებულიყო 2016 სრულად, მისი ერთი მონაკვეთი გაიხსნა წელიწადნახევრის უკან და ისიც ისე უვარგისია, რომ უკვე იკეტება და პასუხისმგებელი არაა არავინ.
არადა მილიონობით ლარია სესხად აღებული ამ პროექტის გახორციელების მიზნით.
მავნებლები ხართ მოკალათებული ხელისუფლებაში!” _ წერს ასკურავა.
ინფორმაციის გადამოწმების მიზნით “გურია ნიუსი” გზების დეპარტამენტს დაუკავშირდა _ უწყების პრესსამსახური არ ადასტურებს გავრცელებულ ინფორმაციას.
