მიმდინარე წლის ზაფხულში საქართველოს ეროვნული გუნდის ფეხბურთელ ხვიჩა კვარაცხელიას კარიერა ევროპულ კლუბში უნდა გაეგრძელებინა. მის მოსალოდნელ ტრანსფერებზე ლამის ყოველდღე იწერებოდა. სამწუხაროდ მოლოდინი არ გამართლდა, კვარაცხელია ყაზანის „რუბინში“ ჩარჩა და ამ სეზონში ძველებურად ვერ ბრწყინავს: აქტივში მხოლოდ 1 გოლი და 2 საგოლე პასი აქვს.
გუშინ გამოცემასთან „Sportbox“ ცნობილმა რუსმა საფეხბურთო ექსპერტმა ალექსანდრ ბუბნოვმა ქართველი ფეხბურთელის თამაში შეაფასა:
„საქმე გვაქვს მიზეზების მთელ წყებასთან. ხვიჩას ტრავმები ჰქონდა, რის შემდეგაც მისი და დესპოტივიჩის დუეტი ისეთივე ეფექტური ვეღარაა. ცხადია, იმოქმედა ტრანსფერზე გაუთავებელმა საუბრებმა, მეტოქეებმა კი მის წინააღმდეგ უფრო ხისტადა და ყურადღებით თამაში დაიწყეს, ცდილობენ დაზღვევაზე ყურადღებით იყვნენ და კვარაცხელიას იერიში თავშივე ჩაკლან. ის დრიბლინგს კვლავინდებურად კარგად იყენებს, თუმცა, მოედნის ცენტრში ბევრი ფეხბურთელის გარემოცვაში ხშირად ხვდება. „რუბინის“ მთელი შეტევითი თამაში, ფაქტობრივად, მასზეა აწყობილი, ეს კი, მოწინააღმდეგეებს საქმეს უადვილებს. მარტო იერიშს ვერ წარმართავ. გუნდი ვერ ახერხებს თავისუფალი ზონების გამოყენებას მაშინ, როდესაც მთელი ყურადღება ხვიჩაზეა გადატანილი, ამასთან, რიგ ეპიზოდებში საკუთარ თავზე ძალიან ბევრს იღებს. ამის გამო, იკლებს როგორც პირადად მისი, ასევე მთელი გუნდის ეფექტურობა. უნდა შეიცვალოს თუ არა მან გარემო? თავდაპირველად, „რუბინში“ შედეგიანობა უნდა გაზარდოს, სხვა შემთხვევაში, ფეხბურთელზე, რომელსაც მოქმედი კონტრაქტი აქვს, მოთხოვნა არ იქნება”.
მიმდინარე თვეს საქართველოს საკალათბურთო ნაკრები მსოფლიოს მომავალი პირველობის ორ შესარჩევ შეხვედრას ჩაატარებს: 26 ნოემბერს თბილისში უკრაინას უმასპინძლებს, 29-ში კი სტუმრად ესპანეთს დაუპირისპირდება.
გუშინ ცნობილი გახდა რომ ნოემბრის შეხვედრებზე ნაკრებს ესპანური „ტენერიფეს“ მოთამაშე გიორგი შერმადინი დაუბრუნდება. ქართველმა ტრავმა მიმდინარე წლის 25 სექტემბერს, ესპანეთის პირველობის ერთ-ერთი მატჩის მიმდინარეობისას მიიღო.
გუშინ შერმადინმა განაცხადა, რომ ტრავმის მოშუშების შემდეგ თავს კარგად გრძნობს და მზადაა, სრული დატვირთვით ითამაშოს:
„წელის ტკივილის გამო დაახლოებით თვენახევარი გამიცდა და ცხადია, ეს იოლი პერიოდი ნამდვილად არ ყოფილა. მადლობა თანაგუნდელებს, მწვრთნელებსა და სამედიცინო პერსონალის წევრებს. მათ ყველაფერი გააკეთეს, რათა რაც შეიძლება მალე დავბრუნებულიყავი. ახლა, თავს კარგად ვგრძნობ და მზად ვარ, ფიზიკურ დატვირთვებსაც გავუძლო“.
გუშინ ცნობილი გახდა რომ დიდი ალბათობით, მიმდინარე სეზონის დასრულების შემდეგ პორტუგალიელი კრიშტიანო რონალდუ „მანჩესტერ იუნაიტედს“ დატოვებს.
გამოცემა „Daily Express“-ის მტკიცებით, რონალდუს კლუბის ამბიციები არ მოსწონს და შეიძლება მომავალი წლის ზაფხულში ტრანსფერი მოითხოვოს. წყაროს ცნობით, იმ შემთხვევაში, თუ მანჩესტერული გუნდი პრემიერლიგის მიმდინარე სეზონს ოთხეულში ვერ დაასრულებს, კრიშტიანო გუნდს დატოვებს, რადგან კარიერის ბოლო ეტაპზე ჩემპიონთა ლიგის მიღმა დარჩენა არ სურს.
იტალიურმა გამოცემამ „itasportpress“ ცოტა არ იყოს მოულოდნელი ინფორმაცია გაავრცელა, – მოსკოვის „სპარტაკის“ მთავარ მწვრთნელად შესაძლოა ჯენარო გატუზო დაინიშნოს. „სპარტაკის“ ხელმძღვანელობა ამჟამინდელი მწვრთნელი რუი ვიტორიას შემცვლელად პირველ რიგში სწორედ გატუზოს განიხილავს, რომელიც ამჟამად უმუშევარია.
იტალიელი სპეციალისტი გასული სეზონის ბოლოს „ნაპოლიდან“ დაითხოვეს, შემდეგ ზაფხულში „ფიორენტინა“ ჩაიბარა, მაგრამ კლუბის ხელმძღვანელობასთან კონფლიქტის გამო პოსტი სამ კვირაში დატოვა. მოსკოველები გატუზოს 3-წლიან კონტრაქტს და იმაზე ორჯერ მეტ ხელფასს სთავაზობენ, ვიდრე „ნაპოლიში“ მუშაობის პერიოდში იღებდა.
მოსკოვის „სპარტაკი“ სეზონს წარუმატებლად ატარებს და რუსეთის პრემიერლიგაში 18 ქულით მხოლოდ მეცხრე ადგილზეა.
კატალონიურ „ბარსელონაში“ კი ჩავი ერნანდესი მუშაობას უკვე შეუდგა და პირველივე დღეს სამსახურიდან ორი თანამშრომელი გაათავისუფლა. გამოცემა „AS“-ის ინფორმაციით, ახალმა მთავარმა მწვრთნელმა სამსახურიდან ფიზიოთერაპევტი ხუანხო ბრაუ და ფიტნეს მწვრთნელი ალბერტო როკე გაათავისუფლა.
ბრაუს შეცვლის კარლეს ნოგეირა, რომელიც ჩავისთან ერთად ყატარულ „ალ-სადში“ მუშაობდა, ხოლო ახალი ფიტნეს მწვრთნელი ივან ტორესი იქნება. გარდა ამისა, 41 წლის სპეციალისტი უკმაყოფილოა კლუბის სამედიცინო პერსონალის მუშაობით რადგან მიმდინარე სეზონში „ბარსელონაში“ ტრავმების ეპიდემიაა.
გუნდის ლაზარეთში ამ დროისთვის 11 ფეხბურთელია და მათ შორის, 7-ს კუნთის პრობლემები აქვს – პედრის, უსმან დემბელეს, სერხი რობერტოს, ნიკო გონსალესს, ჟერარდ პიკეს, ერიკ გარსიას და ანსუ ფატის. ნეტო გაციებულია, სერხიო აგუეროს გულზე აქვს პრობლემები, მარტინ ბრაიტვაიტმა მუხლის ოპერაცია გაკეთა, სერჟინიო დესტს კი ზურგი აწუხებს.
ჩავიმ რონალდ კუმანი შეცვალა. მან კლუბთან კონტრაქტი 2024 წლის ზაფხულამდე გააფორმა. ჩავიმ კლუბში პირველი საწვრთნელი პროცესი უკვე ჩაატარა, დებიუტი კი 20 ნოემბერს, ბარსელონურ დერბიში, „ესპანიოლთან“ ექნება.
[sexy_author_bio]
