ლანჩხუთის მუნიციპალიტეტში, აკეთის ადმინისტრაციულ ერთეულში სოფლის მთავარი გზის პრობლემებთან დაკავშირებით ბევრჯერ ითქვა, ბევრჯერაც დაიწერა და ადგილობრივებმა ხელისუფლების წარმომადგენლებისგან არაერთხელ მიიღეს დაპირება პრობლემის მოგვარების თაობაზე. მაგრამ, წლებია, პრობლემა პრობლემად რჩება და ადგილობრივები კვლავაც ცდილობენ, გააგონონ საკუთარი ხმა ხელისუფლების წარმომადგენლებს.
საქმე გზის 12-კილომეტრიან მონაკვეთს ეხება, რომელიც სოფელ შუხუთიდან აკეთის ცენტრალურ გზას მოიცავს სოფელ ნაგომრამდე. როგორც აკეთის მოსახლეობა ამბობს, გზის აღნიშნულ მონაკვეთზე ტრანსპორტით გადაადგილება რთულია და ხშირ შემთხვევაში, სოფელ აცანიდან შემოვლითი გზით უწევთ სარგებლობა, რომ გადაუდებელი აუცილებლობის გამო, მუნიციპალიტეტის ცენტრამდე ჩავიდნენ.
მათივე ინფორმაციით, მიუხედავად ადგილობრივი ხელისუფლების მხრიდან არაერთხელ გაცემული პირობისა, რომ გზა გაკეთდებოდა, პრობლემა კვლავაც მოუგვარებელია. ადგილობრივთა თქმით, ჰქონდათ იმედი, რომ სოფლის მთავარი გზის მოწესრიგება გასული წლის გაზაფხულზე დაიწყებოდა, თუმცა, სამწუხაროდ, მათი ეს მოლოდინი არ გამართლდა.
“ეს უმოკლესი გზაა, რომელიც ლანჩხუთს მეზობელ ჩოხატაურსა და კურორტ ბახმაროსთან აკავშირებს, ამიტომ განსაკუთრებული დატვირთვა ზაფხულობით აქვს. გასულ წელს გვქონდა მოლოდინი, რომ ხელისუფლების მხრიდან ჩვენთვის მოცემული პირობა შესრულდებოდა და გზის რეაბილიტაცია დაიწყებოდა, მაგრამ არაფერი გაკეთებულა. მუნიციპალიტეტის პირველი პირებისგან მხოლოდ ის გვესმის, რომ გზის მშენებლობა დღის წესრიგშია, რაღაც სავარაუდო ვადებსაც ასახელებენ, მაგრამ კონკრეტული ჯერ კიდევ არაფერი ჩანს”, _ ამბობენ აკეთელები, რომლებიც პროტესტის მწვავე ფორმით იმუქრებიან, თუ მათი ეს პრობლემა არ გადაიჭრება.
“ყელში ამოვიდა ამდენი დაპირება _ წლებია, სოფელს არ აქვს ცენტრალური გზა. მთავარი გზა მაინც გაგვიკეთონ! სოფელში ცხოვრება გვინდა, ოჯახები გვყავს.
თუ მოკლე ხანში ამ გზის მშენებლობა არ დაიწყება, ნახავენ, რა შეუძლია ხალხს _ მალე არჩევნები მოდის!” _ იმუქრება მოსახლეობა
2020 წლისთვის აკეთში სოფლის ცენტრალური გზის მშენებლობის დაწყების მოლოდინი მართლაც იყო, ამის დასტურია გასული წლის ზაფხულში მერიის ინფრასტრუქტურის სამსახურის უფროსის ლევან ჩხაიძის “გურია ნიუსთან” გაკეთებული კომენტარი, სადაც იგი აანონსებდა, რომ გზის მშენებლობა აკეთში 2020 წელს დაიწყებოდა.
“ჩვენ სოფლის მოსახლეობას ვუთხარით, რომ დაპროექტება და გზის მშენებლობა 2020 წელს მოხდებოდა, თუმცა, არ თქმულა კონკრეტული ვადები. სამუშაო საავტომობილო გზების დეპარტამენტმა უნდა განახორციელოს, რაც მიმდინარე წლისთვისაა გათვალისწინებული”, _ თქვა “გურია ნიუსთან” ჯერ კიდევ გასული წლის ივლისში ლევან ჩხაიძემ.
აკეთის გზის რეაბილიტაცია რომ მართლაც დგას დღის წესრიგში და ის საავტომობილო გზების დეპარტამენტის პროგრამით უნდა მოხდეს, “გურია ნიუსთან” საუბარში რამდენიმე დღის წინაც დაადასტურა მერიის ინფრასტრუქტურის სამსახურის ხელმძღვანელმა, თუმცა, კონკრეტულ ვადებზე ჩხაიძე ვერაფერს ამბობს.
სწორედ, ზემოთ ნახსენები პრობლემის თაობაზე შეხვდნენ “აკეთის ახალგაზრდული კომიტეტის” წევრები ადგილობრივი და სამხარეო ხელისუფლების წარმომადგენლებს რამდენიმე დღის წინ.
ამის თაობაზე ინფორმაცია სოციალურ ქსელში სოფლის “ახალგაზრდული კომიტეტის’’ წევრებმა თავად გაავრცელეს.
როგორც გაირკვა, სოფლის ახალგაზრდებთან შეხვედრას ლანჩხუთის მერი ალექსანდრე სარიშვილი, სახელმწიფო რწმუნებული გურიის მხარეში გიორგი სახოკია, მერის წარმომადგენელი აკეთის ადმინისტრაციულ ერთეულში მანუჩარ ღლონტი და თემის მოსახლეობის ნაწილი ესწრებოდნენ.
“ხელისუფლების წარმომადგენლებს გავაცანით ჩვენი სამოქმედო გეგმა, რომ თუ 2021 წლის თვითმმართველობის არჩევნებამდე არ დაიწყება ცენტრალური გზის, რაც თემში შემავალ ოთხივე სოფელს ეხება, ასფალტირებასთან დაკავშირებული რეალური პროცესები: გზის შესწავლა, პროექტირება, ტენდერის გამოცხადება და ტენდერის დამტკიცება, მაშინ 800-მდე ხელმომწერი მოსახლე ბოიკოტს გამოუცხადებს არჩევნებს. არჩევნებამდე ოთხი თვეა დარჩენილი და ველით ამ პროცესების დაწყებას.
იმედს ვიტოვებთ, რომ ხელისუფლება ჩვენს ხმას გაიგებს და არ დაგვჭირდება არჩევნების ბოიკოტირება”, _ განმარტებულია “ახალგაზრდული კომიტეტის” მიერ გავრცელებულ ინფორმაციაში.
აკეთის ახალგაზრდულმა კომიტეტმა სოციალურ ქსელში პეტიციაც გაავრცელა სოფელში 12-კილომეტრიანი გზის საფარის მოწესრიგების თაობაზე.
“ხელი უამრავმა ადამიანმა მოაწერა, რომელთა შორის 800 ადგილობრივი მცხოვრებია. როცა ხედავ, რომ ის, ვისაც შენი სოფლის პრობლემების მოგვარება ევალება, ვერ აგვარებს მას, არ უნდა დაელოდო და შენ თვითონვე უნდა დაიწყო ბრძოლა შენი სოფლის კეთილდღეობისთვის. სოფელში ძალიან ბევრი პრობლემაა. არ ვაპირებთ ამ პრობლემებზე თვალის დახუჭვას. ფაქტია, რომ სოფლებს დღესდღეობით ნაკლები ყურადღება ექცევა და ამ მხრივ, ახალგაზრდების ჩართულობით და აქტიურობით ბევრი რამის მიღწევაა შესაძლებელი. აკეთის მოსახლეობა ხელისუფლებისგან გზის საფარის მოწესრიგებას ითხოვს. უგზოობის პრობლემიდან გამომდინარე, სოფელში სხვა პრობლემებიც აქტუალურია”, _ აჟღერებენ აკეთელი ახალგაზრდები.
თემასთან დაკავშირებით მერიის პრესასთან ურთიერთობის განყოფილების ხელმძღვანელმა მაკა სულაბერიძემ გვითხრა, რომ მუნიციპალიტეტის მერი პრობლემის თაობაზე კვლავაც გეგმავს შეხვდეს აკეთის ადმინისტრაციული ერთეულის მოსახლეობას:
“შეხვდა მერი ამ ადამიანებს, კიდევ აპირებს მათთან შეხვედრას და ამის შემდეგ დაიწყება შესწავლა და პროექტირება”, _ გვითხრა სულაბერიძემ.
