თბილისში მოხალისეობრივი პლატფორმის დროის ბანკის FACEBOOK გვერდის Timerepublik Georgia პირდაპირ ეთერში (FACEBOOK LIVE), განათლების განვითარების და დასაქმების ცენტრმა (EDEC), ევროკავშირის მიერ დაფინანსებული პროექტის – სამოქალაქო საზოგადოების განვითარების ინიციატივის (CSSIGE) ფარგლებში, მოხალისეობისა და სამოქალაქო აქტივიზმის თემაზე ინტელექტუალური თამაში რა? სად? როდის? გამართა.
ღონისძიება მიზანად ისახავდა მოხალისეობისა და სამოქალაქო აქტივიზმის თემაზე საზოგადოების, განსაკუთრებით ახალგაზრდების ცნობიერების ამაღლებას.
ინტელექტუალურ თამაშში ერთმანეთს შეეჯიბრა 10 გუნდი საქართველოს 10 რეგიონიდან. თითოეულ გუნდში წარმოდგენილი იყვნენ ახალგაზრდა ინტელექტუალები, მოხალისეები და რეგიონული სამოქალაქო და სათემო ორგანიზაციების წევრები.
თამაში საინტერესოდ და სახალისოდ წარმართა რა? სად? როდის? კლუბის წევრმა ზაალ ხონელიძემ. დაისვა 20 კითხვა მოხალისეობისა და სამოქალაქო აქტივიზმის თემაზე, მათ შორის, მონაწილეებს ვიდეო–შეკითხვებით მიმართეს პროექტის „სამოქალაქო საზოგადოების განვითარების ინიციატივა“ ხელმძღვანელმა დათო აფრასიძემ, ერთ–ერთმა საუკეთესო მოაზროვნემ და საქართელოს რა? სად? როდის? პირველმა მაგისტრმა გიორგი ბაქრაძემ და „მშვიდობის კორპუსი საქართველოში“ ხელმძღვანელმა ბრაიან კუმინსმა.
მონაწილე 10 გუნდს შორის დაძაბული შეჯიბრი აჭარის გუნდის „ინტელექტის“ ღირსეული გამარჯვებით დასრულდა, საუკეთესო მოაზროვნე კი გურიის გუნდის „გურულების“ წევრი იზი მგელაძე დასახელდა. თამაშის თითოეულ მონაწილეს და გამარჯვებულს სიმბოლური საჩუქრები გადაეცათ.
თამაშში ვირტუალურად იყვნენ ჩართულები FACEBOOK მომხმარებლებიც, რომელთაგანაც 16–მა ადამიანმა გუნდს დაასწრო და სწორი პასუხი დააფიქსირა.
